Asebter amenzawi
Asegzawal aynutlayan amaziɣ : Smetren-d ifecka imaynuten n unadi deg Bgayet
Bgayet – Imuhal n umyiger ussnan ɣef Useḍru n yisegzawalen iynutlayanen n tutlayt tamaziɣt rnan ddan ass n lḥedd deg Bgayet s umahel n yisaragen ussnanen akked snat tnemsal ɣef usemres n yifecka n tsenselkimt deg tseknawalt tamaziɣt akked useɣnew, sya ɣer sdat, n yiwen n ulemmas n tegmi ɣef tutlayt tamaziɣt deg Tesdawit n Bgayet.
Deg umyiger-a ussnan i d-yessuddes usqamu unnig n timmuzɣa (HCA), Tasdawit Abderrahmane Mira akked Tnaremt n Uṣeggem akked Uselmed n Tutlayt Tamaziɣt (LAELA, Tizi Wezzu), nufa kkin daɣen yimazzayen iɣelnawen akked yiberraniyen i d-yussan daɣen seg Meṛṛuk, Fransa akked Swis.
Asarag n Mass Philippe Martin, d aprufisur n tesnilsit deg Tesdawit n Paris (Diderot), igelles ɣef yiwet n tmuɣli tamaynut deg wayen yerzan aseḍru n usegzawal n Tmaziɣt agt-midya i yersen ɣef uzadur i umi ttinin ‘’lexicophonie’’, d aseddu n ususru n wawalen deg yiwet n liḥala daxel n usegzawal agt-midya, aya d ayen ara isishilen almad n tutlayt-a i d-iteffɣen seg timawt.
Massa Noura Tigziri, d taprufisurt deg Ugezdu n Tutlayt akked Yidles amaziɣ n Tizi Wezzu, tessassen-d, deg usarag-is, Azadur n yisefka umḍinen n tesniremt n tmezzugin deg tmazight i yesnefli LAELA.
Afecku-a i mazal deg lebni deg Tesdawit n Tizi Wezzu, iswi-s d asegrew n wawalen itwilanen izeblen deg ddeqs n yidlisen akken ad rsen deg uzadur n yisefken ara sferken yimazzayen.
Aṭas n n yismaglen i yettwannan deg taggara n snat tnemsal-nni, ideg, dɣa, asumer n trusi n yimawalen n tutlayt tamaziɣt i d-yeẓreg usqamu unnig n timmuzɣa gar ifassen n yinagmayen.
