ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵡⴰⴷ ⵙⵓⴼ: ⴰⵣⴰⵍ ⵏ 500 ⵏ ⵢⴻⵎⵜⵜⴻⴽⵉⵢⴻⵏ ⴷⴻⴳ ⵜⴼⴰⵙⴽⴰ ⵜⴰⵖⴻⵍⵏⴰⵡⵜ ⵜⵉⵙ 21 ⵏ ⵛⵛⵏⴰ ⴰⵖⵓⵔⴱⵉⵣ

ⵡⴰⴷ ⵙⵓⴼ– ⴰⵣⴰⵍ ⵏ 500 ⵏ ⵢⴻⵎⵜⵜⴻⴽⴽⵉⵢⴻⵏ ⴰⴷ ⵉⵃⴻⴷⵕⴻⵏ ⴷⴻⴳ ⵜⴼⴰⵙⴽⴰ ⵜⴰⵖⴻⵍⵏⴰⵡⵜ ⵜⵉⵙ 21 ⵏ ⵛⵛⵏⴰ ⴰⵖⵓⵔⴱⵉⵣ ⴰⵢ ⴷ-ⵢⴻⴱⴷⴰⵏ ⴰⵙⵙ ⵏ ⵍⴻⵜⵏⵉⵢⴻⵏ ⴷⴻⴳ ⵜⴻⵙⴷⴰⵡⵉⵜ ⵏ ⵓⵎⴻⵖⵔⵓⵙ ⵀⴰⵎⴰ ⵍⴰⴽⵀⴷⴰⵔ, ⴷⴻⴳ ⵡⴰⴷ ⵙⵓⴼ.

ⵜⴰⴼⵓⴳⵍⴰ (ⵃⴰⴼⵍ) ⵏ ⵡⴻⵔⵥⴰⵎ ⵇⴻⴷⴷⵎⴻⵏ-ⴷ ⴷⴻⴳ-ⵙ ⵢⵉⵡⴻⵜ ⵏ ⵜⵓⴼⵉⵕⴰⵜ ⵜⴰⵎⴻⵥⵢⴰⵏⵜ ⵓⵎⵉ ⵙⴻⵎⵎⴰⵏ « ⵜⵉⵙⵓⵜⵡⵉⵏ ⵏ ⵏⵡⴻⵎⴱⴻⵕ », ⵢⴻⵔⵏⵓ ⵜⴻⵙⵙⴽⴻⵏ-ⴷ ⵜⵓⴼⵉⵕⴰⵜ-ⴰ ⴰⵎⴻⴽ ⴰⵢ ⵉⵄⴻⴷⴷⴰ ⵓⵙⴰⴼⵓ ⵏ ⵜⴻⴳⵔⴰⵡⵍⴰ ⵏ ⵏⵡⴻⵎⴱⴻⵕ ⵉ ⵜⵙⵓⵜⵡⵉⵏ ⵏ ⴷⴻⴼⴼⵉⵔ ⵏ ⵓⵣⴰⵔⵓⴳ (ⵉⵙⵜⵉⵇⵍⴰⵍ) ⴷ ⵍⴻⴱⵏⵉ ⵏ ⵜⵎⵓⵔⵜ ⴰⵢⴷⴻⴳ ⵜⴰⵙⵓⵜⴰ ⵜⴰⵎⴻⵥⵢⴰⵏⵜ ⵜⵄⵓⵀⴻⴷ ⴰⴷ ⵜⴻⵃⵔⴻⵣ ⴰⵢⴻⵏ ⴰⵢ ⴰⵙ-ⴷ-ⵜⴻⴵⴵⴰ ⵜⵙⵓⵜⴰ ⵏ ⵏⵡⴻⵎⴱⴻⵕ, ⵢⴻⵔⵏⵓ ⴰⵢⴰ ⴷ « ⵍⴷⵣⴰⵢⴻⵔ ⴰⴷ ⵢⴻⴷⴷⵔⴻⵏ ⴷⴻⴳ ⵜⴷⵓⴽⵍⵉ ⴷ ⵡⴻⵔⴽⴰⴷ ».

ⵉⵎⵙⴻⴹⵔⵓ ⵏ ⵜⵓⴼⵉⵕⴰⵜ-ⴰ, ⵏⴰⴱⵉⵍ ⵎⴻⵙⵙⴰⵉ, ⴷ ⵓⵎⴻⵙⴽⴰⵔ-ⵏⵏⴻⵙ, ⴱⴰⵛⵀⵉⵔ ⵎⴰⵜⵔⴻⴷⵉ, ⵏⵏⴰⵏ-ⴰⵖ-ⴷ ⴷⴰⴽⴽⴻⵏ ⵜⴰⵎⴻⵣⴳⵓⵏⵜ-ⴰ ⵜⴰⵎⴻⵥⵢⴰⵏⵜ ⵜⴻⵙⵙⴽⴰⵏⴰⵢ-ⴷ « ⴰⵙⵙⴰⵖ ⵓⵊⵀⵉⴷ ⴷ ⵡⴻⵎⵜⴰⵡⴰ ⵎⴻⵖⵖⵔⴻⵏ ⵢⴻⵍⵍⴰⵏ ⴳⴰⵔ ⵜⵙⵓⵜⵡⵉⵏ ⵏ ⵏⵡⴻⵎⴱⴻⵕ ⴷ ⵜⵉⵏ ⵏ ⴷⴻⴼⴼⵉⵔ ⵓⵣⴰⵔⵓⴳ ⵢⴻⵍⵍⴰⵏ ⴷⴰⵖ ⴷ ⵣⵣⵓⵅ ⵢⴻⵔⵏⵓ ⴷ ⵜⴰⵎⴰⵏⴻⴳⵜ ⵏ ⵍⴷⵣⴰⵢⴻⵔ ».

ⴰⴷ ⵜⵜⴻⴽⴽⵉⵏⵜ ⴷⴻⴳ ⵜⴼⴰⵙⴽⴰ-ⴰ 30 ⵏ ⵜⵍⵉⵍⵉⵏ (ⵎⴰⴵⵎⵓⵄⴰ ⵚⴰⵡⵜⵉⵢⵢⴰ), ⵢⴰⵍ ⵢⵉⵡⴻⵜ ⴷⴻⴳ-ⵙⴻⵏⵜ ⴰⴷ ⵜⴻⵙⵄⵓ 16 ⵏ ⵢⴻⵎⵜⵜⴻⴽⴽⵉⵢⴻⵏ ⵙⴻⴳ 3 ⵏ ⵢⴻⵙⵡⵉⵔⴻⵏ (ⴰⵎⴻⵏⵣⵓ, ⴰⵍⴻⵎⵎⴰⵙ ⴷ ⵜⴻⵙⵏⴰⵡⵉⵜ) ⵙⴻⴳ 30 ⵏ ⵜⵡⵉⵍⴰⵢⵉⵏ ⵏ ⵜⵎⵓⵔⵜ.

ⵙ ⵡⴰⵢⴰ, ⴰⴷ ⴷ-ⵜⵉⵍⵉ ⵜⴻⵎⵙⵉⵣⵡⴻⵔⵜ ⵏ 4 ⵏ ⵡⵓⵙⵙⴰⵏ ⴳⴰⵔ ⵜⵍⵉⵍⵉⵏ ⵏ ⵛⵛⵏⴰ ⴰⵖⵓⵔⴱⵉⵣ (ⵙⴻⴳ 21 ⵖⴻⵔ 24 ⵎⴻⵖⵔⴻⵙ) ⵙⴰⴽⴽⵉⵏ ⴰⵍⴰ 3 ⵏ ⵜⵍⵉⵍⵉⵏ ⴰⴷ ⵉⵔⴻⴱⵃⴻⵏ ⵙⴻⴳ ⵢⴰⵍ ⴰⵙⵡⵉⵔ.

ⵜⴰⴷⵢⴰⵏⵜ-ⴰ ⵜⴰⴷⴻⵍⵙⴰⵏⵜ ⵜⴻⵍⵍⴰ-ⴷ ⵙ ⵓⴱⴻⵔⵔⵉⵃ ⵏ « ⵜⴻⵎⵙⴻⵜⵍⴻⵍⵜ (ⵜⴰⴹⴰⵎⵓⵏ), ⵜⴰⴳⵎⴰⵜ ⴷ ⵡⴻⵎⵄⴰⵡⴻⵏ », ⵢⴻⵔⵏⵓ ⵉⵙⵡⵉ-ⵏⵏⴻⵙ ⴷ ⵜⵓⴽⵛⵉ ⵏ ⵡⴰⵣⴰⵍ ⵏ ⵡⵓⵥⵡⵉⵔⴻⵏ ⴰⵢ ⵍⴰ ⴷ-ⵢⴻⵜⵜⴻⵏⴽⴰⵔⴻⵏ ⴷⴻⴳ ⵛⵛⵏⴰ ⴷⴻⴳ ⵢⵉⵖⴻⵔⴱⴰⵣⴻⵏ ⵢⴻⵎⴳⴻⵔⵔⴰⴷⴻⵏ, ⴰⵎ ⵡⴰⴽⴽⴻⵏ ⴰⴷ ⴷ-ⵢⴻⵙⴷⵓⵇⵇⴻⵙ ⴷⴰⵖ ⵡⴰⵢⴰ ⵜⵉⵎⴻⵜⵜⵉ ⴰⴽⴽⴻⵏ ⴰⴷ ⵜⴻⵙⵎⴻⵍ (ⵜⵓⵔⴰⵡⵡⵉⴵ) ⵛⵛⵏⴰ ⴰⵖⵓⵔⴱⵉⵣ.