Asebter amenzawi
Tawilayt n Ldzayer: 200 n yimelyaṛen n yisantimen i ussegmi deg 2015-2016
LEZZAYER TAMANEɣT– Yenna-d wenmazul n uselway n wegraw n twilayt n Ldzayer, Mohamed Tahar Dilmi, ass n lḥedd, dakken agraw n twilayt iḥaz-d 200 n yimelyaṛen n yisantimen i weḥric n ussegmi i useggas n 2015-2016, yernu aḥric ameqran seg yedrimen-a ad yettwasseqdec deg uɛawed i 400 n yiɣerbazen n tmaneɣt, menɣir imaruden (mizaniyyat) n tɣiwanin.
Deg yiwen n wemyager n uqeyyem ay d-yellan gar uselway n Wegraw Aɣerfan n Twilayt n Ldzayer, Karim Bennour, d yinemhalen n ussegmi, n ussileɣ d tɣawsiwin n ddin d yiwaliyen inesmugal ɣef yimaruden ad yettunefken i yeḥricen-a, yenna-d Mass Dilmi dakken aḥric n ussegmi ad d-yesfaydi seg 200 n yimelyaṛen n yisantimen menɣir amarud n tɣiwanin, yernu aḥric ameqran seg umarud-a ad yettwaṣerref ɣef uṣeggem n yiɣerbazen n twilayt n Ldzayer d tiɣin n ttawil amaynu ay ḥwaǧen i useggas aɣurbiz amaynu.
Seg yidis-nnes, yenna-d yemkellef s umarud n Wegraw Aɣerfan n Twilayt n Ldzayer, Khaled Bellal, dakken aḥric n ussegmi n twilayt n Ldzayer yesfaydi-d seg umarud n 400 n yimelyaṛen n yisantimen seg 2010 ɣer 2016 i uṣeggem d utewwel n wakk iɣerbazen d lbenyanat niḍen yeqqnen ɣer weḥric-a am tneččiyin d ttawil n umesni (naql).
Deg wayen yerzan aṣeggem n yiɣerbazen n twilayt i useggas n 2016-2017, yenna-d yemkellef s tezrawin (dirasat) deg twilayt, Abdelmalek Zeidi, dakken « 1500 n temzal (ɛamaliyyat) n uṣeggem ay d-yellan deg 697 n yiɣerbazen imenza d 226 n yiɣerbazen ilemmasen d tesnawiyin deg twilayt n Ldzayer ».
