Asebter amenzawi

Tipaza: isenfaren imeqranen n tmerrit i uheyyi n 18.000 n wusuten

TIPAZA - Yenna-d uneɣlaf n uheyyi n wakal d tmerrit, Amar Ghoul, ass n lexmis, dakken ad d-ilin deg Tipaza acḥal n yisenfaren n tmerrit (siyaḥa) ad yessiwḍen tazmert n ummager n twilayt-a ɣer 18.000 n wusuten.

Mi d-yessawel deg temlilit n uqeddem n Uzenziɣ n uheyyi n wakal deg wexxam n twilayt-a, yenna-d uneɣlaf dakken Tipaza ad tesɛu aṭas n yisenfaren imeqranen n tmerrit ad yesmeɣren tazmert-nnes n ummager seg 2.000 n wusuten (akken tella imir-a) ɣer 20.000 n wusuten s lqis alemmas.

S waya, iger-d tiɣri i yiduba islekmanen (tanfidiyya) n twilayt-a akken ad bedden ɣer yidis n Uzenziɣ aɣelnaw n uheyyi n wakal deg ukatar n tmuɣli taɣelnawt yemtawan yernu d tin yessmadayen iḥricen idamsanen niḍen.

Yerza Mass Ghoul ɣef waṭas n yisenfaren n weḥric-nnes ɣer yidis n uwali n Tipaza, Abdelkader Kadi, yernu ssersen aẓru amezwaru deg lebni n yisuddisen (murakkabat) d yiɣerman imerrayanen deg twilayt-a. I lmend n waya, yenna-d uneɣlaf dakken « Tipaza tella-d d amutur ad yesseddun tamerrit deg Lezzayer ».

Seg yidis niḍen, iger-d uneɣlaf tiɣri i ufaṛes n tegnit i ussefti deg Temnaḍt n ussemɣer n tmerrit n Maṭaris-Ccenwa ay d-tessebded twilayt ass n laṛebɛa. Tamnaḍt-a ad tesɛu 30 n yisenfaren imerrayanen ad yeḍḍfen 157 n yiqeṭṭaren.

Mass Ghoul yeckeṛ-d daɣ ussisen (maǧhudat) n uwali ay yesseddan lecɣal-a ɣer sdat deffir ma ḥebsen azal n 10 n yiseggasen.