Asebter amenzawi

Timlilit n uɛeddi gar Ityupya d Ldzayer: taɣlamt taɣelnawt deg Addis Abeba

ADDIS-ABEBA– Tewweḍ teɣlamt taɣelnawt tadzayrit ass n lḥedd ɣer Addis-Abeba, tamaneɣt n Ityupya, akken ad turar timlilit n wass n ttlata mgal Ityupya deg usarir n Ydnekachew Tesema (ɣef s3:00 n tmeddit n Ldzayer) deg ukatar n wass wis 4 n wurar i uɛeddi ɣer Teqbuct n Tefriqt n Yeɣlanen n 2017 (tagrawt J).

Tamagla (wafd) tadzayrit tedda ddaw ṛṛay n uselway n Tfidiṛalit Tadzayrit n Tcirt n Uḍar, Mohamed Raouraoua, yernu yemmuger-itt, deg unafag n Addis-Abeba, wenmahal (safir) n Ldzayer deg Ityupya, Benlounes Rachid.

« D wa ay d assikel-inu (safar) amezwaru d teɣlamt taɣelnawt. Ssarameɣ kullec ad iɛeddi akken igerrez. Walaɣ dakken tennecṛah mliḥ ddeɛwa deg Ityupya yernu tagrawt tufa iman-nnes da. Deg wayen ay iyi-yerzan, aql-iyi wejdeɣ, ad nẓer kan d acu n ṛṛay ad yeddem wesleɣmay », ɣef wakken ay d-yenna umarir agraɣlan Sofiane Hanni (yetturaren deg FC Malines/Biljik).

Tasaɛet d wezgen ay ṛjan yimariren n teɣlamt taɣelnawt deg unafag akken ad faken tisekkirin n lviza, sakkin ulin ɣer usakal (ḥafila) ay ten-yewwin ɣer usensu n Sheraton Addis, anda ad qqimen arma d asmi ad uraren timlilit-nsen.

Tamagla tadzayrit ddan deg-s 56 n yemdanen gar-asen Amar Brahmia, d amaslaḍ (ɛuḍw) deg Useqqamu Ulimpi Adzayri, d Mohamed Mecherara, aselway n Tesbeddit n Tfidiṛalit Tadzayrit n Tcirt n Uḍar.

Imariren n Christian Gourcuff ad sleɣmun yiwet kan n tikkelt deg usarir n Addis-Abeba aydeg ad uraren timlilit. Asleɣmu-nsen ad d-yili ass n letniyen ɣef s5:00 n tmeddit s wakud n Addis-Abeba (s3:00 s wakud n Ldzayer).