Asebter amenzawi

Ulac ccek ɣef lehhu n wassaɣen gar Lezzayer d Fṛansa (Chevenement)

PARIS – Yenna-d uneɣlaf afṛensis aqbur, Jean-Pierre Chevènement, ass n ttlata deg Paris, dakken « war ccek », assaɣen gar Lezzayer d Fṛansa uɣalen gerrzen ugar n zik, yernu yenṣeḥ-d dakken ur yessefk ad d-yili wuɣal ɣer deffir deg wanect-a.

Deg tinawt-nnes n werẓam n usarag n Usudu n Wassaɣen Igraɣlanen Isuddsanen (IRIS) umi semman « Lezzayer: d acu n ubeddel? », Chevenement yellan d aselway n Tiddukla n Fṛansa-Lezzayer, yenna-d dakken Fṛansa ur tettwali Lezzayer d tamurt n menwala, wanag tettwali-tt d tacrikt wukud tezmer ad tesɛu assaɣ d uzzig (xaṣṣ), yernu yesḥassef ɣef wayen ay d-ttinin kra n ttawilat n yisalan ifṛensisen ur la d-yettakfen tugna iṣeḥḥan ɣef Lezzayer.

Dɣa, ɣef leḥsab-nnes, snat-a n tmura ad zemrent ad xedment xir lemmer ad mɛawanent, yernu iwekked-d dakken arkad n Lezzayer yesɛa lfayda d tameqrant ɣef Fṛansa.

Seg yidis niḍen, yenna-d Mass Chevenement dakken aselway n tegduda, Abdelaziz Bouteflika, yurar dduṛ d ameqran deg wuɣal n talwit ɣer tmurt deffir wacḥal n yiseggasen n rrebrab, am wakken ay d-yesmekti dakken Lezzayer tqubel rrebrab i yiman-nnes.

Iwekked-d daɣ Mass Chevenement dakken aɣref adzayri yebɣa arkad deg tmurt-nnes deg wakud aydeg llant tlufa d timeqranin ḥuzant timura taɛṛabin.