ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵡⴰⵔⴳⵍⴰ: 16 ⵏ ⵢⵉⵖⴻⵔⵎⴰⵏ ⴰⴷ ⵢⴻⵜⵜⵡⴰⵚⴻⵏⵏⴼⴻⵏ ⴷⴻⴳ ⵡⵓⵎⵓⵖ ⵏ ⵢⵉⴷⴻⴳⴳⴻⵏ ⵉⵙⵏⴻⴷⵔⵉⵣⴰⵏⴻⵏ ⵉⵖⴻⵍⵏⴰⵡⴻⵏ

ⵡⴰⵔⴻⴳⵍⴰ– 16 ⵏ ⵢⵉⵖⴻⵔⵎⴰⵏ ⵏ ⵓⵏⴻⵥⵔⵓⴼ (ⵚⴰⵃⵔⴰ) ⵏ ⵜⵡⵉⵍⴰⵢⵜ ⵏ ⵡⴰⵔⴻⴳⵍⴰ ⴰⵢ ⴷ-ⵙⵙⵓⵎⵔⴻⵏ ⴰⴷ ⵜⴻⵏ-ⵔⵏⵓⵏ ⵖⴻⵔ ⵡⵓⵎⵓⵖ (ⵇⴰ’ⵉⵎⴰ) ⵏ 2009 ⵏ ⵓⵚⴻⵏⵏⴻⴼ ⵏ ⵡⴰⵢⵍⴰ ⴰⴷⴻⵍⵙⴰⵏ ⵏ ⵜⵡⵉⵍⴰⵢⵜ ⵏ ⵡⴰⵔⴻⴳⵍⴰ ⵙ ⵢⵉⵙⴻⵎ-ⵏⵙⴻⵏ ⴷ ⵉⴷⴻⴳⴳⴻⵏ ⵉⵙⵏⴻⴷⵔⵉⵣⴰⵏⴻⵏ ⴷ ⵢⴻⵏⵎⴻⵣⵔⵓⵢⴻⵏ ⵉⵖⴻⵍⵏⴰⵡⴻⵏ, ⵖⴻⴼ ⵡⴰⴽⴽⴻⵏ ⴰⵢ ⴰⵖ-ⴷ-ⵏⵏⴰⵏ, ⴰⵙⵙ ⵏ ⵍⴰⵕⴻⴱⵄⴰ ⵢⵉⵎⴰⵙⴰⵢⴻⵏ ⵏ ⵜⵎⴻⵀⵍⴰ ⵏ ⵢⴻⴷⵍⴻⵙ ⵏ ⵜⵡⵉⵍⴰⵢⵜ ⵏ ⵡⴰⵔⴻⴳⵍⴰ.

ⵉⵖⴻⵔⵎⴰⵏ-ⴰ ⵙⵄⴰⵏ ⴰⵣⴰⵍ ⴷ ⴰⵎⴻⵇⵔⴰⵏ ⴰⵎⴰ ⵙⴻⴳ ⵢⵉⴷⵉⵙ ⵏ ⵓⵎⴻⵣⵔⵓⵢ ⵏⴻⵖ ⵙⴻⴳ ⵡⵉⵏ ⵏ ⵜⵖⴻⵔⵎⴰ ⵢⴻⵔⵏⵓ ⵓⵙⴰⵏ-ⴷ ⴷⴻⴳ ⵜⴻⵎⵏⴰⴹⵉⵏ ⵏ ⵡⴰⴷ ⵎⵢⴰ ⴷ ⵡⴰⴷ ⵔⵉⵖ. ⵜⵜⵡⴻⴱⵏⴰⵏ ⵢⵉⵖⴻⵔⵎⴰⵏ-ⴰ ⴷⴻⴳ ⵜⴰⵍⵍⵉⵢⵉⵏ ⵢⴻⵎⴳⴻⵔⵔⴰⴷⴻⵏ ⵢⴻⵔⵏⵓ ⵎⴼⵓⵣⵔⴰⵄⴻⵏ ⵖⴻⴼ ⵜⵖⵉⵡⴰⵏⵉⵏ ⵏ ⵡⴰⵔⴻⴳⵍⴰ, ⵜⵉⵎⴰⵙⵉⵏ, ⵍⴻⵃⴵⵉⵔⴰ, ⵏⴳⵓⵙⴰ, ⵎⴳⴰⵔⵉⵏ ⴷ ⵙⵉⴷⵉ ⵅⵡⵉⵍⴻⴷ, ⴷ ⵜⵡⵉⵍⴰⵢⵜ ⵜⴰⵏⴻⵙⵎⵉⴳⴰⵍⵜ ⵏ ⵜⵓⴳⴳⵓⵔⵜ, ⵖⴻⴼ ⵡⴰⴽⴽⴻⵏ ⴰⵢ ⴰⵖ-ⴷ-ⵜⴻⵏⵏⴰ ⵎⴰⵙⵙⴰ ⵡⴰⵔⴷⴰ ⴽⵀⴻⵍⴼⴰⵧⵓⵉ, ⵜⴰⵎⴰⵙⴷⴰⴳⵜ (ⵎⵓⵀⴰⵏⴷⵉⵙⴰ ⵎⵉⵄⵎⴰⵔⵉⵢⵢⴰ) ⵏ ⵜⵎⴻⵀⵍⴰ ⵏ ⵢⴻⴷⵍⴻⵙ.

ⵉⵖⵔⴻⵎ ⵏ ⵎⴻⵙⵜⴰⵡⴰ (ⵜⵓⴳⴳⵓⵔⵜ) ⴷ ⵢⵉⵡⴻⵏ ⵙⴻⴳ ⵢⵉⵖⴻⵔⵎⴰⵏ ⴰⵢ ⴷ-ⵉⵊⴻⴱⴱⴷⴻⵏ ⵍⵡⴻⵍⵀⴰ ⵏ ⵢⵉⵏⴻⵔⵣⴰⴼⴻⵏ, ⴰⵎⴰ ⴷ ⴰⵔⵔⴰⵡ ⵏ ⵜⵎⵓⵔⵜ, ⴰⵎⴰ ⴷ ⵉⴱⴻⵕⵕⴰⵏⵉⵢⴻⵏ, ⵢⴻⵔⵏⵓ ⵢⴻⵜⵜⵡⴻⴱⵏⴰ ⴷⴻⴳ ⵍⵇⴻⵔⵏ ⵡⵉⵙ 15. ⵉⵖⴻⵔⵎⴰⵏ ⵏ ⴰⴷⵊⴰⴷⵊⴰ ⴷ ⵏⴳⵓⵙⴰ ⵢⴻⵍⵍⴰ ⴷⴻⴳ-ⵙⴻⵏ ⴷⴰⵖ ⵍⴰⵜⴻⵕ ⵏ ⵓⵄⴻⴷⴷⵉ ⵏ ⵡⴰⵛⵃⴰⵍ ⵏ ⵢⵉⵎⴻⵣⴷⴰⵖⴻⵏ ⴷ ⵜⴻⵡⵙⴰⵜⵉⵏ (ⵇⴰⴱⴰ’ⵉⵍ) ⴷⴻⴳ ⵜⴻⵎⵏⴰⴹⵜ-ⴰ ⵓⵇⴱⴻⵍ ⵍⵇⴻⵔⵏ ⵡⵉⵙ 11.

ⵉⴷⴻⴳⴳⴻⵏ-ⴰ ⵉⵙⵏⴻⴷⵔⵉⵣⴰⵏⴻⵏ ⵙⵄⴰⵏ ⴰⵣⴰⵍ ⴰⵏⵎⴻⵣⵔⵓⵢ ⴷ ⴰⵎⴻⵇⵔⴰⵏ, ⴷ ⴰⵛⵓ ⴽⴰⵏ, ⵎⴰ ⵇⵇⵉⵎⴻⵏ ⵓⵔ ⵜⵜⵡⴰⵚⴻⴳⴳⵎⴻⵏ, ⵣⴻⵎⵔⴻⵏ ⴰⴷ ⴷⴻⵔⵎⴻⵏ ⵢⴻⵔⵏⵓ ⴰⴷ ⵢⴻⵄⵔⴻⵇ ⵍⴰⵜⴻⵕ-ⵏⵙⴻⵏ.

ⵎⴻⵏⵖⵉⵔ ⵉⵖⵔⴻⵎ ⵏ ⵡⴰⵔⴻⴳⵍⴰ ⴰⵢ ⵢⴻⵜⵜⵡⴰⵚⴻⵏⵏⴼⴻⵏ ⴷ ⵜⵉⴳⴻⵎⵎⵉ ⴷⴻⴳ 2011 ⴷ ⵡⵉⵏ ⵏ ⵜⵉⵎⴰⵙⵉⵏ ⴰⵢ ⵢⴻⵜⵜⵡⴰⵚⴻⵏⵏⴼⴻⵏ ⴷⴻⴳ 2013, ⵓⵍⴰ ⴷ ⵢⵉⵡⴻⵏ ⵙⴻⴳ ⵢⵉⵖⴻⵔⵎⴰⵏ-ⴰ ⵏⵉⴹⴻⵏ ⵓⵔ ⵢⴻⵜⵜⵡⴰⵚⴻⴳⴳⴻⵎ, ⵢⴻⵔⵏⵓ ⵎⴰⵣⴰⵍ-ⵉⵜⴻⵏ ⵍⴰ ⴷⴻⵔⵔⵎⴻⵏ.

ⴷ ⴰⵛⵓ ⴽⴰⵏ, ⵙⴻⴳ ⵍⴻⵄⴹⵉⵍ ⴰⴷ ⵜⵜⵡⴰⵚⴻⵏⵏⴼⴻⵏ, ⵢⴻⵍⵍⴰ-ⴷ ⵡⵓⵙⵙⵉⵙ ⴷ ⴰⵎⴻⵇⵔⴰⵏ ⵉ ⵍⵎⴻⵏⴷ ⵏ ⵡⴻⵃⵔⴰⵣ-ⵏⵙⴻⵏ ⴰⴽⴽⴻⵏ ⴰⴷ ⴷ-ⵇⵇⵉⵎⴻⵏ ⴷ ⵉⵏⴰⴳⴰⵏ ⵏ ⵓⵎⴻⵣⵔⵓⵢ.

ⵖⴻⴼ ⵡⴰⵢⴰ, ⵍⴰ ⴷ-ⵜⵜⵉⵍⵉⵏⵜ ⵜⴻⴷⵢⴰⵏⵉⵏ ⵏ ⵡⴻⵙⵃⵓⵍⴼⵓ ⵏ ⵡⴻⴳⴷⵓⴷ ⵖⴻⴼ ⵡⴰⵣⴰⵍ ⵏ ⵜⴳⴻⵎⵎⵉ-ⴰ ⴷ ⵡⴰⵎⴻⴽ ⴰⴷ ⵜⴻⵜⵜⵡⴰⵃⵔⴻⵣ, ⵢⴻⵔⵏⵓ ⵢⴻⵜⵜⵉⵍⵉ-ⴷ ⵡⴰⵢⴰ ⵙ ⵡⴻⵎⵄⴰⵡⴻⵏ ⴷ ⵜⵉⴷⴷⵓⴽⵍⵉⵡⵉⵏ, ⵉⵎⴰⵙⴷⴰⴳⴻⵏ ⴷ ⵢⵉⵎⴻⵙⵏⴻⴷⵔⵉⵣⴻⵏ.