Asebter amenzawi

Yerẓem uneɣlaf n yedles amezgun amaynu n Mestɣanem

MESTɣANEM– Yerẓem uneɣlaf n yedles, Azzedine Mihoubi, ass n ssebt tameddit, amezgun amnaḍan (ǧihawi) n Si-El-Djilali-Benabdelhalim n Mestɣanem, yernu d wa ay d amezgun amezwaru n ṣṣenfa ay yettwebnan seg wasmi ay tewwi Ldzayer azarug (istiqlal).

« Amezgun-a d netta ay d asefk icebḥen akk ay nezmer ad t-nefk i wesnulfu adzayri d wayt umezgun ay yefkan asfel d ameqran akken ad as-fken i umezgun aɣelnaw, aɛṛab d wenmaḍal amkan ay yuklal », ɣef wakken ay d-iwekked uneɣlaf deg yiwet n tseɣrut (taṣriḥ) i tɣemsa deg yijifeṛ n tfugla n werẓam.

Yumar (yefṛeḥ) uneɣlaf s umezgun-a ay yettwebnan « s uqader n tegna (maɛayir) tigraɣlanen yernu s tmussni n ṣṣenɛa », yernu yenna-d dakken amezgun-a d aksab ameqran i umezgun aɣelnaw d temdint n Mestɣanem yellan d anrar yeǧǧuǧgen n umezgun adzayri, d win yesɛan udmawen yettwassnen, yeǧǧan amezgun ad yili dima yeḥdeṛ deg wenrar anaẓuran.

« Ulac ccek dakken amezgun-a ad d-yerr taṛwiḥt i umezgun deg Mestɣanem. Amezgun-a ad yili d tallunt ad d-igen abrid ama i yemsaduren (muḥtarifin), ama i yiḥeffaḍen, akken ad d-sseknen abdaɛ-nsen yernu ad d-sseknen ẓẓwara-nsen », ɣef wakken ay d-yenna uneɣlaf.

Nnig waya, yenna-d Azzedine Mihoubi dakken tafaska taɣelnawt n umezgun aḥeffaḍ adennit ad yennerni, acku amezgun-a yella-d d aɣerbaz n tidet i wayt umezgun ad yeddmen, azekka, asafu n umezgun asaduran.

Seg yidis niḍen, ixebber-d uneɣlaf dakken i lmend n umulli-nnes wis 50, deg 2017, Tafaska n umezgun aḥeffaḍ ad d-tqeddem ahil n tɣara ad yerren tajmilt i wid ay tt-id-yesbedden.