Asebter amenzawi

Tizenzelt deg Ecuador: 499 ay yemmuten (tacrawt tamaynut)

QUITO - Tizenzelt-nni ijehden ay iwten tamnaḍt n yiri n yilel deg Ecuador ass n ssebt yezrin tegla s 499 n tmeddurin, ɣef leḥsab n tecrawt (ḥaṣila) tamaynut ay d-yessuffeɣ unabaḍ (ḥukuma) ass n laṛebɛa.

« Ar imir-a, 499 n yemdanen ay yemmuten yernu jerḥen 4.027 niḍen », ɣef wakken ay d-yenna wenmazul n uselway (na’ib ra’is) n Ecuador, Diego Fuentes.

Tacrawt yezrin tebder-d 480 n yinemmiten.

ɣef leḥsab n unabaḍ, 159 n yemdanen ay yemmuten deg temnaḍt n Pedernales, deg tnebḍit (muqaṭaɛa) n Manabi (ataram [ɣarb]), 142 n tfekkiwin ay d-yettwaskeflen deg temdint tamerrayant n Manta. Deg Portoviejo, tamaneɣt n tnebḍit n Manabi, 116 n yemdanen yemmuten ay yettwaɛeqlen yernu ttunefken i twaculin-nsen.

Yenna-d uneɣlaf aɣelnaw n ussefrek (tasyir) n twuɣa dakken 231 n yemdanen ay iɛerqen.

Yenna-d daɣ uneɣlaf dakken 20.503 n yemdanen ay yettwaszedɣen deg wammasen n ummager deffir ma rewlen-d seg yexxamen-nsen ɣef lǧal tzenzelt-a n 7,8 n tfesniwin.

Tizenzelt-a iǧehden iwten Ecuador ass n ssebt tameddit tegla-d daɣ s yixeṣṣaren deg wenẓul-utrim (ǧanub-ɣarb) n tmurt, sdat wammas n tzenzelt-a lqayen 10 n yikilumitren, am wakken ay as-ḥulfan medden deg temnaḍin ibeɛden am Guayaquil d tmaneɣt Quito.

Tizenzelt-a ḥulfan-as ula deg wenẓul n Kulumbya d Piru, maca snat-a n tmura ur d-xebbrent dakken llan wid yenḍerren seg-s.