Asebter amenzawi

Awal gar Yifalesṭiniyen d Ccṛeɛ Agraɣlan ɣef tejrimin n Isṛayil deg Ɣezza

RAMALLAH – Llant-d temliliyin seg wass n lḥedd yezrin gar yemḍebbren ifalesṭiniyen d yigensasen (mumattilin) n yemwekklen n Ccṛeɛ n Uɛaqeb Agraɣlan deg Ɛemman, ɣef wakken ay d-yenna uneɣlaf afalesṭini n tɣawsiwin n wezɣar, Riad Malki, ass n letniyen.

Timliliyin-a n 3 n wussan bdant-d ass n lḥedd yernu ttekkan deg-sent aṭas n tuddsiwin tifalesṭiniyin n tmetti taɣarimt, ɣef wakken ay d-yenna Mass Malki deg yiwen n welɣu (bayan) n tɣemsa.

Aneɣlaf afalesṭini n tɣawsiwin n wezɣar yenna-d dakken timliliyin-a rzant « tisertiyin yeffɣen i lqanun ay tesseqdac Isṛayil ».

ɣef leḥsab n uneɣlaf n tɣawsiwin n wezɣar, timliliyin-a ad d-ḥazent tijrimin n yiɣallen isṛayiliyen am lebni n tehras (mustawṭanat), aḥbas n Yifalesṭiniyen d tummɣiwin yettkemmilen ɣef weɣref afalesṭini d wakal-nnes deg tesfift n Ɣezza.

Ifalesṭiniyen ttekkan deg Ccṛeɛ n Uɛaqeb Agraɣlan seg wass n 26 Yennayer 2015, seg wasmi ay steɛṛfen s Falesṭin d awanak (dawla) ur yellin d tamaslaḍt deg Yeɣlanen Yeddukklen ass n 29 Nwembeṛ 2012.

Adabu Aɣelnaw Afalesṭini yessers accetki amatu ɣer Ccṛeɛ n Uɛaqeb Agraɣlan ɣef « tejrimin tisṛayiliyin » deg Yunyu yezrin, am wakken ay yefka yiwen n uṛabul ɣef tedyant-nni aydeg imharsen (mustawṭinin) isṛayiliyen sserɣen yiwen n wexxam n yiwet n twacult tafalesṭinit, d tadyant aydeg mmuten 3 n Yifalesṭiniyen gar-asen yiwen n ulufan.