Asebter amenzawi

Hindi Zahra teɛjeb i wegdud deg uhanay-nnes amezwaru deg Ldzayer Tamaneɣt

LDZAYER TAMANɣT– Aṭas seg wid ay iḥemmlen aẓawan deg Ldzayer Tamaneɣt ay iḥedṛen deg uhanay (ɛarḍ) n tcennayt tafṛensist-tameṛṛukit Hindi Zahra, ay yecnan i tikkelt tamezwarut deg Ldzayer.

Abaraz (ḥafl) n Hindi Zahra tessuddes-it Tnegga Tadzayrit i Ucceɛceɛ Adelsan (Aarc), usan-d ɣer-s aṭas n wid ay tt-yessnen yernu itikiyen n ubaraz-a fuken acḥal n wussan uqbel ma yella-d.

Taɣect n tcennayt-a tessewlawel ulawen s yiwen n uẓawan aydeg xelḍen yiɣaniben n jazz, reggae, rock d uẓawan n folk, am wakken ay yella deg-s daɣ wenya (ritm) n uẓawan amɣarbi, afriqi, amaceɣ d ulatinu.

Tizlatin ay d-tecna Hindi Zahra deg tsehṛa-nni tefren-itent-id, s umata, seg walbumen-nnes n « Hindi Zahra » (2009) d « Handmade » (2010), yerna llant gar-asent tezlatin am « Beautiful tango », « Try » d « Imik s Imik ».

Nnig taɣect-nnes d-yufraren, tanaẓurt-a tcennu s tanglizit, akken ay tcennu daɣ s tefṛensist, s tmaziɣt d taɛṛabt taɣerfant. Hindi Zahra teɛjeb daɣ agdud-nnes s ccḍeḥ-nnes afessas aydeg yexleḍ uɣanib n folk, iɣaniben igmuḍanen (carqiyya), aɣanib amaziɣ d win n « wejdab » ay tt-id-yesskanayen amzun tudef athewwel, tedda deg lhawa n uẓawan d yisefra-nnes.

Ccna-nnes yezdi yid-s uẓawan allalan (tagiṭart, tabast, ḍḍbul d yinasiwen), yernu tfuṛes Hindi Zahra, deg ubaraz-a, tecna-d kra n tezlatin seg walbum-nnes aneggaru, « Homeland » (2015), gar-asent « Any Story », « Un jour » d « Dream ».

ɣef walbum-a, tenna-d tcennayt dakken « tɛawed tenṭeb deg yedles-nnes ameṛṛuki d laṣel-nnes amaceɣ », yernu tessadef deg-s imesliyen (aṣwat) d-yettwagmen seg « wasuf » n uẓawan tegrawt tamaceɣt n « Tinariwen », maca aẓawan-nnes nettat tessexleḍ-as-d ugar seg yiɣaniben n rock d blues, d cwiṭ seg uɣanib n gnawa.