Asebter amenzawi
Meṛṛuk tettwaḥettem ad tejbed iman-nnes seg Uneẓruf Utrim (asarag)
PARIS – Meṛṛuk tettwaḥettem, ɣef leḥsab n lqanun agraɣlan, akken ad tejbed iman-nnes seg Uneẓruf Utrim ay teḍḍef s yiɣil yernu ulac tamurt ay yesteɛṛfen s tnaya-nnes (siyada) ɣef wakal-a, ɣef wakken ay d-nnan yimazzayen (xubara’) n lqanun deg Paris deg yiwen n usarag agraɣlan.
Asarag-a ay d-yellan ass n ttlata deg tzeqqa n Victor-Hugo n Wegraw Afṛensis, ḥedṛen deg-s yiwamniyen (barlamaniyyin), isdawanen, imazzayen n lqanun, idiplumatiyen ibeṛṛaniyen yellan deg Fṛansa, gar-asen anmahal (safir) n Ldzayer deg Fṛansa, Amar Bendjama, d yigensasen n tiddukliwin. Yella-d usarag-a d taswiɛt n wembaddel n tmuɣliwin ɣef « Uferru n taluft n Uneẓruf Utrim, d tamsalt n lqanun agraɣlan ».
Dɣa deg temsalt-a, yenna-d uselmad n Wammas n Lqanun Agraɣlan n Tesdawit Tilellit n Bruxelles, Vincent Chapaux, yebder-d llsisan n lqanun agraɣlan yeqqnen ɣer temsalt taṣeḥrawit, am wakken ay d-yenna dakken Meṛṛuk, s yisem-nnes d « tanezmart » yeḍḍfen akal aṣeḥrawi, « tettwaḥettem akken ad tejbed iman-nnes » seg Uneẓruf Utrim am wakken ay as-yettwagdel ad tɣellet lxir n wakal-a ay ttwalin Yeɣlanen Yeddukklen d akal war tafulmant seg 1964.
Yesmekti-d Mass Chapaux dakken, ar ass-a, ulac tamurt ay yesteɛṛfen s tnaya tameṛṛukit ɣef Uneẓruf Utrim, yernu yenna-d dakken ccɣel n Tuddsa n Yeɣlanen Yeddukklen deg uferru n taluft-a yuɣal « yewɛeṛ aṭas » deg yiseggasen-a ineggura.
« Deg tazwara, Tuddsa n Yeɣlanen Yeddukklen tessedda tamsalt-a akken yelha, sakkin, seg yiseggasen n 2000 ar ass-a, nger tamawt dakken yella-d ubeddel deg waddud yernu tesmenyaf lemcawṛat gar Meṛṛuk d Terni n Polisario, yili, deg tidet, tamsalt attan kan deg wesnas (taṭbiq) d uḥettem n uqader n lqanun agraɣlan », ɣef wakken ay d-iwekked, am wakken ay d-iger tiɣri i tmura niḍen ur steɛṛifent s tegnit-a yernu yessefk ad mɛawanent akken « ad fakent tuḍḍfa » n wakal-a.
