ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

13 ⵏ ⵢⴻⵎⴷⴰⵏⴻⵏ ⴰⵢ ⵉⵊⴻⵔⵃⴻⵏ ⴷⴻⴳ ⵡⴻⵕⵊⴰⵎ ⵏ ⵢⵉⵡⴻⵏ ⵏ ⵓⵙⴰⴽⴰⵍ

ⵜⴰⵖⴻⵔⴷⴰⵢⵜ – 13 ⵏ ⵢⴻⵎⴷⴰⵏⴻⵏ ⴰⵢ ⵉⵊⴻⵔⵃⴻⵏ ⵎⵉ ⵢⴻⵜⵜⵡⴰⵕⵊⴻⵎ ⵢⵉⵡⴻⵏ ⵏ ⵓⵙⴰⴽⴰⵍ (ⵃⴰⴼⵉⵍⴰ) ⵢⴻⵇⵇⵏⴻⵏ ⵜⴰⵖⴻⵔⴷⴰⵜⵜ ⵖⴻⵔ ⴷⴰⵢⴰ ⴱⴻⵏ ⴷⴻⵀⵡⴰ ⴰⵙⵙ ⵏ ⵍⴻⵕⴰⴱⵄⴰ. ⴰⵙⴰⴽⴰⵍ-ⴰ ⵢⴻⵜⵜⵡⴰⵕⵊⴻⵎ ⵙ ⵜⵇⴻⵔⵄⵓⵏⵉⵏ ⵏ ⵜⵎⴻⵙ ⴰⵢ ⴷ-ⵣⴻⵍⵍⵉⵏ ⴼⴻⵍⵍ-ⴰⵙⴻⵏ ⵢⴻⵎⴷⴰⵏⴻⵏ ⵓⵔ ⵢⴻⵜⵜⵡⴰⵙⵙⵏⴻⵏ ⴷⴻⴳ ⵡⴻⵎⴽⴰⵏ ⵓⵎⵉ ⵜⵜⵉⵏⵉⵏ ⵜⵉⵖⴻⵣⵣⴰ, ⵙⴷⴰⵜ ⵜⴻⵎⴷⵉⵏⵜ ⵏ ⵜⵖⴻⵔⴷⴰⵢⵜ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵡⴻⵙⴱⵉⵟⴰⵔ ⵡⵓⵖⵓⵔ ⵡⵡⵉⵏ ⵉⵎⴻⵊⵔⴰⵃ-ⴰ.

ⵢⵉⵡⴻⵜ ⵙⴻⴳ ⵜⵇⴻⵔⵄⵓⵏⵉⵏ ⵏ ⵜⵎⴻⵙ ⵜⴻⵔⵥⴰ ⵣⵣⵊⴰⵊ-ⵏⵏⵉ ⵏ ⵓⵙⴰⴽⴰⵍ ⵢⴻⵔⵏⵓ ⵜⴻⵙⵙⴻⵔⵖ ⴽⵔⴰ ⵏ ⵢⴻⵎⵙⵉⴽⵍⴻⵏ (ⵎⵓⵙⴰⴼⵉⵔⵉⵏ), ⴳⴰⵔ-ⴰⵙⴻⵏ 5 ⵙⴻⴳ ⵜⵎⵓⵔⴰ ⵏ ⵡⴻⵏⵥⵓⵍ ⵏ ⵓⵏⴻⵥⵔⵓⴼ, ⵏⵏⵉⴳ ⵡⴰⵢⴰ, ⴰⵙⴰⴽⴰⵍ-ⵏⵏⵉ ⵜⴻⵏⴷⴻⵃ ⴷⴻⴳ-ⵙ ⵜⵎⴻⵙ, ⵖⴻⴼ ⵡⴰⴽⴽⴻⵏ ⴰⵢ ⴰⵖ-ⴷ-ⵏⵏⴰⵏ ⵢⵉⵅⴻⴷⴷⴰⵎⴻⵏ ⵏ ⵡⴻⵙⴱⵉⵟⴰⵔ. Ɣⴻⴼ ⵍⴻⵃⵙⴰⴱ-ⵏⵙⴻⵏ, ⵉⵎⵛⴻⵡⵡⵍⴻⵏ ⴰⵢ ⴷ-ⵉⵕⴻⵊⵎⴻⵏ ⴰⵙⴰⴽⴰⵍ-ⴰ ⵔⴻⵡⵍⴻⵏ.

ⴰⴽⴽⴻⵏ ⴽⴰⵏ ⴰⵢ ⵜⴻⵏ-ⵢⴻⵡⵡⴻⴹ ⵢⵉⵙⴰⵍⵉ, ⴷⴷⴰⵏ ⵖⴻⵔ ⴷⵉⵏ ⵢⵉⵖⴰⵍⵍⴻⵏ ⵏ ⵜⵖⴻⵍⵍⵉⵙⵜ (ⴰⵎⵏ) ⴰⴽⴽⴻⵏ ⴰⴷ ⵏⴰⴷⵉⵏ ⵖⴻⴼ ⵢⴻⵎⵛⴻⵡⵡⵍⴻⵏ-ⴰ.

ⵏⵏⵉⴳ ⵡⴰⵢⴰ, ⵢⴻⴷⴷⴰ ⵓⵡⴰⵍⵉ ⵏ ⵜⵖⴻⵔⴷⴰⵢⵜ ⵖⴻⴼ ⵢⵉⵖⴻⴼ ⵏ ⵢⵉⵡⴻⵜ ⵏ ⵜⵎⴰⴳⵍⴰ ⵏ ⵢⵉⴷⵓⴱⴰ (ⵙⵓⵍⵓⵟⴰⵜ) ⵉⴷⵉⴳⴰⵏⴻⵏ ⴰⴽⴽⴻⵏ ⴰⴷ ⵢⴻⵔⵣⵓ ⵖⴻⴼ ⵢⵉⵎⴻⵊⵔⴰⵃ-ⴰ ⵢⴻⵍⵍⴰⵏ ⴷⴻⴳ ⵜⴻⴽⵍⵉⵏⵉⵜ ⵏ ⴷⴰⵢⴰ ⴱⴻⵏ ⴷⴻⵀⵡⴰ, ⴰⵏⴷⴰ ⴰⵢ ⴷ-ⵎⵙⴻⴳⵔⴰⵡⴻⵏⵜ ⵜⵡⵉⵏⴰⵙ ⵏ ⵢⴻⵎⴷⴰⵏⴻⵏ ⴰⴽⴽⴻⵏ ⴰⴷ ⴷ-ⵛⵛⴻⵜⴽⵉⵏ ⵖⴻⴼ ⵡⴰⵢⴰ, ⵎⴰⵛⴰ ⵡⴰⵔ ⵎⴰ ⴳⴰⵏ ⵛⵛⵡⴰⵍ.