Asebter amenzawi

Amsizwer aɣelnaw n uneggez i wunjugen: d Boughrab Ali ay irebḥen

SIDI BELƐEBBAS– D amnay n Wesrir Anakan n CH Mettijet Leblida, Boughrab Ali, ay irebḥen arraz n « Salah Abdeddaim » n wemsizwer aɣelnaw n uneggez i wunjugen ay ifuken ass n ssebt tameddit deg wammas anakan n Sidi Belɛebbas. Boughrab yerbeḥ arraz-a s wayis-nnes « Baldi ».

Amnay n CH Mettijet ur igi ula d yiwet n tuccḍa deg wakud n 38,87. Win d-yusan deffir-s d Ait Lounis Brahim seg wesrir anakan n Zradla s wayis-nnes « Vega » s wakud n 04,49. Wis kraḍ d Mamissi Zakaria (ula d netta seg Zradla) s wakud n 2,50 s wayis-nnes « Toy Joy ».

Tadyant-a taddalant teḍḍef 3 n wussan yernu yessuddes-itt wesrir anakan n Bni Ɛmeṛ n Sidi Belɛebbas s wemɛawen d Tifidiṛalit Tanakant Tadzayrit i wesfugel n 19 Meɣres, ass n trennawt (naṣr) taɣelnawt. Tekkan deg wemsizwer-a 100 n yemnayen d 100 n yiysan seg 17 n yesriren inakanen n tmurt deg taggayin n yimeẓyanen, ilemẓiyen d yimeqranen n tfesna 1ut d tis 2.

10 n yikayaden ay d-yellan deg wemsizwer-a i rrbeḥ n warraz n « Salah Abdeddaim » yellan zik d aselway n Tiddukla Tanakant n Bni Ɛmeṛ. Imuzzag (muxtaṣṣin) ay iḥedṛen din nnan-d dakken aswir atwilan (tiqni) n wemsizwer-a yella-d yelha.