Asebter amenzawi
Iselmaden imguta: tessebded-d Massa Benghabrit yiwet n tseqqamut tuxliḍt
LEZZAYER TAMANEɣT – Tettwassebded-d yiwet n tseqqamut tuxliḍt, ass n letniyen tameddit, deg weɣlif n ussegmi aɣelnaw i webdad i yiɣeblan n yiselmaden imguta (mutaɛaqidin) ay d-yebdan amussu n uccetki, yernu ad d-telhu tseqqamut-a ladɣa d uṣeggem n tcehṛiyin d tukci n kra n tekfiwin (minaḥ) i yiselmaden-a, ɣef wakken ay aɣ-d-yenna weɣlif.
« Temmuger tneɣlaft i tikkelt tis 3, i wugar n 3 n tsaɛtin, igensasen (mumattilin) n yiselmaden imguta. Teddem ṛṛay n ussebded n tseqqamut tuxliḍt (s uqader n lɛahed-nnes) akken ad tefru, gar temsal niḍen, tamsalt n uɛeḍḍel n tcehṛiyin d tukci n kra n tekfiwin », ɣef wakken ay aɣ-d-yenna umaru amatu n weɣlif, Abdelhakim Belabed, deg tgara n temlilit-nni.
Deg wayen yerzan ccerḍ ameqran akk n yiselmaden imguta, win n wesnummed-nsen (idmaǧ) war ccerḍ, tesmekti-d Massa Benghabrit dakken d awezɣi ad ttwasxedmen yixeddamen-a srid, maca tenna-d dakken iseggasen-nsen n ttejṛiba ad asen-ttwaḥesben.
Tenna-d yagi Massa Benghabrit, deg temsalt-a, dakken timerniwt n yiseggasen n uxeddim deg leḥsab n tenqiḍin d « ussis (maǧhud) ameqran » ay tga Twuri Tanagdudt (waḍif ɛumumi).
Ma d agensas n yiselmaden imguta, Bachir Saidi, yenna-d i Tnegga n Yisalan n Lezzayer dakken « 3-nni n tsaɛtin n lemcawṛat ur d-wwint acemma n umaynu ».
« Ad nessiweḍ tigrayin n temlilit-a i yiselmaden imguta yellan imir-a deg Budwaw, akken ad tt-id-nefru ɣef wamek ad nkemmel tigawt-nneɣ, ula ma neẓra dakken yella ccek d ameqran ad kemmlen tiddit-nsen arma ttunefken-asen-d akk yizerfan-nsen uzrifen », ɣef wakken ay d-iwekked.
Iselmaden imguta bdan-d ugar n dduṛt aya yiwet n tiddit n uccetki seg Bgayet ɣer Lezzayer akken ad d-ssiwḍen taɣect-nsen i yemḍebbren.
Ad d-tili yiwet n temsizwert ass n 30 Yebrir i ussidef n 28.000 n yiselmaden n 3 n yeswiren n ussegmi (amenzu, alemmas d wesnawan).
I lmend n waya, tenced-d tneɣlaft iselmaden imguta yettekkan deg tiddit-a n uccetki akken ad mmeṛkin iman-nsen « s tɣawla » ɣer temsizwert taɣelnawt n ussidef uqbel 14 Yebrir akken ad ttekkin deg-s.
