Asebter amenzawi

Arẓam n teẓrigt tamezwarut n « Tefsut Tadelsant »

LEZZAYER TAMANEɣT– Tettwarẓem teẓrigt tamezwarut n « Tefsut Tadelsant » s usentel n « Azref i yedles d wesnulfu » ass n letniyen deg Lezzayer Tamaneɣt s yernu tella-d d tajmilt i waggag adzayri Tahar Ben Aicha (1925-2016).

Tafugla (ḥafl) n werẓam tella-d deg wemṛaḥ n Riadh El Feth yernu yerẓem deg-s uneɣlaf n yedles, Azeddine Mihoubi, yiwet n tzikkent n yedlisen ɣer yidis n uneɣlaf n ussileɣ (takwin), Mohamed Mebarki, d win yilemẓiyen d waddal, El Hadi Ould Ali.

Ugar n 50 n yimaẓragen (nacirin) ay yettekkan deg tedyant-a tadelsant aydeg d-rsen ama d idlisen n tsekla, ama d idlisen i yigerdan.

Ad d-ilint daɣ ssehṛat n tmedyezt aydeg ad ttekkin ama d imedyazen idzayriyen, ama d ibeṛṛaniyen.

Ad d-ilin daɣ yisaragen ayɣef ad d-ssiwlen ɣef tmedyezt, ungal deg Lezzayer d tsekla tamaziɣt.

Kra seg yisaragen-a ad d-ilin daɣ aydeg Wassini Laaredj, Amine Zaoui d Rabia Djelti ad d-qeddmen idlisen-nsen ineggura.

Ass n 24 Meɣres ad d-yili d ass n umezgun aydeg ad d-qeddmen tamezgunt n « Llaṣ » ay d-yettwagmen seg wedlis n Tahar Ouattr yernu yurar-itt-id umezgun amnaḍan n Suq Ahṛas.

Tadyant-a iga-tt Wenmalu Aɣelnaw n Yimaẓragen s wemɛawen d Udiwan n Riadh El Feth yernu ad tkemmel arma d 26 Meɣres.