ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵙⵍⴻⵍⵍⵉⵏ-ⴷ ⵢⵉⵖⴰⵍⵍⴻⵏ ⵉⵄⵉⵔⴰⵇⵉⵢⴻⵏ ⵓⴳⴰⵔ ⵏ 1000 ⵏ ⵢⵉⵎⴻⵃⴱⴰⵙ ⵙⴻⴳ ⵢⵉⴼⴰⵙⵙⴻⵏ ⵏ ⴷⴰⵄⴻⵛ

ⴱⴻⵖⴷⴰⴷ – ⵙⵙⴰⵡⴹⴻⵏ ⵢⵉⵖⴰⵍⵍⴻⵏ ⵉⵄⵉⵔⴰⵇⵉⵢⴻⵏ ⴰⴷ ⴷ-ⵙⵍⴻⵍⵍⵉⵏ ⴰⵟⴰⵙ ⵏ ⵢⵉⵎⴻⵃⴱⴰⵙ ⵙⴻⴳ ⵢⵉⵡⴻⵏ ⵏ ⵍⵃⴻⴱⵙ ⵏ ⴷⴷⴰⵡ ⵜⵎⵓⵔⵜ ⴰⵢ ⵜⴻⴹⴹⴻⴼ ⵜⴻⴳⵔⴰⵡⵜ ⵜⴰⵔⴻⴱⵔⴰⴱⵜ ⵉⵙⴻⵎⵎⴰⵏ ⵉ ⵢⵉⵎⴰⵏ-ⵏⵏⴻⵙ « ⴰⵡⴰⵏⴰⴽ ⵉⵙⵍⴰⵎⴰⵏ » (ⴷⴰⵄⴻⵛ), ⴷⴻⴳ ⵢⵉⵡⴻⵏ ⵏ ⵢⵉⵎⴻⵏⵖⵉ ⵉ ⵜⵓⴹⴹⴼⴰ ⵏ ⵢⵉⵡⴻⵜ ⵏ ⵜⴻⵎⴷⵉⵏⵜ ⴷⴻⴳ ⵓⵜⴰⵔⴰⵎ (ⵖⴰⵔⴱ) ⵏ ⵜⵎⵓⵔⵜ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵏⵏⴰⵏ ⴽⵔⴰ ⵏ ⵢⵉⵎⴰⵙⴰⵢⴻⵏ (ⵎⴰⵙ’ⵓⵍⵉⵏ) ⴰⵙⵙ ⵏ ⵙⵙⴻⴱⵜ.

ⵉⵖⴰⵍⵍⴻⵏ ⵏ ⵜⵖⴻⵍⵍⵉⵙⵜ (ⴰⵎⵏ) ⵙⵙⴰⵡⴹⴻⵏ ⴰⴷ ⴹⴹⴼⴻⵏ ⴰⵃⵔⵉⵛ ⵙⴻⴳ ⵜⴻⵎⴷⵉⵏⵜ ⵏ ⵀⵉⵜ, ⵢⵉⵡⴻⵜ ⵙⴻⴳ ⵜⴻⵎⴷⵉⵏⵉⵏ ⵜⵉⵎⴻⵇⵔⴰⵏⵉⵏ ⵏ ⵜⵏⴻⴱⴹⵉⵜ ⵏ ⴰⵍ-ⴰⵏⴱⴰⵔ ⴰⵢ ⵎⴰⵣⴰⵍ ⴹⴹⴼⴻⵏ-ⵜⵜ ⵢⵉⵔⴻⴱⵔⴰⴱⴻⵏ ⵏ ⴷⴰⵄⴻⵛ.

« ⵎⵉ ⵍⵍⴰⵏ ⵜⵜⴻⴷⴷⵓⵏ ⵢⵉⵖⴰⵍⵍⴻⵏ ⵏ ⵜⵖⴻⵍⵍⵉⵙⵜ ⵖⴻⵔ ⵙⴷⴰⵜ ⴷⴻⴳ ⵛⵛⵖⴻⵍ-ⵏⵙⴻⵏ ⵏ ⵡⴻⵙⵍⴻⵍⵍⵉ ⴷ ⵓⵙⵙⵉⵣⴷⴻⴳ ⵏ ⵜⴻⵎⴷⵉⵏⵜ ⵏ ⵀⵉⵜ, ⵓⴼⴰⵏ-ⴷ ⵢⵉⵡⴻⵏ ⵏ ⵍⵃⴻⴱⵙ ⴷ ⴰⵎⴻⵇⵔⴰⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ ⵡⴻⴽⵏⴰⵏⴻⵔ (ⵄⴰⵇⵉⴷ) ⴼⴰⴷⵀⴻⵍ ⴰⵍ-ⵏⵉⵎⵔⴰⵡⵉ. « ⵍⵃⴻⴱⵙ-ⴰ ⵢⵓⵙⴰ-ⴷ ⴷⴷⴰⵡ ⵜⵎⵓⵔⵜ », ⵍⵍⴰⵏ ⴷⴻⴳ-ⵙ 1.500 ⵏ ⵢⴻⵎⴷⴰⵏⴻⵏ ⵢⴻⵔⵏⵓ ⵙⵍⴻⵍⵍⵉⵏ-ⵜⴻⵏ-ⵉⴷ ⵢⵉⵖⴰⵍⵍⴻⵏ ⵏ ⵜⵖⴻⵍⵍⵉⵙⵜ.

ⵎⴰⵍⴰⵍⵍⴰⵀ ⴰⵍ-ⵧⴱⴻⵉⴷⵉ ⵢⴻⵍⵍⴰⵏ ⴷ ⴰⵎⴰⵙⴰⵢ ⴷⴻⴳ ⵜⵏⴻⴱⴹⵉⵜ (ⵎⵓⵇⴰⵟⴰⵄⴰ) ⵏ ⴰⵍ-ⴰⵏⴱⴰⵔ, ⵢⴻⵏⵏⴰ-ⴷ ⴷⴰⵖ ⴷⴰⴽⴽⴻⵏ ⴰⵣⴰⵍ ⵏ 1.500 ⵏ ⵢⵉⵎⴻⵃⴱⴰⵙ ⴰⵢ ⴷ-ⵢⴻⵜⵜⵡⴰⵙⵍⴻⵍⵍⵉⵏ ⵙⴻⴳ ⵍⵃⴻⴱⵙ-ⵏⵏⵉ, ⵢⴻⵔⵏⵓ ⴰⵎⵓⵔ ⴰⵎⴻⵇⵔⴰⵏ ⵙⴻⴳ-ⵙⴻⵏ ⴷ ⵉⵖⴰⵔⵉⵎⴻⵏ (ⵎⴰⴷⴰⵏⵉⵢⵢⵉⵏ).

ⵎⵧⵓⵀⴰⵏⵏⴰⴷ ⴰⵍ-ⴷⵧⵓⵍⴻⵉⵎⵉ, ⴷ ⴰⵎⴰⵙⴰⵢ ⴷ-ⵢⴻⵍⵀⴰⵏ ⵙ ⵜⴻⵎⵏⴰⴹⵜ ⵏ ⵀⵉⵜ, ⵉⵡⴻⴽⴽⴻⴷ-ⴷ ⴷⴰⴽⴽⴻⵏ ⵓⴼⴰⵏ-ⴷ ⵢⵉⵡⴻⵏ ⵏ « ⵍⵃⴻⴱⵙ ⴷ ⴰⵎⴻⵇⵔⴰⵏ » ⴷⴻⴳ ⵜⴻⵎⴷⵉⵏⵜ-ⴰ, ⵎⴰⵛⴰ ⵓⵔ ⴷ-ⵢⴻⴱⴷⵉⵔ ⴰⵏⴻⵛⵜ ⵏ ⵎⴻⴷⴷⴻⵏ ⴰⵢ ⵢⴻⵍⵍⴰⵏ ⵜⵜⵡⴰⵃⴻⴱⵙⴻⵏ ⴷⴻⴳ-ⵙ.

ⵜⴰⴳⵔⴰⵡⵜ ⵜⴰⵔⴻⴱⵔⴰⴱⵜ ⴰⵢ ⵉⵙⴻⵎⵎⴰⵏ ⵉ ⵢⵉⵎⴰⵏ-ⵏⵏⴻⵙ « ⴰⵡⴰⵏⴰⴽ ⵉⵙⵍⴰⵎⴰⵏ » ⵜⴻⵙⵙⴰⵡⴻⴹ ⴰⴷ ⵜⴻⴹⴹⴻⴼ ⵉⵃⵔⵉⵛⴻⵏ ⴷ ⵉⵎⴻⵇⵔⴰⵏⴻⵏ ⵙⴻⴳ ⵡⴰⴽⴰⵍ ⴷ-ⵢⵓⵙⴰⵏ ⴷⴻⴳ ⵓⴳⴰⴼⴰ (ⵛⴰⵎⴰⵍ) ⴷ ⵓⵜⴰⵔⴰⵎ ⵏ ⴱⴻⵖⴷⴰⴷ ⴷⴻⴳ 2014, ⵎⴰⵛⴰ ⵉⵖⴰⵍⵍⴻⵏ ⵏ ⵜⵖⴻⵍⵍⵉⵙⵜ ⵙⵙⴰⵡⴹⴻⵏ, ⵙⴻⴳ ⵢⵉⵎⵉⵔ-ⵏⵏⵉ ⵖⴻⵔ ⵡⴰⵙⵙ-ⴰ, ⴰⴷ ⴰⵙ-ⴷ-ⴽⴽⵙⴻⵏ ⴰⵟⴰⵙ ⵏ ⵡⴰⴽⴰⵍ.

ⵜⴰⵎⴰⵏⴻⵖⵜ ⵏ ⵜⵏⴻⴱⴹⵉⵜ-ⴰ, ⵜⴰⵎⴷⵉⵏⵜ ⵏ ⵔⴰⵎⴰⴷⵉ, ⴽⴽⵙⴻⵏ-ⵜⵜ-ⵉⴷ ⵢⵉⵖⴰⵍⵍⴻⵏ ⵉⵄⵉⵔⴰⵇⵉⵢⴻⵏ ⵉ ⵢⵉⵔⴻⴱⵔⴰⴱⴻⵏ ⴷⴻⴳ ⵡⴰⵢⵢⵓⵔ ⵏ ⵛⵜⴻⵎⴱⴻⵕ. ⵀⵉⵜ ⴷ ⴼⴰⵍⵍⵧⵓⵊⴰ ⴷ ⵏⵉⵜⴻⵏⵜⵉ ⴰⵢ ⴷ ⵜⵉⵎⴷⵉⵏⵉⵏ ⵜⵉⵎⴻⵇⵔⴰⵏⵉⵏ ⴰⴽⴽ ⴷⴻⴳ ⴰⵍ-ⴰⵏⴱⴰⵔ.