ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵍⴻⵖⵡⴰⵟ : 112 ⵏ ⵢⵉⵙⴻⵏⴼⴰⵔⴻⵏ ⵏ ⴰⵏⵙⴻⵊ ⴰⵢ ⵢⴻⴱⴷⴰⵏ ⴷⴻⴳ 2015

ⵍⴻⵖⵡⴰⵟ– ⵜⴻⵏⵏⴰ-ⴰⵖ-ⴷ ⵜⵏⴻⴳⴳⴰ ⵜⴰⵖⴻⵍⵏⴰⵡⵜ ⵏ ⵡⴻⴷⵀⴰⵍ (ⴷⴰⵄⵎ) ⵏ ⵓⵙⵙⴻⵎⵔⴻⵙ ⵏ ⵢⵉⵍⴻⵎⵥⵉⵢⴻⵏ, ⴷⴰⴽⴽⴻⵏ 112 ⵏ ⵢⵉⵙⴻⵏⴼⴰⵔⴻⵏ ⵉ ⵓⵙⵙⴻⴱⴷⴻⴷ ⵏ ⵜⴻⵕⵎⵉⵙⵉⵏ (ⵛⴰⵔⵉⴽⴰⵜ) ⵜⵉⵎⴻⵥⵢⴰⵏⵉⵏ ⴰⵢ ⵢⴻⴱⴷⴰⵏ ⴷⴻⴳ ⵜⵡⵉⵍⴰⵢⵜ ⵏ ⵍⴻⵖⵡⴰⵟ ⴷⴻⴳ ⵓⵙⴻⴳⴳⴰⵙ ⵏ 2015.

ⵜⵉⵕⵎⵉⵙⵉⵏ-ⴰ ⵜⵉⵎⴻⵥⵢⴰⵏⵉⵏ ⵅⴻⴷⴷⵎⴻⵏⵜ ⴷⴻⴳ ⵢⴻⵃⵔⵉⵛⴻⵏ ⵏ ⵢⵉⵎⴻⵥⵍⴰ (ⵅⴰⴷⴰⵎⴰⵜ) (38 ⵏ ⵢⵉⵙⴻⵏⴼⴰⵔⴻⵏ), ⵏ ⵜⴽⴻⵔⵔⴰⵣⵜ (31 ⵏ ⵢⵉⵙⴻⵏⴼⴰⵔⴻⵏ), ⵏ ⵜⴻⵎⴳⵓⵔⵉ (27 ⵏ ⵢⵉⵙⴻⵏⴼⴰⵔⴻⵏ), ⵎⴰ ⴷ ⴰⵢⴻⵏ ⴰⵢ ⴷ-ⵢⴻⵇⵇⵉⵎⴻⵏ ⴷ ⵜⵉⵕⵎⵉⵙⵉⵏ ⵏ ⵜⴻⵏⴹⵉ (ⵚⵉⵏⴰⵄⴰ ⵜⴰⵇⵍⵉⴷⵉⵢⵢⴰ) ⴷ ⵍⴻⴱⵏⵉ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵎⵀⴰⵍ ⵏ ⵜⴻⵙⴽⴰ ⵏ ⵜⵏⴻⴳⴳⴰ ⵜⴰⵖⴻⵍⵏⴰⵡⵜ ⵏ ⵡⴻⴷⵀⴰⵍ ⵏ ⵓⵙⵙⴻⵎⵔⴻⵙ ⵏ ⵢⵉⵍⴻⵎⵥⵉⵢⴻⵏ ⴷⴻⴳ ⵍⴻⵖⵡⴰⵟ, ⵀⴰⵛⵀⴻⵎⵉ ⴱⴻⵏⵣⴰⵧⵓⵉ.

90% ⵙⴻⴳ ⵢⵉⵙⴻⵏⴼⴰⵔⴻⵏ-ⴰ ⵜⵜⵡⴰⵙⴱⴻⴷⴷⴻⵏ-ⴷ ⵙ ⵢⴻⴷⵔⵉⵎⴻⵏ ⵙⴻⴳ 3 ⵏ ⵢⵉⴷⵉⵙⴰⵏ (ⴰⵏⴻⵙⵎⴰⵍ-ⵜⴰⵏⴻⴳⴳⴰ-ⵜⴰⴱⴰⵏⴽⴰ) ⵢⴻⵔⵏⵓ ⵢⴻⵜⵜⵓⵏⴻⴼⴽ-ⴰⵙⴻⵏ-ⴷ ⵕⴰⵙⴻⵍⵎⴰⵍ ⵏ 10 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵉⵏⴰⵕⴻⵏ. ⵜⵉⵕⵎⵉⵙⵉⵏ ⴰⵢ ⴷ-ⵉⵍⵓⵍⴻⵏ ⵙⴻⴳ ⵡⴰⵢⴰ ⴼⴽⴰⵏⵜ ⴰⵅⴻⴷⴷⵉⵎ ⵉ 500 ⵏ ⵢⴻⵎⴷⴰⵏⴻⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ.

ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵉⵔⵉⵔⵉ ⵏ ⵢⴻⴷⵔⵉⵎⴻⵏ ⵏ ⵓⵔⴻⴹⴹⴰⵍ, ⵜⴰⵏⴻⴳⴳⴰ ⵜⴰⵖⴻⵍⵏⴰⵡⵜ ⵏ ⵡⴻⴷⵀⴰⵍ ⵏ ⵓⵙⵙⴻⵎⵔⴻⵙ ⵏ ⵢⵉⵍⴻⵎⵥⵉⵢⴻⵏ ⵏ ⵍⴻⵖⵡⴰⵟ ⵜⴻⵙⵙⴰⵡⴻⴹ ⴰⴷ ⴷ-ⵜⴻⵔⵔ, ⴰⵔ ⵉⵎⵉⵔ-ⴰ, 45% ⵙⴻⴳ ⵢⴻⴷⵔⵉⵎⴻⵏ ⴰⵢ ⵜⴻⵔⴹⴻⵍ, ⵢⴻⵔⵏⵓ ⵜⵄⴰⵡⴻⴷ ⵜⴻⵙⴷⵓⵇⵇⴻⵙ-ⴷ ⴰⵎⴻⵥⵍⵓ-ⵏⵏⵉ (ⵎⴰⵚⵍⴰⵃⴰ) ⵏ ⵡⴻⴹⴼⴰⵔ ⵏ ⵢⵉⵔⵉⵔⵉ ⵏ ⵢⴻⴷⵔⵉⵎⴻⵏ ⵏ ⵓⵔⴻⴹⴹⴰⵍ, ⴰⵎ ⵡⴰⴽⴽⴻⵏ ⴰⵢ ⵜⴻⵙⵙⵓⴳⴳⴻⵜ ⵍⴻⵛⵖⴰⵍ ⵏ ⵡⴻⵙⵃⵓⵍⴼⵓ ⵏ ⵢⵉⵍⴻⵎⵥⵉⵢⴻⵏ ⴰⴽⴽⴻⵏ ⴰⴷ ⴷ-ⵔⵔⴻⵏ ⵉⴷⵔⵉⵎⴻⵏ ⴰⵢ ⴰⵙⴻⵏ-ⵢⴻⵜⵜⵡⴰⵔⴻⴹⵍⴻⵏ.

ⵜⴰⵏⴻⴳⴳⴰ ⵜⴰⵖⴻⵍⵏⴰⵡⵜ ⵏ ⵡⴻⴷⵀⴰⵍ ⵏ ⵓⵙⵙⴻⵎⵔⴻⵙ ⵏ ⵢⵉⵍⴻⵎⵥⵉⵢⴻⵏ ⵜⴻⵍⵀⴰ-ⴷ, ⵉⵎⵉⵔ-ⴰ, ⵙ ⵓⵙⵙⴻⴱⵖⴻⵙ (ⵜⴰⵛⴵⵉⵄ) ⵏ ⵢⵉⵍⴻⵎⵥⵉⵢⴻⵏ ⴰⴽⴽⴻⵏ ⴰⴷ ⴷ-ⵙⴱⴻⴷⴷⴻⵏ ⵜⵉⵕⵎⵉⵙⵉⵏ ⴷⴻⴳ ⵡⴻⵃⵔⵉⵛ ⵏ ⵜⴽⴻⵔⵔⴰⵣⵜ, ⵍⴰⴷⵖⴰ ⵉⵎⵉ ⵜⴰⵎⵏⴰⴹⵜ ⵏ ⵓⴳⴰⴼⴰ (ⵛⴰⵎⴰⵍ) ⵏ ⵜⵡⵉⵍⴰⵢⵜ-ⴰ ⵜⵡⴰⵜⴰ ⵉ ⵡⴰⵏⴻⵛⵜ-ⴰ.