Asebter amenzawi

85% seg waman n Yifalesṭiniyen ddaw leḥkem isṛayili

RAMALLAH- Ḍḍfen Yisṛayiliyen 85% seg teɣbula (mawarid) n waman ifalesṭiniyen, ɣef wakken ay d-yenna ass n lexmis uneɣlaf amenzu afalesṭini, Rami Hamdallah.

S waya, Hamdallah yetthem Isṛayil s werkaḍ n wakk imtawayen (ittifaqat) igraɣlanen imi ay d-tessemḥalleq yernu teḍḍef tiɣbula n waman tifalesṭiniyin.

Deg yiwen n welɣu (bayan) n tɣemsa, yenna-d Mass Hamdallah dakken Isṛayil tergel abrid i Yifalesṭiniyen akken ad ɣellten aman neɣ ad d-gen isenfaren i ussiweḍ n waman neɣ aɣram n waman yumsen, ladɣa deg « temnaḍt C » yeḍḍfen 64% seg yikalen ifalesṭiniyen n Ugemmaḍ Utrim.

ɣef leḥsab n Yemtawayen n Oslo n 1993 ay tga Tuddsa n Weslelli n Falesṭin d Isṛayil, Agemmaḍ Utrim yebḍa ɣef 3 n temnaḍin: tamnaḍt A, ddaw leḥkem afalesṭini, tamnaḍt B, ddaw leḥkem adeblan afalesṭini d leḥkem aserdasan isṛayili, d temnaḍt C, ddaw leḥkem ummid n Isṛayil.

Yenna-d uneɣlaf amenzu dakken assuder (istihlak) n waman deg Isṛayil yugar s 7 n tikkal assuder n waman n Yifalesṭiniyen, yernu talemmast n ussuder n waman n Yifalesṭiniyen ur tewwiḍ ɣer tlemmast ay d-tḥudd Tuddsa Tanmaḍalt n Tdawsa.

Nnig waya, iɛeyyen-d dakken deg Ɣezza, tezmer ad d-teḍru tezɣint talsant (azma insaniyya) ɣef lǧal n usseqdec n waman n ddaw tmurt d lexṣaṣ n waman n tissit ɣef lǧal n wammus n waman.