ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵟⵟⴻⵔⴹⵇⴻⵏⵜ ⵍⴱⵓⵎⴱⴰⵜ ⴷⴻⴳ ⴱⵔⵓⵅⴻⵍⵍⴻⵙ ⵢⴻⵔⵏⵓ ⵏⵖⴰⵏⵜ ⴷ ⵊⴻⵔⵃⴻⵏⵜ ⴰⵟⴰⵙ ⵏ ⵎⴻⴷⴷⴻⵏ

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ, 22 ⵎⴻⵖⵔⴻⵙ 2016 – ⵟⵟⴻⵔⴹⵇⴻⵏⵜ ⴰⵛⵃⴰⵍ ⵏ ⵍⴱⵓⵎⴱⴰⵜ ⴰⵙⵙ ⵏ ⵜⵜⵍⴰⵜⴰ ⵜⴰⵚⴻⴱⵃⵉⵜ ⴷⴻⴳ ⵓⵏⴰⴼⴰⴳ ⴰⴳⵔⴰⵖⵍⴰⵏ ⵏ ⴱⵔⵓⵅⴻⵍⵍⴻⵙ ⴷ ⵢⵉⵡⴻⵜ ⵏ ⵜⴻⵖⵙⴻⵔⵜ ⵏ ⵓⵎⵉⵟⵔⵓ ⵉⵇⴻⵔⴱⴻⵏ ⵖⴻⵔ ⵜⵙⵓⴷⴰ ⵏ ⵜⴷⵓⴽⵍⵉ ⵜⵓⵕⵓⴼⵉⵜ, ⵢⴻⵔⵏⵓ ⵎⵎⵓⵜⴻⵏ ⴷ ⵊⴻⵔⵃⴻⵏ ⴰⵟⴰⵙ ⵏ ⵎⴻⴷⴷⴻⵏ, ⴰⵎ ⵡⴰⴽⴽⴻⵏ ⴰⵢ ⵢⴻⴵⴵⴰ ⵡⴰⵢⴰ ⴰⵟⴰⵙ ⵏ ⵜⵎⵓⵔⴰ ⵜⵓⵕⵓⴼⵉⵢⵉⵏ ⴰⴷ ⵙⴵⴻⵀⴷⴻⵏⵜ ⵉⵃⴻⵣⵣⵉⴱⴻⵏ-ⵏⵙⴻⵏⵜ ⵏ ⵜⵖⴻⵍⵍⵉⵙⵜ (ⴰⵎⵏ).

ⵖⴻⴼ ⵡⴰⴽⴽⴻⵏ ⴰⵢ ⴷ-ⵏⵏⴰⵏ ⵜⵜⴰⵡⵉⵍⴰⵜ ⵏ ⵢⵉⵙⴰⵍⴰⵏ ⵉⴱⵉⵍⵊⵉⴽⵉⵢⴻⵏ, ⵎⵎⵓⵜⴻⵏ, ⵎⴰ ⵓⵍⴰⵛ, 13 ⵏ ⵎⴻⴷⴷⴻⵏ, ⵢⴻⵔⵏⵓ ⵊⴻⵔⵃⴻⵏ 35 ⵏⵉⴹⴻⵏ ⴷⴻⴳ ⵙⵏⴰⵜ ⵏ ⵍⴱⵓⵎⴱⴰⵜ ⴰⵢ ⵜⴻⵟⵟⴻⵔⴹⵇⴻⵏ ⴷⴻⴳ ⵓⵏⴰⴼⴰⴳ ⴰⴳⵔⴰⵖⵍⴰⵏ ⵏ ⵣⴰⵠⴻⵏⵜⴻⵎ ⴷⴻⴳ ⴱⵔⵓⵅⴻⵍⵍⴻⵙ.

ⵎⵎⵓⵜⴻⵏ ⴷⴰⵖ ⵎⴻⴷⴷⴻⵏ ⴰⵎ ⵡⴰⴽⴽⴻⵏ ⴰⵢ ⵊⴻⵔⵃⴻⵏ ⵡⵉⵢⴰⴹ ⴷⴻⴳ ⵓⵟⵟⴻⵔⴹⴻⵇ ⴰⵢ ⴷ-ⵢⴻⵍⵍⴰⵏ ⴷⴻⴳ ⵓⵎⵉⵟⵔⵓ ⵏ ⵎⴰⴻⵍⴱⴻⴻⴽ, ⴷⴻⴳ ⵡⴻⴳⵎⴰⵎ (ⵃⴰⵢⵢ) ⵓⵕⵓⴼⵉ ⵏ ⴱⵔⵓⵅⴻⵍⵍⴻⵙ.

« ⵍⵍⴰⵏ ⵢⵉⵎⴻⵊⵔⵓⵃⴻⵏ. ⵍⵍⴰⵏ ⵢⵉⵎⴻⵜⵜⴰⵏⴻⵏ. ⵓⵔ ⵥⵔⵉⵖ ⴰⵛⵃⴰⵍ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵢⵉⵡⴻⵏ ⵏ ⵡⴻⵎⵙⴰⵍⵜⵓ (ⵛⵓⵔⵟⵉ) ⴷⴻⴼⴼⵉⵔ ⵓⵟⵟⴻⵔⴹⴻⵇ-ⵏⵏⵉ ⴰⵢ ⴷ-ⵢⴻⵍⵍⴰⵏ ⴷⴻⴳ ⵜⴻⵖⵙⴻⵔⵜ ⵏ ⵓⵎⵉⵟⵔⵓ.

ⴷⴻⴼⴼⵉⵔ ⵢⵉⵟⵟⴻⵔⴹⵉⵇⴻⵏ-ⴰ, ⵙⵙⵓⵍⵉⵏ ⵢⵉⴷⵓⴱⴰ ⵉⴱⵉⵍⵊⵉⴽⵉⵢⴻⵏ ⴰⵙⵡⵉⵔ ⵏ ⵓⵃⴰⴷⴻⵔ ⵎⴳⴰⵍ ⵔⵔⴻⴱⵔⴰⴱ ⵖⴻⵔ ⵜⵚⴻⴷⴷⴰⵔⵜ ⵜⵉⵙ 4 ⴷⴻⴳ ⵡⴰⴽⴽ ⵜⵉⵎⵏⴰⴹⵉⵏ ⵏ ⵜⵎⵓⵔⵜ, ⵢⴻⵔⵏⵓ ⴷ ⵡⴰ ⴰⵢ ⴷ ⴰⵙⵡⵉⵔ ⵓⵏⵏⵉⴳ ⴰⴽⴽ ⵢⴻⵍⵍⴰⵏ ⴷⴻⴳ ⵜⵎⵓⵔⵜ-ⴰ.

ⵉ ⵍⵎⴻⵏⴷ ⵏ ⵓⵃⴻⵣⵣⴻⴱ ⵙⴻⴳ ⵢⵉⴷⵉⵙ ⵏ ⵜⵖⴻⵍⵍⵉⵙⵜ, ⴰⴽⴽ ⵜⵉⵖⵙⴰⵔ ⵏ ⵓⵎⵉⵟⵔⵓ ⵢⴻⵍⵍⴰⵏ ⴷⴻⴳ ⴱⵔⵓⵅⴻⵍⵍⴻⵙ ⵜⵜⵡⴰⵎⴻⴷⵍⴻⵏⵜ ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵜⴻⵕⵎⵉⵙⵜ ⵏ ⵓⵎⴻⵙⵏⵉ ⴰⴳⴻⵔⵖⵉⵡⴰⵏ ⵏ ⴱⵔⵓⵅⴻⵍⵍⴻⵙ ⴷⴻⴳ ⵓⵙⴻⴱⵜⴻⵔ-ⵏⵏⴻⵙ ⵏ ⵜⵡⵉⵜⵜⴻⵔ.

ⵙⴻⴳ ⵢⵉⴷⵉⵙ ⵏⵉⴹⴻⵏ, ⵙⵙⵓⵜⵔⴻⵏ ⵢⵉⴷⵓⴱⴰ ⵉⴱⵉⵍⵊⵉⴽⵉⵢⴻⵏ ⵙⴻⴳ ⵢⵉⵎⴻⵣⴷⴰⵖⴻⵏ ⵏ ⵜⴻⵎⴷⵉⵏⵜ-ⴰ ⴰⴽⴽⴻⵏ ⴰⴷ ⵃⴻⴱⵙⴻⵏ ⵜⵉⴷⴷⵉⵜ. « ⵇⵇⵉⵎⴻⵜ ⴰⵏⴷⴰ ⵜⴻⵍⵍⴰⵎ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵡⴰⵎⵎⴰⵙ ⵏ ⵜⴻⵣⵖⵉⵏⵜ (ⴰⵣⵎⴰ) ⴷⴻⴳ ⵓⴷⴻⴳ ⵏ ⵜⵡⵉⵜⵜⴻⵔ, ⵢⴻⵔⵏⵓ ⵢⴻⵏⵏⴰ-ⴷ ⴷⴰⴽⴽⴻⵏ ⴰⴽⴽ ⵉⵎⴻⵙⵏⵉⵢⴻⵏ (ⵏⴰⵇⵍ) ⵉⵏⴰⴳⴷⵓⴷⴻⵏ ⴰⵎ ⵓⵎⵉⵟⵔⵓ ⴷ ⵜⵎⴰⵛⵉⵏⵉⵏ ⵜⵜⵡⴰⵎⴻⴷⵍⴻⵏ ⴰⵔⵎⴰ ⵉⴱⴰⵏ-ⴷ ⵕⵕⴰⵢ ⴰⵎⴰⵢⵏⵓ.