ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴷ ⵉⵖⴻⵔⴱⴰⵣⴻⵏ ⵏ ⵢⵉⵙⴻⵍⵎⴰⴷⴻⵏ ⴰⵢ ⵢⴻⵙⵙⴻⴼⴽⴻⵏ ⴰⴷ ⴷ-ⵔⵔⴻⵏ ⴰⵣⴰⵍ ⵉ ⵓⵙⴻⵍⵎⴰⴷ (ⴰⵏⵎⴰⵍⵓ)

ⵄⵉⵏ ⴷⴷⴻⴼⵍⴰ– ⵢⴻⵏⵏⴰ-ⴷ ⵓⵙⴻⵎⵢⵓⴷⴷⴰⵙ ⵏ ⵡⴻⵏⵎⴰⵍⵓ ⴰⵖⴻⵍⵏⴰⵡ ⴰⴼⵓⵍⵎⴰⵏ ⵏ ⵢⵉⵙⴻⵍⵎⴰⴷⴻⵏ ⵏ ⵡⴻⵍⵎⵓⴷ ⴰⵍⴻⵎⵎⴰⵙ ⴷ ⵡⴻⵜⵡⵉⵍⴰⵏ (ⵙⵏⴰⵒⴻⵙⵜ), ⵎⴻⵣⵉⴰⵏⴻ ⵎⴻⵔⵉⴰⵏⴻ, ⴰⵙⵙ ⵏ ⵜⵜⵍⴰⵜⴰ ⴷⴻⴳ ⵄⵉⵏ ⴷⴷⴻⴼⵍⴰ, ⴷⴰⴽⴽⴻⵏ ⵉⵔⵉⵔⵉ ⵏ ⵡⴰⵣⴰⵍ ⵉ ⵓⵙⴻⵍⵎⴰⴷ ⴷ ⵛⵛⵖⴻⵍ ⵏ ⵢⵉⵖⴻⵔⴱⴰⵣⴻⵏ ⵏ ⵢⵉⵙⴻⵍⵎⴰⴷⴻⵏ.

« ⴷ ⴰⵖⴻⵔⴱⴰⵣ ⵏ ⵢⵉⵙⴻⵍⵎⴰⴷⴻⵏ ⴰⵢ ⴷ-ⵢⴻⵙⵙⵓⴼⴼⵓⵖⴻⵏ ⵡⵉⴷ ⴰⴷ ⵢⵓⵖⴰⵍⴻⵏ ⴷ ⵉⵙⴻⵍⵎⴰⴷⴻⵏ, ⵎⴰⵛⵉ ⴷ ⵜⴰⵙⴷⴰⵡⵉⵜ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⵎⴻⵔⵉⴰⵏⴻ ⴷⴻⴳ ⵢⵉⵡⴻⵏ ⵏ ⵡⴻⵎⵢⴰⴳⴻⵔ ⴷ ⵜⵖⴻⵎⵙⴰ ⴰⵢ ⴷ-ⵢⴻⵍⵍⴰⵏ ⴷⴻⴳ ⵜⴳⴰⵔⴰ ⵏ ⵡⴰⵙⵙ ⵡⵉⵙ ⵙⵉⵏ ⵏ ⵡⴻⵙⵡⵉⵔ ⴰⵖⴻⵍⵏⴰⵡ ⵏ ⵡⴻⵏⵎⴰⵍⵓ (ⵏⴰⵇⴰⴱⴰ) ⵏ ⵙⵏⴰⵒⴻⵙⵜ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴷⴰⴽⴽⴻⵏ ⴰⵃⴱⴰⵙ ⵏ ⵓⵖⴻⵔⴱⴰⵣ ⵏ ⵢⵉⵙⴻⵍⵎⴰⴷⴻⵏ « ⵉⴹⵓⵔⵔ » ⴰⵃⵔⵉⵛ ⵏ ⵓⵙⵙⴻⵍⵎⴻⴷ.

ⵖⴻⴼ ⵍⴻⵃⵙⴰⴱ-ⵏⵏⴻⵙ, ⵜⴰⵎⵓⵙⵙⵏⵉ ⴰⵢ ⵢⴻⵙⵄⴰ ⵡⴻⵎⴷⴰⵏ ⵢⴻⴱⵖⴰⵏ ⴰⴷ ⵢⴻⵅⴷⴻⵎ ⴷ ⴰⵙⴻⵍⵎⴰⴷ ⵓⵔ ⴷ-ⵜⴻⵜⵜⵇⴰⵎ. « ⵍⵍⴰⵏ ⵢⵉⴷⵉⵙⴰⵏ ⵢⴻⵇⵇⵏⴻⵏ ⵖⴻⵔ ⵜⴻⵙⵏⵉⵎⴰⵏⵜ ⵏ ⵜⵙⴻⴳⵎⵉⵜ ⵓⵔ ⵢⴻⵣⵎⵉⵔⴻⵏ ⴰⴷ ⵜⵜⵡⴰⵙⵙⵏⴻⵏ ⴰⵔⵎⴰ ⵢⴻⵍⵎⴻⴷ-ⵉⵜⴻⵏ ⵡⴻⵎⴷⴰⵏ ⴷⴻⴳ ⵓⵖⴻⵔⴱⴰⵣ ⵏⴻⵖ ⴷⴻⴳ ⴽⵔⴰ ⵏ ⵓⵙⵓⴷⵓ ⵢⴻⵎⵎⵓⵣⵣⴳⴻⵏ (ⵎⵓⵜⴰⵅⴰⵚⵚⵉⵚ) », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ.

« ⵎⵉ ⴰⴷ ⵢⴻⴱⵖⵓ ⴰⴷ ⵢⵉⵍⵉ ⵢⵉⵡⴻⵏ ⴷ ⵉⵎⵙⵓⵊⵊⵉ ⵏⴻⵖ ⴷ ⴰⵊⴻⵏⵢⵓⵕ, ⵢⴻⵙⵙⴻⴼⴽ ⴰⴷ ⴰⵙ-ⴷ-ⵢⴻⵜⵜⵡⴰⵙⵙⵓⵜⴻⵔ ⵓⴳⴻⵔⴷⴰⵙ (ⵛⴰⵀⴰⴷⴰ) ⴰⴷ ⴷ-ⵢⴻⵙⵙⴻⴽⵏⴻⵏ ⴷⴰⴽⴽⴻⵏ ⵢⴻⴹⴼⴻⵔ ⴰⵙⵙⵉⵍⴻⵖ (ⵜⴰⴽⵡⵉⵏ) ⴷⴻⴳ ⵡⴻⵏⵔⴰⵔ-ⵏⵏⵉ, ⵎⴰⵛⴰ ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⴰⵙⵙⴻⵍⵎⴻⴷ, ⵎⴰⵛⵉ ⴰⴽⴽⴰ ⴰⵢ ⵍⴰ ⵜⵜⴻⴷⴷⵓⵏ ⵍⴻⵛⵖⴰⵍ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵙ ⵡⴻⵙⵃⵉⵙⵙⴻⴼ.

ⵢⴻⵔⵏⴰ-ⴷ ⵎⴰⵙⵙ ⵎⴻⵔⵉⴰⵏⴻ ⴷⴰⴽⴽⴻⵏ ⴰⵖⴻⵔⴱⴰⵣ ⴰⵖⴻⵍⵏⴰⵡ ⵉⵎⵉⵏⴻⴳ « ⵢⴻⵜⵜⴰⴽⴼ-ⴷ ⴰⵍⴰ 10% ⵙⴻⴳ ⵓⵊⴻⵎⵎⴰⵍ ⵏ ⵢⵉⵙⴻⵍⵎⴰⴷⴻⵏ », ⴰⵎ ⵡⴰⴽⴽⴻⵏ ⴰⵢ ⴷ-ⵉⵃⴻⵜⵜⴻⵜ ⴷⴰⴽⴽⴻⵏ ⵢⴻⵙⵙⴻⴼⴽ ⴰⴷ ⴷ-ⵢⵉⵍⵉ ⵓⵇⴻⵢⵢⴻⵎ ⵏ ⵡⴰⵢⴻⵏ ⴰⵢ ⵢⴻⵃⵡⴰⴵ ⵡⴻⵃⵔⵉⵛ-ⴰ ⵙⴻⴳ-ⴰ ⵖⴻⵔ 2035.

ⵖⴻⴼ ⵍⴻⵃⵙⴰⴱ-ⵏⵏⴻⵙ, ⴰⵙⵙⵉⵍⴻⵖ ⵢⴻⵍⵀⴰⵏ ⵏ ⵓⵙⴻⵍⵎⴰⴷ ⴷ ⴰⵢⴻⵏ ⵢⴻⵙⵄⴰⵏ ⴰⵣⴰⵍ ⴰⵛⴽⵓ ⴷ ⴰⵢⴰ ⴰⴷ ⵢⴻⴵⴵⴻⵏ ⴰⴳⵔⵓⴷ ⵉⵍⴻⵎⵎⴷⴻⵏ (ⴰⴱⴰⵍⵎⵓⴷ) ⴰⴷ ⵉⵇⴰⴱⴻⵍ ⴰⵣⴻⴽⴽⴰ ⴰⴽⴽⴻⵏ ⵉⵡⴰⵜⴰ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴷⴰⴽⴽⴻⵏ ⵜⴰⴷⴰⵎⵙⴰ ⵢⴻⵍⵀⴰⵏ ⴷ ⵜⵉⵏ ⵢⴻⵜⵜⵡⴻⴱⵏⴰⵏ ⵖⴻⴼ ⵜⵎⵓⵙⵙⵏⵉ ⴷ ⵕⴰⵙⴻⵍⵎⴰⵍ ⵏ ⵢⴻⵎⴷⴰⵏⴻⵏ.