ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⴰⴽⴰⵍ ⵏ ⵓⵄⴰⵡⴻⵏ ⴰⵏⵎⴻⵜⵜⵉ: ⴰⴷ ⴰⵙⴻⵏ-ⴷ-ⴳⴻⵏ ⵍⴻⴽⵡⴰⵖⴻⴹ ⵉ 23.000 ⵏ ⵜⵡⴰⵛⵓⵍⵉⵏ ⴷⴻⴳ ⵍⴷⵣⴰⵢⴻⵔ ⵜⴰⵎⴰⵏⴻⵖⵜ
ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ, 3 ⵎⴻⵖⵔⴻⵙ 2016 – ⵢⴻⵏⵏⴰ-ⴷ ⵓⵡⴰⵍⵉ ⵏ ⵍⴷⵣⴰⵢⴻⵔ, ⴰⴱⴷⴻⵍⴽⴰⴷⴻⵔ ⵣⵧⵓⴽⵀ, ⴰⵙⵙ ⵏ ⵍⴻⵅⵎⵉⵙ, ⴷⴰⴽⴽⴻⵏ ⵙⴱⴻⴷⴷⴻⵏ-ⴷ ⵙⴻⴳ ⵎⴻⵍⵎⵉ ⴽⴰⵏ ⵢⵉⵡⴻⵜ ⵏ ⵜⵙⴻⵇⵇⴰⵎⵓⵜ ⴰⴷ ⴷ-ⵉⴳⴻⵏ ⵍⴻⴽⵡⴰⵖⴻⴹ ⵉ 23.000 ⵏ ⵜⵡⴰⵛⵓⵍⵉⵏ ⴰⵢ ⵉⵣⴻⴷⵖⴻⵏ ⴷⴻⴳ ⵡⴰⴽⴰⵍ ⴰⵏⵎⴻⵜⵜⵉ ⴷ ⵡⴻⵙⵎⴰⵍⴰⵏ ⵡⴰⵔ ⵎⴰ ⵙⵄⴰⵏ ⵍⴻⵄⵇⴻⴷ.
ⴷⴻⴳ ⵢⵉⵡⴻⵏ ⵏ ⵓⵙⴰⵔⴰⴳ ⵏ ⵜⵖⴻⵎⵙⴰ ⴰⵢ ⴷ-ⵢⴻⵍⵍⴰⵏ ⴷⴻⴳ ⵢⵉⵊⵉⴼⴻⵕ ⵏ ⵜⴻⵔⵣⵉ ⵏ ⵓⵙⵙⴻⴼⵇⴻⴷ ⵏ ⵡⴰⵛⵃⴰⵍ ⵏ ⵜⵖⵉⵡⴰⵏⵉⵏ ⴷⴻⴳ ⵜⵡⵉⵍⴰⵢⵜ ⵏ ⵍⴷⵣⴰⵢⴻⵔ ⵜⴰⵎⴰⵏⴻⵖⵜ, ⵢⴻⵏⵏⴰ-ⴷ ⵎⴰⵙⵙ ⵣⵧⵓⴽⵀ ⴷⴰⴽⴽⴻⵏ ⴰⴷ ⴰⵙⴻⵏ-ⴷ-ⴳⴻⵏ ⵍⴻⴽⵡⴰⵖⴻⴹ ⵉ 23.000 ⵏ ⵜⵡⴰⵛⵓⵍⵉⵏ ⴰⵢ ⵉⵣⴻⴷⵖⴻⵏ ⴰⴽⴰⵍ ⵏ ⵍⴻⴱⵏⵉ ⵡⴰⵔ ⵍⴻⵄⵇⴻⴷ.
ⵢⴻⵏⵏⴰ-ⴷ ⴷⴰⵖ ⴷ ⴰⵎⴰⵔⵓ ⴰⵎⴰⵜⵓ ⵏ ⵜⵡⵉⵍⴰⵢⵜ ⴰⵢ ⴷ ⴰⵙⴻⵍⵡⴰⵢ ⵏ ⵜⵙⴻⵇⵇⴰⵎⵓⵜ-ⴰ ⴰⵢ ⴷ-ⵢⴻⵜⵜⵡⴰⵙⴱⴻⴷⴷⴻⵏ ⵙⴻⴳ ⵎⴻⵍⵎⵉ ⴽⴰⵏ, ⵢⴻⵔⵏⵓ ⵜⴰⵙⴻⵇⵇⴰⵎⵓⵜ-ⴰ ⵜⴻⵜⵜⴻⵎⵍⵉⵍⵉ ⵢⴰⵍ ⴷⴷⵓⵕⵜ ⴰⴽⴽⴻⵏ ⴰⴷ ⴷ-ⵜⴻⵙⵙⵓⴽⴽ ⵜⵉⵟ ⵖⴻⴼ ⵢⵉⴽⴰⵔⴰⵎⴻⵏ ⴰⵢ ⴰⵙ-ⴷ-ⵢⴻⵜⵜⵓⵏⴻⴼⴽⴻⵏ ⵢⴻⵔⵏⵓ ⵍⴻⴽⵡⴰⵖⴻⴹ ⵏ ⵜⵡⴰⵛⵓⵍⵉⵏ-ⴰ ⴰⴷ ⴱⴷⵓⵏ ⴰⴷ ⵜⴻⵏ-ⵉⴷ-ⵙⵙⴻⵡⵊⴰⴷⴻⵏ ⵛⵡⵉⵟ, ⵛⵡⵉⵟ, ⴰⵔⵎⴰ ⴷ ⴰⵙⵎⵉ ⴰⴷ ⴼⴰⴽⴻⵏ ⴰⴽⴽ ⵢⵉⴽⴰⵔⴰⵎⴻⵏ ⴰⵢ ⴷ-ⵜⴻⴹⴹⴻⴼ ⵜⵙⴻⵇⵇⴰⵎⵓⵜ-ⴰ.
ⵢⴻⵏⵏⴰ-ⴷ ⵎⴰⵙⵙ ⵣⵧⵓⴽⵀ, ⵙⴻⴳ ⵢⵉⴷⵉⵙ ⵏⵉⴹⴻⵏ, ⴷⴰⴽⴽⴻⵏ ⵍⴰ ⴷ-ⵜⴻⵜⵜⵉⵍⵉ ⵜⴻⵣⵔⴰⵡⵜ (ⴷⵉⵔⴰⵙⴰ) ⵏ ⵢⵉⵡⴻⵏ ⵏ ⵓⵙⴻⵏⴼⴰⵔ ⴰⵎⴷⵉⵏⴰⵏ ⴰⴷ ⵢⴻⵔⵣⵓⵏ 57 ⵏ ⵜⵖⵉⵡⴰⵏⵉⵏ. ⵜⴰⵣⵔⴰⵡⵜ-ⴰ ⵜⴻⵍⵀⴰ-ⴷ ⵢⵉⴷ-ⵙ ⵢⵉⵡⴻⵜ ⵏ ⵜⵏⴰⵔⵉⵜ ⵏ ⵜⴻⵣⵔⴰⵡⵉⵏ ⴷ ⵜⴰⴱⴻⵕⵕⴰⵏⵉⵜ ⵢⴻⵔⵏⵓ ⵓⵔ ⵢⴻⵜⵜⵄⴻⴹⴹⵉⵍ ⴰⵔⴰ ⵓⵙⴻⵏⴼⴰⵔ-ⴰ ⴰⴷ ⵢⴻⵜⵜⵡⴰⵇⴱⴻⵍ.
ⴰⵙⴻⵏⴼⴰⵔ-ⴰ ⵢⴻⵔⵣⴰ ⴷⴰⵖ ⴼⴻⵔⵔⵓ ⵏ ⵡⵓⴳⵓⵔ ⵏ ⵍⴱⴻⵏⵢⴰⵏⴰⵜ ⴰⵢ ⵢⴻⵜⵜⵡⴰⴱⵏⴰⵏ ⵖⴻⴼ ⵡⴰⴽⴰⵍ ⵏ ⵜⴽⴻⵔⵔⴰⵣⵜ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ.
ⵏⵏⵉⴳ ⵡⴰⵢⴰ, ⵢⴻⵏⵏⴰ-ⴷ ⵓⵡⴰⵍⵉ ⵏ ⵍⴷⵣⴰⵢⴻⵔ ⴷⴰⴽⴽⴻⵏ ⴰⵖⴰⵡⴰⵙ ⵏ ⵓⵀⴻⵢⵢⵉ ⵏ ⵜⵎⴰⵏⴻⵖⵜ ⵏ 2012-2035 ⵢⴻⵙⵙⴻⴼⴽ ⴰⴷ ⵢⵉⵍⵉ ⴷ ⵜⴰⴳⵏⵉⵜ ⵉ ⵓⵄⴰⵡⴻⴷ ⵏ ⵜⵓⴽⵛⵉ ⵏ ⵛⵛⴰⵏ ⵉ « ⵍⴷⵣⴰⵢⴻⵔ ⵜⴰⵎⴻⵍⵍⴰⵍⵜ », ⵢⴻⵔⵏⵓ ⵢⴻⵏⵏⴰ-ⴷ ⴷⴰⴽⴽⴻⵏ ⵜⴻⵙⴼⴰⵢⴷⵉ-ⴷ ⵜⵡⵉⵍⴰⵢⵜ ⵏ ⵍⴷⵣⴰⵢⴻⵔ ⵙⴻⴳ ⵜⵊⴻⵍⵍⴰⴱⵜ ⵏ 500 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⵙⴰⵏⵜⵉⵎⴻⵏ ⵉ ⵍⵎⴻⵏⴷ ⵏ ⵡⴰⵢⴰ.
