Asebter amenzawi
Slellin-d yiɣallen iɛiraqiyen ugar n 1000 n yimeḥbas seg yifassen n Daɛec
BEɣDAD – Ssawḍen yiɣallen iɛiraqiyen ad d-slellin aṭas n yimeḥbas seg yiwen n lḥebs n ddaw tmurt ay teḍḍef tegrawt tarebrabt isemman i yiman-nnes « Awanak Islaman » (Daɛec), deg yiwen n yimenɣi i tuḍḍfa n yiwet n temdint deg utaram (ɣarb) n tmurt, ɣef wakken ay d-nnan kra n yimasayen (mas’ulin) ass n ssebt.
Iɣallen n tɣellist (amn) ssawḍen ad ḍḍfen aḥric seg temdint n Hit, yiwet seg temdinin timeqranin n tnebḍit n Al-Anbar ay mazal ḍḍfen-tt yirebraben n Daɛec.
« Mi llan tteddun yiɣallen n tɣellist ɣer sdat deg ccɣel-nsen n weslelli d ussizdeg n temdint n Hit, ufan-d yiwen n lḥebs d ameqran », ɣef wakken ay d-iwekked weknaner (ɛaqid) Fadhel al-Nimrawi. « Lḥebs-a yusa-d ddaw tmurt », llan deg-s 1.500 n yemdanen yernu slellin-ten-id yiɣallen n tɣellist.
Malallah al-Obeidi yellan d amasay deg tnebḍit (muqaṭaɛa) n Al-Anbar, yenna-d daɣ dakken azal n 1.500 n yimeḥbas ay d-yettwaslellin seg lḥebs-nni, yernu amur ameqran seg-sen d iɣarimen (madaniyyin).
Mouhannad al-Douleimi, d amasay d-yelhan s temnaḍt n Hit, iwekked-d dakken ufan-d yiwen n « lḥebs d ameqran » deg temdint-a, maca ur d-yebdir anect n medden ay yellan ttwaḥebsen deg-s.
Tagrawt tarebrabt ay isemman i yiman-nnes « Awanak Islaman » tessaweḍ ad teḍḍef iḥricen d imeqranen seg wakal d-yusan deg ugafa (camal) d utaram n Beɣdad deg 2014, maca iɣallen n tɣellist ssawḍen, seg yimir-nni ɣer wass-a, ad as-d-kksen aṭas n wakal.
Tamaneɣt n tnebḍit-a, tamdint n Ramadi, kksen-tt-id yiɣallen iɛiraqiyen i yirebraben deg wayyur n Ctembeṛ. Hit d Fallouja d nitenti ay d timdinin timeqranin akk deg Al-Anbar.
