Asebter amenzawi
Ugar n 90.000 n medden ay irewlen seg temnaḍin n yimenɣi deg Daṛfur
NEW YORK (Tuddsa n Yeɣlanen Yeddukklen) – Ugar 90.000 n medden ay irewlen seg temnaḍin aydeg yenker yimenɣi d aqesḥan gar yigen (ǧayc) d yiɣewwaɣen (mutamarridin). Imenɣi-a yenker azal n 6 n ledwaṛ aya deg Jebel Marra, deg Daṛfut (deg utaram n Sudan), ɣef wakken ay d-nnant ass n lexmis Tuddsa n Yeɣlanen Yeddukklen d Tdukli Tafriqit.
Deg yiwen n welɣu (bayan) ucrik, taselwayt n Tseqqamut n Tdukli Tafriqit, Nkosazana Dlamnini-Zuna, d umaru amatu n Tuddsa n Yeɣlanen Yeddukklen, Ban Ki-moon, ssutren seg Sudan ad teǧǧ tuɣdaḍt n Minuad (tuɣdaḍt tucrikt n Yeɣlanen Yeddukklen d Tdukli Tafriqit deg Daṛfur) ad tessiweḍ lemɛawna ɣer temnaḍt-a n yedraren.
Nnan-d sin-a n yemḍebbren dakken « tecɣeb-iten aṭas temsalt » imi ay d-rewlen 90.000 n yiɣarimen (madaniyyin) ɣer Daṛfur n Ugafa, nnig 2,6 n yimelyunen n medden ay irewlen yagi uqbel ɣef lǧal n taluft n Daṛfur.
Yeffeɣ-d daɣ yisali, ula ma ur d-yettwawekked ara, ɣef trewla n waṭas n yimezdaɣen seg tlemmast n Daṛfur yernu werɛad ur ssawḍent ara tuddsiwin n lemɛawna ad awḍent ɣer yimukan-a akken ad sfeqden aya.
Yuɣ lḥal, yenna-d yagi yiwen n umasay (mas’ul) n Tuddsa n Yeɣlanen Yeddukklen seg melmi kan dakken rnan rewlen 50.000 n medden seg yexxamen-nsen deg Daṛfur.
« Ulac tifrat taserdasant i taluft n Daṛfur », ɣef wakken ay ɛawden wekkden-d Mass Ban d Massa Dlamini-Zuma, yernu gren-d tiɣri i lemcawṛat.
Amgaru-a (ḥarb) yegla s 300.000 n tmeddurin d 2,6 n yimelyunen n medden ay irewlen seg yexxamen-nsen seg 2003, ɣef leḥsab n Tuddsa n Yeɣlanen Yeddukklen.
