Asebter amenzawi

Yaman: mmuten ma ulac 60 n yemdanen deg yimenɣi

ṢENƐA– Mmuten ma ulac 45 n yimenɣan (muqatilin) n yiɣallen ibedden d unabaḍ ayamani d 15 n yiɣewwaɣen iḥutiyen seg wass n ttlata ar ass-a deg yimenɣiyen ay la d-yettilin deg ugafa-utrim n Yaman, ɣef wakken ay d-nnan, ass n lexmis, yimasayen (mas’ulin) idzayriyen. Yebda-d yimenɣi mi ddan yiɣallen yeddan d uselway Abd Rabbo Mansour Hadi seg usagen (mina’) n Midi d-yusan ɣef Yilel Azewwaɣ ɣer temdint n Midi ay d-iqerben ɣer-s. D aya ay yeǧǧan iɣewwaɣen (mutamarridin) iḥutiyen n wegmuḍ d wenẓul n temdint-a ad d-rren tiyita, yernu nɣan 45 n yiserdasen n unabaḍ (ḥukuma) n uselway Abd Rabbo Mansour Hadi, gar-asen 20 n yiserdasen yettwenɣen ass n laṛebɛa tameddit, ɣef wakken ay d-nnan yimasayen iserdasanen. « D ta ay d tanegzart (maǧzara) tameqrant akk ay d-yellan » mgal yiɣallen yeddan d uselway Hadi, ɣef wakken ay d-yenna yiwen n umasay aserdasan, am wakken ay d-yenna dakken iɣewwaɣen d yemsisan-nsen (ḥulafa’) ssemḥallqen-d i yiɣallen n Hadi deg yiwet n temzelt ay d-yusan war ma bnan fell-as. Iɣallen yeddan d uselway Hadi ur ten-id-ɛawnen yisafagen n temsisit taɛṛabt la yettnaɣen mgal yiɣallen iḥutiyen ɣer yidis n unabaḍ n Hadi, ɣef wakken ay d-yesḥassef umasay-a aserdasan ayamani. Iɣewwaɣen sṛuḥen, ma ulac, 15 n yimenɣan, ɣef leḥsab n umasay-a. Amgaru (ḥarb) ay inekren aseggas aya, yegla s 6.200 n tmeddurin am wakken ay d-llan 30.000 d imejraḥ, ɣef wakken ay d-tenna Tuddsa Tanmaḍalt n Tdawsa ay d-yernan dakken 21 n yimelyunen n yiɣarimen (madaniyyin) (82% n yimezdaɣen n tmurt) ay yeḥwaǧen lemɛawna, gar-asen azal n 2,5 n yimelyunen seg wid irewlen seg yexxamen-nsen.