Asebter amenzawi

Ecuador: twet-d tzelzelt n 7,6 n tfesniwin

QUITO– Mmuten, ma ulac, 41 n yemdanen ass n ssebt deg yiwet n tzenzelt ijehden n 7,8 n tfesniwin deg Ecuador, ɣef leḥsab n yiwet n tecrawt ay d-yessuffeɣ wenmazul n uselway (na’ib ra’is) Jorge Glas.

« Bnaqes, isali ay nesɛa taswiɛt-a d win n tmettant n 41 n yiɣermanen (…) Amḍan-a ad yernu deg tsaɛtin ay d-yetteddun », ɣef wakken ay d-yenna Mass Glas deg ṛṛadyu d tliẓri, deffir ma tettunefk-d tecrawt tamezwarut n 28 n yimettanen, yernu yenna-d unabaḍ (ḥukuma) dakken tamurt tesseɣret-d tagnit n tuɛjilin.

Tizenzelt-a ijehden n 7,8 n tfesniwin ay d-iwten ass n ssebt deg Ecuador tessenker-d aɛeyyen n utsunami ɣef leḥsab n Usudu Amarikani n Tkelsengama (USGS).

« ɣef leḥsab n ṣṣifat n tzenzelt-a, yezmer lḥal ad d-wtent lemwaj timihawin (xaṭira) n utsunami deg waqqar n 300 n yikilumitren ɣef wammas n tzenzelt », ɣef wakken ay d-yenna Wammas n Uɛeyyen ɣef Yitsunamiyen deg Ugaraw Amelwi.

Tizenzelt-a twet-d ass n ssebt ɣef tis 11:58 deg wakud n Greenwich ɣef leḥsab n USGS. Ammas-nnes lqay 10 n yikilumitren ddaw tmurt yernu yusa-d 173 n yikilumitren deg ugafa-utrim n tmaneɣt Quito.