ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵜⵉⵖⵔⵉ ⵉ ⵡⴻⵔⵥⴰⵎ ⵏ ⵡⴰⵎⵎⴰⵙⴻⵏ ⵏ ⵓⴷⴰⵡⵉ ⵏ ⵡⴻⵇⵔⴰⵃ ⴷⴻⴳ ⵡⴰⴽⴽ ⵉⵙⴱⵉⵟⴰⵔⴻⵏ
ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ- ⵜⵡⴻⴽⴽⴻⴷ-ⴷ ⵜⵉⵖⴻⴼⵜ ⵏ ⵓⵎⴻⵥⵍⵓ (ⵎⴰⵚⵍⴰⵃⴰ) ⵏ ⵓⵙⴷⵓⵇⵇⴻⵙ ⵏ ⵡⴻⵙⴱⵉⵟⴰⵔ ⴰⵙⴷⴰⵡⴰⵏ ⵏ ⵍⴰⵎⵉⵏⴻ ⴷⴻⴱⴰⴳⵀⵉⵏⴻ (ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ), ⵜⴰⵒⵕⵓⴼⵉⵙⵓⵔⵜ ⵏⴰⴷⵉⴰ ⴼⴻⵍⵍⴰⵀ, ⴷⴰⴽⴽⴻⵏ ⵢⴻⵙⵙⴻⴼⴽ ⴰⴷ ⵜⵜⵡⴰⵔⴻⵥⵎⴻⵏ ⵡⴰⵎⵎⴰⵙⴻⵏ ⵏ ⵓⴷⴰⵡⵉ ⵏ ⵡⴻⵇⵔⴰⵃ ⴷⴻⴳ ⵡⴰⴽⴽ ⵉⵙⴱⵉⵟⴰⵔⴻⵏ ⵏ ⵜⵎⵓⵔⵜ.
ⵜⴰⵎⴰⵣⵣⴰⴳⵜ-ⴰ (ⴰⵅⵉⵚⵚⴰ’ⵉⵢⵢⴰ) ⵜⴻⵏⵏⴰ-ⴷ, ⴷⴻⴳ ⵢⵉⵡⴻⵏ ⵏ ⵡⴻⵎⵢⴰⴳⴻⵔ ⵖⴻⴼ ⵓⴷⴰⵡⵉ ⵏ ⵡⴻⵇⵔⴰⵃ, ⴷⴰⴽⴽⴻⵏ ⵍⵍⴰⵏ 4 ⵏ ⵡⴰⵎⵎⴰⵙⴻⵏ ⵏ ⵓⴷⴰⵡⵉ ⵏ ⵡⴻⵇⵔⴰⵃ ⴷⴻⴳ ⵜⵎⵓⵔⵜ ⵙ ⵍⴻⴽⵎⴰⵍ-ⵏⵏⴻⵙ, ⵜⴻⵔⵏⵓ ⵡⵉ ⴷ ⴰⵎⵎⴰⵙ ⵏ ⵒⵉⴻⵔⵔⴻ-ⴷ-ⵎⴰⵔⵉⴻ-ⵛⵓⵔⵉⴻ (ⴷⴻⴳ ⵡⴻⵙⴱⵉⵟⴰⵔ ⵏ ⵎⵓⵙⵜⴰⵒⵀⴰ ⴱⴰⵛⵀⴰ, ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ), ⵡⵉⵏ ⵏ ⴱⴰⴱ ⵍⵡⴰⴷ, ⵡⵉⵏ ⵏ ⵡⴻⵙⴱⵉⵟⴰⵔ ⵏ ⵡⴻⵀⵕⴰⵏ ⴷ ⵡⵉⵏ ⵏ ⵜⴱⴰⵜⴻⵏⵜ.
ⵎⴰⵙⵙⴰ ⴼⴻⵍⵍⴰⵀ ⵜⴻⵏⵏⴰ-ⴷ, ⵙⴻⴳ ⵢⵉⴷⵉⵙ ⵏⵉⴹⴻⵏ, ⴷⴰⴽⴽⴻⵏ ⵜⵉⵙⴷⴰⵡⵉⵢⵉⵏ ⵏ ⵜⴻⵙⵏⴰⵊⵢⴰ ⴷⴻⴳ ⵍⴻⵣⵣⴰⵢⴻⵔ ⵓⵔ ⴼⴽⵉⵏⵜ ⴰⵔⴰ ⴰⵣⴰⵍ ⴰⵎⴻⵇⵔⴰⵏ ⵉ ⵓⴷⴰⵡⵉ ⵏ ⵡⴻⵇⵔⴰⵃ, ⵢⴻⵔⵏⵓ ⵜⴻⵏⵏⴰ-ⴷ ⴷⴰⴽⴽⴻⵏ ⵜⵉⵎⵓⵙⵙⵏⵉⵡⵉⵏ ⵜⵉⵎⴰⵢⵏⵓⵜⵉⵏ ⵍⴰ ⵜⴻⵏⵜ-ⵉⴷ-ⵍⴻⵎⵎⴷⴻⵏ ⴽⴰⵏ ⵢⴻⵎⵙⵓⵊⵊⵉⵢⴻⵏ ⵎⵉ ⴰⴷ ⵜⵜⴻⴽⴽⵉⵏ ⴷⴻⴳ ⵢⵉⵙⴰⵔⴰⴳⴻⵏ.
ⵖⴻⴼ ⵡⴰⵢⴰ, ⵜⴳⴻⵔ-ⴷ ⵜⵉⵖⵔⵉ ⵉ ⵓⵙⵙⵉⴷⴻⴼ ⵏ ⵜⴻⵏⴳⴰ-ⴰ (ⵎⴰⴷⴷⴰ) ⴷⴻⴳ ⵜⴻⵣⵔⴰⵡⵉⵏ (ⴷⵉⵔⴰⵙⴰⵜ) ⵜⵉⵙⵏⴰⵊⵢⴰⵏⵉⵏ ⴰⴽⴽⴻⵏ ⴰⴷ ⵓⵖⴰⵍⴻⵏ ⵢⴻⵎⵙⵓⵊⵊⵉⵢⴻⵏ ⵙⵙⵏⴻⵏ ⵓⴳⴰⵔ ⴰⵎⴻⴽ ⴰⴷ ⴷ-ⵍⵀⵓⵏ ⵙ ⵓⴷⴰⵡⵉ ⵏ ⵡⴻⵇⵔⴰⵃ ⵖⴻⵔ ⵢⵉⵎⵓⴹⵉⵏⴻⵏ.
ⵉⵎⵙⵓⵊⵊⵉ ⴰⵎⴻⵙⵎⴰⵜⵓ (ⵄⴰⵎ) ⵢⴻⵙⵙⴻⴼⴽ ⴰⴷ ⵢⴻⵙⵄⵓ ⵜⵉⵎⵓⵙⵙⵏⵉⵡⵉⵏ ⵏ ⵍⵍⵙⴰⵙ ⴷⴻⴳ ⵓⴷⴰⵡⵉ ⵏ ⵡⴻⵇⵔⴰⵃ, ⴰⵛⴽⵓ ⴷ ⵏⴻⵜⵜⴰ ⴰⵢ ⴷ ⵉⵎⵙⵓⵊⵊⵉ ⴰⵎⴻⵣⵡⴰⵔⵓ ⵡⵓⵖⵓⵔ ⴰⵢ ⵢⴻⵜⵜⴻⴷⴷⵓ ⵓⵎⵉⴹⵉⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ.
ⵎⴰ ⴷ ⴰⵒⵕⵓⴼⵉⵙⵓⵔ ⴳⴻⵔⴰⵔⴷ ⵎⴻⵛ, ⵢⴻⵍⵍⴰⵏ ⴷ ⴰⵎⴰⵣⵣⴰⴳ ⴰⴼⵕⴻⴱⵙⵉⵙ ⴷⴻⴳ ⵜⴻⵙⵏⴰⵙⵓⵔⵜ (ⵟⵉⴱⴱ ⴰⵍ-ⴰⵄⵚⴰⴱ), ⵢⴻⴱⴷⴻⵔ-ⴷ ⵙⵉⵏ ⵏ ⵍⴻⵚⵏⴰⴼ ⵏ ⵡⴻⵇⵔⴰⵃ. ⵡⵉ ⴷ ⴰⵇⵔⴰⵃ ⵓⵎⵙⵉⴷ ⴰⵢⴷⴻⴳ ⴰⵎⵓⴹⵉⵏ ⵢⴻⵙⵙⴻⴼⴽ ⴰⴷ ⵢⴻⴷⴷⵓ ⵖⴻⵔ ⵡⴻⵙⴱⵉⵟⴰⵔ, ⴷ ⵡⴻⵇⵔⴰⵃ ⴷ-ⵢⴻⵜⵜⴻⴽⴽⴻⵏ ⵙⴻⴳ ⵡⴰⴹⴹⴰⵏⴻⵏ ⵢⴻⵣⴳⴰⵏ ⴰⵎ ⵡⴰⴹⴹⴰⵏ ⵏ ⵙⵙⴽⴻⵕ ⴷ ⵡⴰⴹⴹⴰⵏ ⵏ ⵍⴻⵎⴼⴰⵚⴻⵍ.
