Asebter amenzawi

Taɣlamt taɣelnawt n tcirḍart: « Nebɣa ad nkemmel axeddim d Gourcuff » (Taider)

ADDIS-ABEBA– Yenna-d ulemmas n wenrar agraɣlan adzayri n FC Bologna (Ṭṭalyan), ass n lḥedd tameddit, dakken taɣlamt taɣelnawt tadzayrit tebɣa ad tkemmel axeddim d Christian Gourcuff, yernu yenna-d dakken attixer n wesleɣmay-a (mudarrib) afṛensis d ddiɛaya kan.

« Werǧin d-nessawel ɣef uttixer la d wesleɣmay wala d yiwen yiwen niḍen. Ɣer-i, aya d ddiɛaya kan neɣ d asnulfu n kra n ttawilat n yisalan. Nekkni nebɣa Gourcuff acku la aɣ-yessedday ɣer sdat yal ass. Nufa iman-nneɣ yid-s yernu nebɣa ad nkemmel ad nxeddem allen », ɣef wakken ay d-yenna Taider cwiṭ kan deffir ma wwḍen-d yimariren n teɣlamt taɣelnawt ɣer Addis-Abeba anda ad uraren mgal Ityupya ass n ttlata deg ukatar n wass wis 4 n wurar i uɛeddi ɣer Teqbuct n Tefriqt n Yeɣlanen n 2017 ad d-yilin deg Gabun.

Kra n yeɣmisen idzayriyen nnan-d dakken « yezmer lḥal » ad yettixer wesleɣmay Gourcuff deffir temlilit mgal Ityupya, deg wakud aydeg taɣlamt tewwi-d amecwaṛ ifazen aydeg terbeḥ akk 3-nni n temliliyin ay turar akken ad tɛeddi ɣer Teqbuct n Tefriqt n Yeɣlanen n 2017.

« Mi ad nwali ɣer uxeddim ay la netteg yid-s, ad naf dima yella wegmuḍ mi ad nadef ɣer wenrar », ɣef wakken ay d-yerna Taider.

Taɣlamt taɣelnawt terbeḥ Ityupya deg usarir n Mustapha-Tchaker n Leblida s 7 ɣer 1 deg ukatar n wass wis 3 n wurar. Rrbeḥ-a ad yeǧǧ Idzayriyen ad sǧehden amkan-nsen amezwaru deg tegrawt s 9 n tenqiḍin, deg wakud aydeg Seychelles d Ityupya ḍḍfent amkan wis sin s 4 n tenqiḍin i yiwet, ma d Lesotho d taneggarut s uziṛu.