ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵜⵉⵖⵔⵉ ⵏ ⵜⴻⵙⴱⴻⴷⴷⵉⵜ ⵏ ⴽⴻⵏⵏⴻⴷⵢ ⵉ ⵜⵄⴻⵙⵙⴰⵙⵜ ⵏ ⵢⵉⵣⴻⵔⴼⴰⵏ ⵏ ⵡⴻⵎⴷⴰⵏ ⴷⴻⴳ ⵓⵏⴻⵥⵔⵓⴼ ⵓⵜⵔⵉⵎ
ⵡⴰⵛⵉⵏⵜⵏ– ⵜⴳⴻⵔ-ⴷ ⵜⴻⵙⴱⴻⴷⴷⵉⵜ ⵏ ⵔⵧⴱⴻⵔⵜ ⴽⴻⵏⵏⴻⴷⵢ ⵜⵉⵖⵔⵉ, ⴰⵙⵙ ⵏ ⵍⴰⵕⴻⴱⵄⴰ ⴷⴻⴳ ⵡⴰⵙⵀⵉⵏⴳⵜⵧⵏ, ⵉ ⵍⵎⴻⵏⴷ ⵏ ⵓⵙⵙⴻⴱⴷⴻⴷ ⵏ ⵜⵜⴰⵡⵉⵍ ⵉⵎⵣⵉⵔⴻⴳ (ⵎⵓⵙⵜⴰⵇⵉⵍ) ⵉ ⵜⵄⴻⵙⵙⴰⵙⵜ ⵏ ⵢⵉⵣⴻⵔⴼⴰⵏ ⵏ ⵡⴻⵎⴷⴰⵏ ⴷⴻⴳ ⵢⵉⴽⴰⵍⴻⵏ ⵉⵚⴻⵃⵔⴰⵡⵉⵢⴻⵏ ⵢⴻⵜⵜⵡⴰⴹⴹⴼⴻⵏ.
« ⵉⴷⵓⴱⴰ ⵉⵎⴻⵕⵕⵓⴽⵉⵢⴻⵏ ⵎⴰⵣⴰⵍ ⵍⴰ ⵔⴻⴽⴽⴹⴻⵏ ⴰⵔⴽⴰⴹ ⵓⴼⴹⵉⵃ ⵉⵣⴻⵔⴼⴰⵏ ⵏ ⵡⴻⵖⵔⴻⴼ ⴰⵚⴻⵃⵔⴰⵡⵉ ⴷⴻⴳ ⵡⴰⴽⴰⵍ ⵏ ⵓⵏⴻⵥⵔⵓⴼ ⵓⵜⵔⵉⵎ ⵓⵔ ⵢⴻⵙⵄⵉⵏ ⴰⵔⴰ ⵜⴰⴼⵓⵍⵎⴰⵏⵜ (ⵃⵓⴽⵎ ⴷⴰⵜⵉ) », ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵜⴻⵙⴱⴻⴷⴷⵉⵜ ⴷⴻⴳ ⵓⵕⴰⴱⵓⵍ-ⵏⵏⴻⵙ ⴰⵢ ⴷ-ⵜⴻⵙⵙⵓⴼⴼⵓⵖ ⵢⴰⵍ 6 ⵏ ⵡⴰⵢⵢⵓⵔⴻⵏ ⵖⴻⴼ ⵡⴻⵔⴽⴰⴹ ⵏ ⵢⵉⵣⴻⵔⴼⴰⵏ ⵏ ⵡⴻⵎⴷⴰⵏ ⴷⴻⴳ ⵓⵏⴻⵥⵔⵓⴼ ⵓⵜⵔⵉⵎ ⵢⴻⵜⵜⵡⴰⴹⴹⴼⴻⵏ. ⴰⵕⴰⴱⵓⵍ-ⴰ ⵢⴻⴼⴼⴻⵖ-ⴷ ⴰⵙⵙ ⵏ ⵍⴰⵕⴻⴱⵄⴰ ⴷⴻⴳ ⵡⴰⵙⵀⵉⵏⴳⵜⵧⵏ. ⵢⴻⵃⵙⴻⴱ-ⴷ ⵓⵕⴰⴱⵓⵍ-ⴰ ⵉⵔⴽⴰⴹⴻⵏ ⴰⵢ ⴷ-ⵢⴻⵍⵍⴰⵏ ⵎⴳⴰⵍ ⵢⵉⵚⴻⵃⵔⴰⵡⵉⵢⴻⵏ ⴳⴰⵔ ⵢⵓⵍⵢⵓ ⴷ ⴷⵓⵊⴻⵎⴱⴻⵕ 2015, ⵢⴻⵔⵏⵓ ⵉⵅⴻⴱⴱⴻⵔ-ⴷ ⴷⴰⴽⴽⴻⵏ ⵓⴼⴰⵏ-ⴷ 3 ⵏ ⵢⵉⵥⴻⴽⵡⴰⵏ ⵓⵛⵔⵉⴽⴻⵏ ⴰⵢⵙⴻⴳ ⴷ-ⵙⴽⴻⴼⵍⴻⵏ 70 ⵏ ⵢⵉⵚⴻⵃⵔⴰⵡⵉⵢⴻⵏ.
ⵉⵔⴽⴰⴹⴻⵏ-ⴰ ⵏ ⵢⵉⵣⴻⵔⴼⴰⵏ ⵏ ⵡⴻⵎⴷⴰⵏ ⵣⴳⴰⵏ ⵜⵜⵉⵍⵉⵏ-ⴷ ⴷⴻⴳ ⵓⵏⴻⵥⵔⵓⴼ ⵓⵜⵔⵉⵎ ⵢⴻⵔⵏⵓ ⴰⵢⴰ « ⵢⴻⵜⵜⵡⴻⴽⴽⵉⴷ-ⴷ ⴷⴰⴽⴽⴻⵏ ⵢⴻⵙⵙⴻⴼⴽ ⴰⴷ ⴷ-ⵢⴻⵜⵜⵡⴰⵙⵙⴻⴱⴷⴻⴷ ⵓⵏⴻⴳⵔⴰⵡ (ⵏⵉⴹⴰⵎ) ⵉⵎⵣⵉⵔⴻⴳ ⵏ ⵜⵄⴻⵙⵙⴰⵙⵜ ⵏ ⵢⵉⵣⴻⵔⴼⴰⵏ ⵏ ⵡⴻⵎⴷⴰⵏ ⴷⴻⴳ ⵓⵏⴻⵥⵔⵓⴼ ⵓⵜⵔⵉⵎ », ⴰⴽⴽⴻⵏ ⴰⵢ ⴷ-ⵜⵡⴻⵚⵚⴰ ⵢⴰⴳⵉ ⵜⴻⴳⵔⴰⵡⵜ ⵏ ⵓⵃⵓⴷⴷⵓ ⵏ ⵢⵉⵣⴻⵔⴼⴰⵏ ⵏ ⵡⴻⵎⴷⴰⵏ ⴰⵢ ⵉⵅⴻⴷⴷⵎⴻⵏ ⴷⴻⴳ ⵡⴰⵙⵀⵉⵏⴳⵜⵧⵏ.
ⵜⴻⵔⵏⴰ-ⴷ ⵜⴻⵙⴱⴻⴷⴷⵉⵜ ⵏ ⴽⴻⵏⵏⴻⴷⵢ ⴷⴰⴽⴽⴻⵏ ⵜⵓⵖⴷⴰⴹⵜ ⵏ ⵎⵉⵏⵓⵔⵙⵧ (ⵏ ⵢⴻⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ) ⵡⴻⵔⵄⴰⴷ ⵓⵔ ⵜⴻⵙⵄⵉ ⴰⵔⴰ ⵉⵎⴰⵏⴰⵢⴻⵏ (ⵎⵓⵔⴰⵇⵉⴱⵉⵏ) ⵏ ⵢⵉⵣⴻⵔⴼⴰⵏ ⵏ ⵡⴻⵎⴷⴰⵏ, ⵢⴻⵔⵏⵓ ⵉⵕⴰⴱⵓⵍⴻⵏ ⵏ ⵓⵙⴻⵇⵇⴰⵎⵓ ⵓⵏⵏⵉⴳ ⵏ ⵢⴻⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵉ ⵢⵉⵣⴻⵔⴼⴰⵏ ⵏ ⵡⴻⵎⴷⴰⵏ ⴷⴻⴳ ⵓⵏⴻⵥⵔⵓⴼ ⵓⵜⵔⵉⵎ ⵡⴻⵔⵄⴰⴷ ⵓⵔ ⴷ-ⴼⴼⵉⵖⴻⵏ ⴰⵔⴰ.
