ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵜⴻⵡⵡⴻⴹ ⵜⴻⵖⵍⴰⵎⵜ ⵜⴰⵖⴻⵍⵏⴰⵡⵜ ⵏ ⵢⴻⵙⴽⵓⵜⵉⵢⴻⵏ ⵉⵏⵙⴻⵍⵎⴻⵏ ⵉⴷⵣⴰⵢⵔⵉⵢⴻⵏ ⵖⴻⵔ ⵜⵍⴻⵎⵙⴰⵏ
ⵜⵍⴻⵎⵙⴰⵏ– ⵜⴻⵡⵡⴻⴹ ⵜⴻⵖⵍⴰⵎⵜ (ⵇⴰⴼⵉⵍⴰ) ⵏ ⵢⴻⵙⴽⵓⵜⵉⵢⴻⵏ ⵉⵏⵙⴻⵍⵎⴻⵏ ⵉⴷⵣⴰⵢⵔⵉⵢⴻⵏ ⴰⵙⵙ ⵏ ⵍⴻⵜⵏⵉⵢⴻⵏ ⵖⴻⵔ ⵜⵡⵉⵍⴰⵢⵜ ⵏ ⵜⵍⴻⵎⵙⴰⵏ ⴰⵏⴷⴰ ⴰⴷ ⵜⴻⴳ ⵉⵔⵎⵓⴷⴻⵏ (ⵏⴰⵛⴰⵟⴰⵜ) ⵉⴷⴻⵍⵙⴰⵏⴻⵏ ⴷ ⵡⵉⴷ ⵏ ⵡⴻⵙⵃⵓⵍⴼⵓ ⵉ ⵍⴼⴰⵢⴷⴰ ⵏ ⵢⵉⴳⴻⵔⴷⴰⵏ ⵏ ⵜⵖⵉⵡⴰⵏⵉⵏ ⵏ ⵎⵙⵉⵔⴷⴰ ⴷ ⵎⴻⵕⵙⴰ ⴱⴻⵏ ⵎⵀⵉⴷⵉ ⴷ-ⵢⵓⵙⴰⵏ ⵖⴻⴼ ⵜⵍⵉⵙⴰ ⴳⴰⵔ ⵍⴷⵣⴰⵢⴻⵔ ⴷ ⵎⴻⵕⵕⵓⴽ.
ⵜⴰⵖⵍⴰⵎⵜ-ⴰ ⵍⵍⴰⵏ ⴷⴻⴳ-ⵙ 200 ⵏ ⵢⴻⵎⵜⴻⴽⴽⵉⵢⴻⵏ ⵙⴻⴳ ⵜⵡⵉⵍⴰⵢⵉⵏ ⵢⴻⵎⴳⴻⵔⵔⴰⴷⴻⵏ ⵏ ⵜⵎⵓⵔⵜ, ⵢⴻⵔⵏⵓ ⵜⴻⵡⵡⵉ-ⴷ ⵢⵉⴷ-ⵙ ⴰⵀⵉⵍ ⵏ ⵡⴻⵙⵃⵓⵍⴼⵓ ⴷ ⵣⵣⵀⵓ ⴰⴷ ⴷ-ⵜⴻⴳ ⴷⴷⴰⵡ ⵓⴱⴻⵔⵔⵉⵃ ⵏ « ⵍⴷⵣⴰⵢⴻⵔ ⴷ ⵢⴻⵎⵎⴰ-ⵜⵏⴻⵖ ».
ⴰⵣⵡⵓⵔ-ⴰ (ⵎⵓⴱⴰⴷⴰⵔⴰ) ⵜⴻⵍⵀⴰ-ⴷ ⵢⵉⴷ-ⵙ ⵜⵉⴷⴷⵓⴽⵍⴰ ⵏ ⵢⴻⵙⴽⵓⵜⵉⵢⴻⵏ ⵉⵇⴱⵓⵔⴻⵏ ⵙ ⵡⴻⵎⵄⴰⵡⴻⵏ ⴷ ⵜⵙⵓⴷⴰ (ⵎⵓ’ⴰⵙⵙⴰⵙⴰⵜ) ⵢⴻⵎⴳⴻⵔⵔⴰⴷⴻⵏ, ⴳⴰⵔ-ⴰⵙⴻⵏⵜ ⴰⵖⵍⵉⴼ ⵏ ⵢⵉⵍⴻⵎⵥⵉⵢⴻⵏ ⴷ ⵡⴰⴷⴷⴰⵍ, ⴰⵖⵍⵉⴼ ⵏ ⵓⵙⵙⴻⴳⵎⵉ ⴰⵖⴻⵍⵏⴰⵡ, ⴰⵖⵍⵉⴼ ⵏ ⵜⴻⵎⵙⴻⵜⵍⴻⵍⵜ (ⵜⴰⴹⴰⵎⵓⵏ) ⵜⴰⵖⴻⵍⵏⴰⵡⵜ ⴷ ⵜⴻⴷⵡⴰⵏⵜ ⵜⴰⴷⵣⴰⵢⵔⵉⵜ. ⵉⵙⵡⵉ ⵏ ⵡⴻⵣⵡⵓⵔ-ⴰ ⴷ ⴰⵣⵔⴰⵄ ⵏ ⵓⵙⵙⵉⵔⴻⵎ ⵖⴻⵔ ⵢⵉⵍⴻⵎⵥⵉⵢⴻⵏ ⵉⵣⴻⴷⵖⴻⵏ ⴷⴻⴳ ⵜⴻⵎⵏⴰⴹⵉⵏ ⵏ ⵜⵍⵉⵙⴰ ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵎⴰⵙⴰⵢ ⵏ ⵜⴻⵖⵍⴰⵎⵜ-ⴰ, ⴱⵉⵍⴰⵍ ⴰⵎⵔⴰⵏⴻ.
ⵢⴻⵏⵏⴰ-ⴷ ⴷⴰⵖ ⴷⴰⴽⴽⴻⵏ ⴰⵀⵉⵍ ⴰⵢ ⴷ-ⵢⴻⵜⵜⵡⴰⵀⴻⵢⵢⴰⵏ ⵉ ⵍⵎⴻⵏⴷ ⵏ ⵡⴰⵢⴰ ⵍⵍⴰⵏ ⴷⴻⴳ-ⵙ ⵢⴻⵔⵎⵓⴷⴻⵏ ⵉⴷⴻⵍⵙⴰⵏⴻⵏ, ⵉⵔⵎⵓⴷⴻⵏ ⵏ ⵣⵣⵀⵓ ⴷ ⵡⴰⴷⴷⴰⵍ ⴰⵢⴷⴻⴳ ⵍⵍⴰⵏ ⵢⴻⵎⵙⵉⵣⴻⵡⵔⴻⵏ, ⵓⵔⴰⵔⴻⵏ ⴷ ⵜⵏⴻⵎⵙⴰⵍ (ⵡⴰⵔⴰⵛⴰⵜ) ⵏ ⵜⵥⵓⵔⵉ ⴷ ⵜⴻⵏⴹⵉ (ⵚⵉⵏⴰⵄⴰ ⵜⴰⵇⵍⵉⴷⵉⵢⵢⴰ), ⵜⵉⵣⵉⴽⴽⵏⵉⵏ ⵏ ⵡⴻⵙⵃⵓⵍⴼⵓ ⵎⴳⴰⵍ ⵓⵙⵙⴻⵇⴷⴻⵛ ⵏ ⵜⴻⵀⵢⵓⴼⵉⵏ ⴷ ⵓⵙⵙⴻⵜⵜⵉ-ⵏⵙⴻⵏⵜ, ⴰⵙⵄⴻⴷⴷⵉ ⵏ ⵢⵉⴼⴻⵜⵔⴰⵡⴻⵏ ⴷ ⵓⵇⴻⴷⴷⴻⵎ ⵏ ⵜⴰⴳⴳⵉⵡⵉⵏ (ⵛⴰⵀⴰⴷⴰⵜ) ⵏ ⵢⴻⵎⵊⴰⵀⴷⴻⵏ ⵏ ⵜⴻⵎⵏⴰⴹⵜ-ⴰ.
ⵜⴰⵖⵍⴰⵎⵜ-ⴰ ⴰⴷ ⵜⴻⵇⵇⵉⵎ ⴷⴻⴳ ⵜⵡⵉⵍⴰⵢⵜ ⵏ ⵜⵍⴻⵎⵙⴰⵏ ⴰⵔⵎⴰ ⴷ ⴰⵙⵙ ⵏ ⵍⴻⵅⵎⵉⵙ ⵢⴻⵔⵏⵓ ⴰⴷ ⴷ-ⵜⴻⴽⴽ 7 ⵏ ⵜⵖⵉⵡⴰⵏⵉⵏ ⴷ-ⵢⵓⵙⴰⵏ ⵖⴻⴼ ⵜⵍⵉⵙⴰ, ⴳⴰⵔ-ⴰⵙⴻⵏⵜ ⵎⴻⵖⵏⴻⵢⵢⴰ, ⴱⵏⵉ ⴱⵓⵙⵄⵉⴷ, ⴱⴰⴱ ⵍⵄⴻⵙⵙⴰ ⴷ ⵍⴻⴱⵡⵉⵃⵉ, ⵖⴻⴼ ⵡⴰⴽⴽⴻⵏ ⴰⵢ ⴰⵖ-ⴷ-ⵏⵏⴰⵏ.
