Asebter amenzawi
« Sfaqes, tamaneɣt n yedles aɛṛab n 2016 » d tagnit i wemɛawen adelsan gar Lezzayer d Tunes
QSENṬINA – Nnan-d ass n ttlata tameddit, deg Qsenṭina, tneɣlaft tatunsit n yedles, Sonia Mbarek, d uneɣlaf adzayri n yedles, Azzedine Mihoubi, dakken tadyant n « Sfaqes, tamaneɣt n yedles aɛṛab n 2016 » ad d-tili d « tagnit i ussalqey n wemɛawen adelsan ay la d-yettawin yagi lfayda gar Ldzayer d Tunes ».
Nnan-d aya i lmend n tfugla (iḥtifal) unṣib n tukci n usafu n tedyant n tmaneɣt n yedles aɛṛab i temdint n Sfaqes (deg Tunes) ay d-yellan deg tzeqqa n yihanayen (ɛuruḍ) n Ḥmed-Bay, dɣa tella-d ta d tagnit akken ad d-inin yineɣlafen-a dakken Ldzayer d Tunes « cerken-ten yeḥricen d imeqranen n umezruy, idles d wansayen », yernu anect-a akk ad yettwasseǧhed deg ukatar n tedyant-a ad yebdun seg-a ɣef kra n ledwaṛ deg temdint n Sfaqes (deg Yulyu n 2016).
Yenna-d Mass Mihoubi dakken « yumar (yefṛeḥ) s rrbeḥ n tedyant n 'Qsenṭina, tamaneɣt n yedles aɛṛab n 2015’ », yernu yumen dakken tadyant-a ad terbeḥ daɣ deg temdint n Sfaqes, am wakken ay d-yenna dakken aya ad d-yili daɣ d tagnit n « wemsuɣal gar Masensen d Sfaqes, gar Sirta d Qerṭaj ».
Asemmi n temdint n Sfaqes akken ad temmager tadyant-a yella-d amzun d asseɣzef n tedyant-a ay d-yellan naqal deg temdint taqburt n Sirta, ɣef wakken ay d-yenna Mass Mihoubi ay d-yessawlen, s teɣzef, ɣef umezruy ucrik n snat-a n tmura d lateṛ ayyes d-yegla waya ɣef Lmeɣreb Ameqran.
Deg tegnit-a, yenna-d uneɣlaf dakken snat-a n tmura sɛant tigemmi tamezruyant d tanesbaɣurt yernu d talqayant, yernu yessefk ad xedment ddukli akken ad d-tili tedyant-a d tagnit i wesnefli (taṭwir) d usseǧhed n tdukli d wemɛawen aɛṛab.
