Asebter amenzawi

Ṭṭerḍqent lbumbat deg Bruxelles yernu nɣant d jerḥent aṭas n medden

LEZZAYER TAMANEɣT, 22 Meɣres 2016 – Ṭṭerḍqent acḥal n lbumbat ass n ttlata taṣebḥit deg unafag agraɣlan n Bruxelles d yiwet n teɣsert n umiṭru iqerben ɣer tsuda n Tdukli Tuṛufit, yernu mmuten d jerḥen aṭas n medden, am wakken ay yeǧǧa waya aṭas n tmura tuṛufiyin ad sǧehdent iḥezziben-nsent n tɣellist (amn).

ɣef wakken ay d-nnan ttawilat n yisalan ibiljikiyen, mmuten, ma ulac, 13 n medden, yernu jerḥen 35 niḍen deg snat n lbumbat ay teṭṭerḍqen deg unafag agraɣlan n Zaventem deg Bruxelles.

Mmuten daɣ medden am wakken ay jerḥen wiyaḍ deg uṭṭerḍeq ay d-yellan deg umiṭru n Maelbeek, deg wegmam (ḥayy) uṛufi n Bruxelles.

« Llan yimejruḥen. Llan yimettanen. Ur ẓriɣ acḥal », ɣef wakken ay d-yenna yiwen n wemsaltu (curṭi) deffir uṭṭerḍeq-nni ay d-yellan deg teɣsert n umiṭru.

Deffir yiṭṭerḍiqen-a, ssulin yiduba ibiljikiyen aswir n uḥader mgal rrebrab ɣer tṣeddart tis 4 deg wakk timnaḍin n tmurt, yernu d wa ay d aswir unnig akk yellan deg tmurt-a.

I lmend n uḥezzeb seg yidis n tɣellist, akk tiɣsar n umiṭru yellan deg Bruxelles ttwamedlent ɣef wakken ay d-tenna Teṛmist n Umesni Agerɣiwan n Bruxelles deg usebter-nnes n Twitter.

Seg yidis niḍen, ssutren yiduba ibiljikiyen seg yimezdaɣen n temdint-a akken ad ḥebsen tiddit. « Qqimet anda tellam », ɣef wakken ay d-yenna wammas n tezɣint (azma) deg udeg n Twitter, yernu yenna-d dakken akk imesniyen (naql) inagduden am umiṭru d tmacinin ttwamedlen arma iban-d ṛṛay amaynu.