Asebter amenzawi

Ahil n « Lezzayer Tamellalt » ur d-yelli akken yelha (aneɣlaf)

LEZZAYER TAMANEɣT – Tenna-d tneɣlaft n temsetlelt (taḍamun) taɣelnawt, Mounia Meslem Si Amer, ass n ttlata, dakken ahil n « Lezzayer Tamellalt » ur d-yelli akken yelha, yernu tger-d tamawt dakken aṭas n yisenfaren ay d-yellan deg wahil-a « ttunefken i yidisan ur ten-yuklalen ».

Deg uqeddem n tsertit n weḥric-nnes deg tseqqamut n tdawsa (ṣiḥḥa) n Wegraw Aɣerfan Aɣelnaw, ddaw tselwit n Ali Melakhessou, s weḥdaṛ deg uneɣlaf n wassaɣen d wemni, Tahar Khaoua, tenna-d Massa Meslem Si Amer dakken « ahil n ‘Lezzayer Tamellalt’ d-yettwaheyyan, naqal, i yimenɣi mgal tleqqi (fuqr) d uɛawen n wid ur yesɛin axeddim, d ahil aydeg d-llant aṭas n tuffɣiwin i webrid », am wakken ay d-twekked dakken « aṭas n yisenfaren ur d-sfaydin seg-sen wid yettalasen ».

I lmend n waya, tumeṛ Massa Meslem s ubeddu n « weḥtac alqayan » i tmussni n ssebbat ay iḥeṛmen inerbiyen (baṭṭalin) d yigellile seg wesfaydi seg yisenfaren-a.

Ahil n Lezzayer Tamellalt yella-d deg ukatar n wesnas (taṭbiq) n lewṣayat n uselwyay n tegduda, Abdelaziz Bouteflika, i lmend n wesnummed (idmaǧ) n yinerbiyen d yigellilen deg uxeddim d uɛawen-nsen akken ad d-snulfun tiṛmisin-nsen timeẓyanin yemmuzzgen deg weḥraz n twennaḍt.

5.999 n teṛmisin timeẓyanin d 47.992 n yimukan n uxeddim uɛḍilen ay d-yennulfan deg tallit n Yennayer 2015 ɣer 3 n wayyuren imezwura n 2016, ɣef wakken ay d-tenna Massa Meslem.

Akken ad d-tili tezdeg yernu ur d-yettili umeḥyaf deg ussefrek n wahil-a, ttwaddmen yiḥezziben iwatan am ussebded n tseqqamut n weḍfar n yixeddimen deg wenrar.

« Iḥezziben-a ad ttwasensen (tuṭabbaq) akken kan ad ɛeddin deg Useqqamu n Uwehhi n Tnegga n Wesnefli Anmetti », ɣef wakken ay d-tenna tneɣlaft.