Asebter amenzawi

Tizi Wezzu : imeɣnasen iqburen n yebrir 1980 sɣenwen-d tiddukla-nsen

TIZI WEZZU - Imeɣnasen iqburen n umussu adelsan amaziɣ n 1980 i d-yekkan seg umaḍal n umahil ssuddsen-d ass n ttlata deg uxxam n yidles Mulud at Mɛemmer n Tizi Wezzu timlilit n lsas akken ad sɣenwe tiddukla Itran n Tmanyin.

‘’Deg ukatar n yisutren n Umussu Adelsan Amaziɣ (MCB) yerzan tuttra tamagant akked ubrid nejrent tedyanin n yebrir 1980, nekni, imeɣnasen iqburen n umussu i d-yekkan seg umaḍal n umahil, negzem-itt deg rray akken ad nesseɣnew yiwet n tiddukla tadelsan i umi nsemma Itri n Tmanyin’’, i d-ssegzin yimectal deg yiwet n tseɣrut i d-ɣran deg teldayt n yimuhal n umyiger.

Takti n usuddes n yiman-nneɣ deg tiddukla tlul-d deg useggas 2008 gar sḍis n yimeɣnasen iqburen n umussu n 1980, wi d Mohammed Sarni, Beranin Youcef, Badjou Abdelkader, Kaci Ramdane, Sadi Ahmed akked umerḥum Moussaoui Khellaf, nettmeslay yal tikkelt ideg ara nekker ad nessuddes irmuden n usfugel 20 yebrir, aya seg useggas 2013 ar imira, i d-yesseɣret i Tnegga n Yisalan n Lezzayer (APS), Mohammed Sarni, d yiwen seg yiɛeggalen imesbedden n tiddukla.