Asebter amenzawi

Iḥezziben i webdad i yimeɛdaṛ imsimanen yettṛajun lemɛawna

LEZZAYER TAMANEɣT – Tenna-d tneɣlaft n temsetlelt (taḍamun) taɣelnawt, Mounia Meslem, ass n ssebt deg Lezzayer Tamaneɣt, dakken ttwaddmen yiḥezziben i webdad i yemsimanen ay la yettṛajun lemɛawna.

Deg yiwet n tseɣrut ay d-tga i tɣemsa deg yijifeṛ n yiwen n wemyager deg Leqṣer n Yedles n « Moufdi Zakaria » i lmend n wass anmaḍal n temsimant, tenna-d Massa Meslem dakken aɣlif-nnes yeḥseb-d, deg 2015, « amḍan d ameqran » n yemsimanen ay la yettṛajun lemɛawna, am wakken ay d-tenna dakken ad ttwaddmen yiḥezziben i webdad i yemdanen-a.

Nnig waya, ttwareẓment temruzin (mulḥaqat) n wammasen yemmuzzgen deg usselmed n yimeɛdaṛ n leɛqel akken ad beddent i wemḍan ameqran akk n yigerdan imsimanen d ussifses n unnummed-nsen deg tmetti.

Twekked-d Massa Meslem dakken aɣlif-nnes ad yexdem s wemɛawen d weɣlif n ussegmi i werẓam n tneɣriyin (aqsam) yennummden deg yiɣerbazen n menwala akken ad ḍemnen i yemsimanen almud aɣurbiz, am wakken ad yilin yixeddamen ad asen-ibedden i lmendad seg yidis n tnefsit d tuṛtufunit.

I lmend n waya, tenna-d tneɣlaft dakken la d-ttheyyin aṭas n wahilen s wemɛawen d yeɣlifen niḍen i webdad i yigerdan-a, gar-asen akaṭalug n uṣennef n leṣnaf yemgerraden n yimeɛdaṛ ɣef leḥsab n tegnutin (maɛayir) tigraɣlanin, am wakken ad d-gen takarḍa tamaynut i yimeɛdaṛ.