Asebter amenzawi

Yaman: wten Yeɣlanen Yeddukklen deg tummɣa-nni ay d-yellan ɣef yiwen n ssuq

Nyu YRK (Tuddsa n Yeɣlanen Yeddukklen)– Iwet-d umaru amatu n Yeɣlanen Yeddukklen, Ban Ki-moon, ass n laṛebɛa, deg tummɣa-nni tagenwant n temsisit (taḥaluf) taɛṛabt yellan ddaw ṛṛay asaɛudi, aydeg yettwet, ass n ttlata, ssuq n al-Khamees deg tnebḍit tayamanit n Hajja.

D wa ay d « axeṣṣar ameqran akk seg wasmi ay d-tebda taluft-a » yernu d tikkelt tis snat anda ad d-yili uxeṣṣar am wa deg snat n ledwaṛ, ɣef wakken ay d-iwekked Mass Ban deg yiwen n welɣu (bayan) aydeg d-yessuter « ad d-yili weḥtac s tɣawla, d aḥtac amellil, d imzireg yernu d arawsan ».

Iger-d daɣ Mass Ban tiɣri i wakk idisan ay terza taluft akken « ad qadren s tidet lwajeb-nsen agraɣlan » d yimenzayen « n uḥezzeb d uqisi n tyita ɣef leḥsab n taluft ».

Tummɣa ɣef yiɣrimen (madaniyyin) yessefk « tettwagdel seg llsas » yernu aya d « arkaḍ ufḍiḥ n lqanun alsan (insani) agraɣlan », ɣef wakken ay d-yenna Mass Ban.

Ad ilin mmuten, ma ulac, 41 n yemdanen ass n ttlata deg tyitiwin tigenwanin ay tga Tgelda Tasaɛudit ɣef yiwen n ssuq n tnebḍit n Hajja d-yezgan deg ugafa n Yaman yellan gar yifassen n yiɣewwaɣen (mutamarridin), ɣef leḥsab n wakken ay d-nnan yesbiṭaren d leɛṛac n temnaḍt-nni.