Asebter amenzawi

Tuḍḍfa n yiwet n tmagla tagraɣlant n wayt lqanun deg Rrbaṭ

PARIS – Tenna-d Tiddukla n Yimeddukal n Tegduda Taɛṛabt Taṣeḥrawit Tamegdayt dakken tettwaḍḍef, deg Rrbaṭ, yiwet n tmagla (wafd) ay d-yuzen Umazday Agraɣlan n Yixeddamen n Lqanun akken ad ɛawnen imeḥbas iṣeḥrawiyen n Gdeim Izik.

« Ass n laṛebɛa ɣef tis 6, teḍḍef temsulta tameṛṛukit deg usensu: Massa Ingrid Metton (d tabugaṭut tafṛensist), Eric David (d aselmad n lqanun agraɣlan seg Biljik), Jesus Maria Martin Morillo (d lqaḍi aspenyuli), d Maria Nieves Cubas Armas, Juan Carlos Gomez d Altamira Guelbenzu Gonzalo, d 3 n yibugaṭuten ispenyuliyen », ɣef wakken ay aɣ-d-tenna Regine Villemont, taselwayt n tiddukla-a.

I wesmekti, ixeddamen-a n lqanun rzan-d ɣef Meṛṛuk akken ad bedden ɣer yidis n yimeḥbas iṣeḥrawiyen n Gdeim Izik ay yettwaḥebsen deg lḥebs n Rrbaṭ-Sali yernu bdan-d asunded (iḍrab) n laẓ 36 n wussan aya akken ad d-ccetkin ɣef uɛetteb d weḥbas amesbaṭli ay ttwaḥebsen.

Tamagla-a yettwaḍḍef, sakkin bran-as-d tameddit. Tuḍḍfa-a tella-d yiwen wass uqbel usarag n tɣemsa ay tella tetteddu ad tt-teg tmagla-a akken ad d-twet deg lbaṭel ay la yettekken ɣef yimeḥbas-a iṣeḥrawiyen.

ɣef leḥsab n tselwayt-a, inmahalen (sufara’) n Spenyul, Biljik d Fṛansa deg Meṛṛuk ddan ɣer usensu-nni akken ad sseqsin ɣef yimaslaḍen n tmagla-a.