Asebter amenzawi

Tizi Wezzu: tamettant n umaru Chabane Ouahioune

TIZI WEZZU - Yewweḍ leɛfu n Ṛebbi umaru adzayri Chabane Ouahioune ass n letniyen tameddit deg yeɣrem n Tasaft n Ugemmun (Tizi Wezzu) ɣer 94 n yiseggasen, ɣef wakken ay aɣ-d-txebber tnemhalt tadigant (maḥalliyya) n yedles, Nabila Goumeziane.

Chabane Ouahioune ilul ass n 22 Yebrir 1922 deg Tasaft n Ugemmun. Yeɣra lqanun yernu yella d abugaṭu. Yura-d 8 n wungalen ɣef Tmurt n Leqbayel, gar-asen « Axxam n ḍḍerf n tmazirt » anda ay d-yeḥka ɣef tmeddurt deg yeɣrem-nnes n Tasaft deg tallit n ussehres (istiɛmar), « Tiferzizwit » aydeg d-yerra tajmilt i wedrar n Ǧeṛǧeṛ, « Gar tɣalltin ur yettwernan », « Aḍḍan-a yeḍḍfen leqrun », « Ibriden yerɣan » d « Yigider n teẓrut », ungal-nnes aneggaru ay d-yura ɣer 89 n yiseggasen.

Yebda tirawt n wungalen deg 1946, asmi ay yemlal d Mouloud Mammeri. Dda Ceɛban yuɣal, sakkin, d imseɣtu (muṣaḥḥità deg Teẓrigin n Teṛmist Taɣelnawt n Weẓrag d Wesnezwi.

Mi as-neɣra i Massa Goumeziane ɣef temsalt n tmettant-nnes, tɛezza-d imawlan n umeṛḥum d yimeddukal-nnes, yernu tenna-d dakken tamettant n wemdan-a yesṛuḥ-aɣ yiwen seg yismawen imeqranen n tsekla tadzayrit.

Dɣa s yimeṭṭawen ay aɣ-d-tenna dakken « igider yeǧǧa taẓrut-is, yufeg, yuɣal ɣer Bab-is ».

Ad as-rren tajmilt meɣɣren i Chabane Ouahioune s yiwet n tzikkent ɣef uxeddim d umecwaṛ-nnes, ass n ttlata deg wexxam n yedles n Mouloud Mammeri, deg Tizi Wezzu, ɣef wakken ay d-tenna tnemhalt n yedles.

Ass n ljemɛa, rran-as tajmilt deg yeɣrem-nnes n Tasaft n Ugemmun (taɣiwant n Yibudraren), maca ur yessaweḍ ad yeḥdeṛ deg-s imi ay yella d amuḍin deg wusu.