Asebter amenzawi
Leɣwaṭ : 112 n yisenfaren n ANSEJ ay yebdan deg 2015
LEɣWAṬ– Tenna-aɣ-d Tnegga Taɣelnawt n Wedhal (daɛm) n Ussemres n Yilemẓiyen, dakken 112 n yisenfaren i ussebded n teṛmisin (carikat) timeẓyanin ay yebdan deg twilayt n Leɣwaṭ deg useggas n 2015.
Tiṛmisin-a timeẓyanin xeddment deg yeḥricen n yimeẓla (xadamat) (38 n yisenfaren), n tkerrazt (31 n yisenfaren), n temguri (27 n yisenfaren), ma d ayen ay d-yeqqimen d tiṛmisin n tenḍi (ṣinaɛa taqlidiyya) d lebni, ɣef wakken ay d-yenna unemhal n teska n Tnegga Taɣelnawt n Wedhal n Ussemres n Yilemẓiyen deg Leɣwaṭ, Hachemi Benzaoui.
90% seg yisenfaren-a ttwasbedden-d s yedrimen seg 3 n yidisan (anesmal-tanegga-tabanka) yernu yettunefk-asen-d ṛaselmal n 10 n yimelyunen n yidinaṛen. Tiṛmisin ay d-ilulen seg waya fkant axeddim i 500 n yemdanen, ɣef wakken ay d-yenna.
Deg wayen yerzan iriri n yedrimen n ureḍḍal, Tanegga Taɣelnawt n Wedhal n Ussemres n Yilemẓiyen n Leɣwaṭ tessaweḍ ad d-terr, ar imir-a, 45% seg yedrimen ay terḍel, yernu tɛawed tesduqqes-d ameẓlu-nni (maṣlaḥa) n weḍfar n yiriri n yedrimen n ureḍḍal, am wakken ay tessugget lecɣal n wesḥulfu n yilemẓiyen akken ad d-rren idrimen ay asen-yettwareḍlen.
Tanegga Taɣelnawt n Wedhal n Ussemres n Yilemẓiyen telha-d, imir-a, s ussebɣes (tacǧiɛ) n yilemẓiyen akken ad d-sbedden tiṛmisin deg weḥric n tkerrazt, ladɣa imi tamnaḍt n ugafa (camal) n twilayt-a twata i wanect-a.
