ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵄⵉⵏ ⴷⴷⴻⴼⵍⴰ: ⴰⵣⵔⴰⵡ ⴷ ⵍⴻⴱⵏⵉ ⵏ ⵡⴰⵟⴰⵙ ⵏ ⵜⴻⵎⵚⵓⴽⵉⵏ ⵏ ⵜⴻⵎⵙⴻⵜⵍⴻⵍⵜ ⵜⴰⵖⴻⵍⵏⴰⵡⵜ

ⵄⵉⵏ ⴷⴷⴻⴼⵍⴰ– ⴰⵟⴰⵙ ⵏ ⵜⴻⵎⵚⵓⴽⵉⵏ (ⵀⴰⵢⴰⴽⵉⵍ) ⵏ ⵜⵖⴻⵍⵍⵉⵙⵜ ⵢⴻⵇⵇⵏⴻⵏ ⵖⴻⵔ ⵜⴻⵎⵙⴻⵜⵍⴻⵍⵜ (ⴷⴰⵔⴰⴽ) ⵜⴰⵖⴻⵍⵏⴰⵡⵜ ⴰⵢ ⵍⴰ ⵢⴻⵜⵜⵡⴰⵣⵔⴰⵡⴻⵏ ⵏⴻⵖ ⵍⴰ ⵜⵜⵡⴻⴱⵏⴰⵢⴻⵏⵜ ⴷⴻⴳ ⵜⵡⵉⵍⴰⵢⵜ ⵏ ⵄⵉⵏ ⴷⴷⴻⴼⵍⴰ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴰⵙⵙ ⵏ ⵍⵃⴻⴷⴷ ⵢⵉⵡⴻⵏ ⵏ ⵓⴼⴻⵙⵢⴰⵏ ⵏ ⵜⴻⵎⵙⴻⵜⵍⴻⵍⵜ ⴷⴻⴳ ⵜⵡⵉⵍⴰⵢⵜ-ⴰ.

« ⵜⵉⵎⵚⵓⴽⵉⵏ-ⴰ ⴷ 5 ⵏ ⵜⴼⴻⵔⵇⵜⵉⵏ ⵏ ⵜⴻⵎⵙⴻⵜⵍⴻⵍⵜ ⵢⴻⵍⵍⴰⵏ ⴷⴻⴳ ⵓⵎⴻⵛⵡⴰⵕ ⵏ ⵡⴻⵣⵔⴰⵡ (ⴷⵉⵔⴰⵙⴰ) ⴷ 2 ⵏⵉⴹⴻⵏ ⴰⵢ ⵍⴰ ⵢⴻⵜⵜⵡⴻⴱⵏⴰⵢⴻⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵎⴻⵏⵣⴰⴹ (ⵇⴰ’ⵉⴷ) ⵎⴰⴰⵎⵔⵉⴰ ⴰⵀⵎⴻⴷ, ⵉⵖⴻⴼ ⵏ ⵢⵉⵖⴰⵍⵍⴻⵏ ⵏ ⵜⴻⵎⵙⴻⵜⵍⴻⵍⵜ ⵏ ⵄⵉⵏ ⴷⴷⴻⴼⵍⴰ, ⴷⴻⴳ ⵢⵉⵡⴻⵏ ⵏ ⵓⵙⴰⵔⴰⴳ ⵏ ⵜⵖⴻⵎⵙⴰ ⵉ ⵜⴻⵛⵔⴰⵡⵜ ⵏ ⵢⴻⵔⵎⵓⴷⴻⵏ ⵏ ⵜⴻⵎⵙⴻⵜⵍⴻⵍⵜ ⴷⴻⴳ 3 ⵏ ⵡⴰⵢⵢⵓⵔⴻⵏ ⵉⵎⴻⵣⵡⵓⵔⴰ ⵏ 2016.

ⴳⴰⵔ 36 ⵏ ⵜⵖⵉⵡⴰⵏⵉⵏ ⴰⵢ ⵜⴻⵙⵄⴰ ⵜⵡⵉⵍⴰⵢⵜ-ⴰ, 7 ⵓⵔ ⵙⵄⵉⵏⵜ ⵜⴰⴼⴻⵔⵇⴻⵜ ⵏ ⵜⴻⵎⵙⴻⵜⵍⴻⵍⵜ ⵢⴻⵔⵏⵓ ⵜⵉ ⴷ ⵎⵅⴰⵟⵔⴻⵢⵢⴰ, ⴱⵉⵔⴱⵓⵛ, ⵄⵉⵏ ⴱⴻⵏⵢⴰⵏ, ⵄⵉⵏ ⴱⵓⵢⴻⵃⵢⴰ, ⴱⴻⵏⵄⴻⵍⵍⴰⵍ, ⵡⴰⴷ ⴵⴻⵎⵄⴰ ⴷ ⴵⴻⵎⵄⴰ ⵡⵍⴰⴷ ⵛⵛⵉⵅ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⴼⴻⵙⵢⴰⵏ-ⴰ, ⴰⵎ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ ⴷⴰⴽⴽⴻⵏ ⵍⴻⴱⵏⵉ ⵏ ⵜⴼⴻⵔⵇⵜⵉⵏ-ⴰ ⴷ ⴰⵢⴻⵏ ⴰⴷ ⵢⴻⴵⴵⴻⵏ ⵜⴰⵎⵙⴻⵜⵍⴻⵍⵜ ⴰⴷ ⵜⴻⴹⵎⴻⵏ ⵜⴰⴷⵓⵍⵉ ⵏ ⵜⵖⴻⵍⵍⵉⵙⵜ (ⴰⵎⵏ) ⵙ 100% ⴷⴻⴳ ⵜⵡⵉⵍⴰⵢⵜ-ⴰ.

ⴷ ⴰⵛⵓ ⴽⴰⵏ, « ⵓⵍⴰ ⵎⴰ 7-ⴰ ⵏ ⵜⵖⵉⵡⴰⵏⵉⵏ ⵓⵔ ⵙⵄⵉⵏⵜ ⵜⵉⴼⴻⵔⵇⵜⵉⵏ ⵏ ⵜⴻⵎⵙⴻⵜⵍⴻⵍⵜ, ⴰⵢⴰ ⵓⵔ ⵢⴻⴱⵖⵉ ⴰⴷ ⴷ-ⵢⵉⵏⵉ ⴷⴰⴽⴽⴻⵏ ⵜⵜⵡⴻⴵⴵⴻⵏⵜ ⵢⴻⵔⵏⵓ ⵓⵔ ⴷ-ⵏⴻⵔⵔⵉ ⵍⵡⴻⵍⵀⴰ ⵖⴻⵔ-ⵙⴻⵏⵜ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ ⵓⴼⴻⵙⵢⴰⵏ-ⴰ, ⵢⴻⵔⵏⵓ ⵉⵅⴻⴱⴱⴻⵔ-ⴷ ⴷⴰⴽⴽⴻⵏ ⵢⴻⵍⵍⴰ ⵓⵖⴰⵡⴰⵙ (ⵎⵓⵅⴰⵟⵟⴰⵟ) ⵉ ⵜⵄⴻⵙⵙⴰⵙⵜ ⵖⴻⴼ ⵜⵖⵉⵡⴰⵏⵉⵏ-ⴰ.

ⴱⴷⴰⵏ ⴷⴰⵖ ⵍⴻⴱⵏⵉ ⵏ ⵜⵉⴳⴳⴻⵜ (ⵡⵉⵃⴷⴰ) ⵏ ⵜⴳⴻⵔⵎⴰⵏⵜ (ⵜⴰⴷⴰⵅⵅⵓⵍ) ⵜⵓⵄⵊⵉⵍⵜ ⵏ ⵜⴻⵎⵙⴻⵜⵍⴻⵍⵜ ⵜⴰⵖⴻⵍⵏⴰⵡⵜ ⴷⴻⴳ ⵜⵎⴰⵏⴻⵖⵜ ⵏ ⵜⵡⵉⵍⴰⵢⵜ ⴷⴻⴳ 3 ⵏ ⵡⴰⵢⵢⵓⵔⴻⵏ ⵉⵎⴻⵣⵡⵓⵔⴰ ⵏ ⵓⵙⴻⴳⴳⴰⵙ-ⴰ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⴼⴻⵙⵢⴰⵏ-ⴰ, ⵢⴻⵔⵏⵓ ⵉⵅⴻⴱⴱⴻⵔ-ⴷ ⴷⴰⴽⴽⴻⵏ ⴷⴷⵓⵕ ⵏ ⵜⵉⴳⴳⴻⵜ-ⴰ ⵏⴻⵜⵜⴰ ⴷ ⴰⵃⵔⴰⵣ ⵏ ⵍⵄⴰⴼⵢⴰ ⴷⴻⴳ ⵜⴻⵎⵏⴰⴹⵜ-ⴰ.