Asebter amenzawi

Yenna-d Mass Hadjar yessefk ad yettwassejhed wemciweṛ d yenmula

LEZZAYER TAMANEɣT – Yenna-d uneɣlaf n welmud imineg d unadi ussnan, Tahar Hadjar, ass n ssebt deg Lezzayer Tamaneɣt, dakken assejhed n wawal d wemciweṛ d yenmula (naqabat) d ayen yesɛan azal i uferru n temsal yerzan aḥric-a.

Deg yiwet n tseɣrut (taṣriḥ) ay d-iga i tɣemsa deffir yiwen n wemyager d yigensasen (mumattilin) n yenmula n weḥric-a, yenna-d Mass Hadjar dakken amyager-a yella-d d aḥric seg tiddit ay d-yewwi weɣlif-nnes akken « ad yessejhed awal gar sin-a n yeḥricen », am wakken ay d-yenna dakken « ixebber icriken inmettiyen ɣef tɣawsiwin timaynutin ay d-yellan deg weḥric, ladɣa deg wayen yerzan awehhi d ussiggez n yinelmaden ay d-yewwin lbak » d ussenqes n yifurka ad yefren unelmad seg 10 ɣer 5 deg tewriqt-nni n wefran n wayen ad yezrew deg tesdawit.

Yenna-d daɣ uneɣlaf dakken yesla i « yiɣeblan » ay d-bedren yenmula, am wakken ay d-yenna dakken iɣeblan-a d « uṣwiben », ladɣa win n Wenmalu Aɣelnaw n Yemnadiyen Imeɣlalen yeqqnen ɣer uẓayer (waḍɛ).

Ixebber-d Mass Hadjar, seg yidis niḍen, dakken aɣlif-nnes ad d-yessidef azal n 3.000 n yiselmaden i useggas asdawan n 2016-2017.

Uqbel aya, yemmuger Mass Hadjar, taṣebḥit n wass-nni, kra n tuddsiwin n yinelmaden deg ukatar n temliliyin ay yennummen ttilint-d gar weɣlif d yecriken inmettiyen.