Asebter amenzawi

Iḥettet-d Louh deg New York ɣef ttawilat n weḥṛas n tegnit ɣef tehyufin

NEW YORK – Yenna-d uneɣlaf n teɣdemt, ass n laṛebɛa deg New York, dakken yessefk ad yettwaḥṛes ssuq n tehyufin s ussefɛel n yiḥezziben mgal tejrimt yeqqnen ɣer ussetti (tahrib) n tehyufin.

Mi yesselwi yiwet n temlilit n wemciweṛ ɣef ussenqes n ussumer (ɛarḍ) n tehyufin ay d-yellan i lmend n tedwilt tafeɣnamit n Tuddsa n Yeɣlanen Yeddukklen ɣef wugur anmaḍal n tehyufin, iger-d tiɣri uneɣlaf i wid yettekkan akken ad sqedcen ttawilat n weḥṛas n ussenzi n tehyufin akken ad yenqes ussuder-nsent (istihlak) ay la yettnernin.

Yenna-d Mass Louh dakken yessefk ad sɛunt tiggtin (waḥadat) n weḥtac tamasit (mas’uliyya) deg uxeddim-nsent i yimenɣi mgal tehyufin, yernu yessefk ad cerkent tmura ttejṛibat-nsent deg wenrar-a.

Yenna-d daɣ dakken yessefk ad d-yili daɣ uxemmem ɣef temsalt n tgemmiwin n tewsi (timura anda ur ttxelliṣen leɣrama) ay yettwasseqdacen d imukan i ussired n yedrimen n ussetti n tehyufin, yernu yenna-d Mass Louh dakken assetti-a d taɣbalut (maṣdar) n yedrimen i rrebrab, yernu ɣef waya ay yessefk ad tettwaxneq teɣbalut-a.

Deg temsalt-a daɣ, yenna-d uneɣlaf ajapuni n tɣawsiwin n wezɣar, Mass Seiji Kihara, dakken assetti n tehyufin d yiwen seg leṣnaf imensayen n tejrimt yettwassuddsen ay yeswaɣayen tadamsa d unnerni.

ɣef leḥsab-nnes, assaɣ la yettnernin gar ussetti n tehyufin d rrebrab d ayen ay yeswaɣen arkad n umaḍal, yernu yenna-d dakken Japun tettɛaqab assetti d ussuder n tehyufin yernu tekkat ɣef ussefɛel uḥṛic n lqanun ula ɣef yemsudren (mustahlikin) akken ad asen-rẓen ifadden, ur sseqdacen tihyufin.