Asebter amenzawi

Tamettant n uselway acili aqbur Patricio Aylwin: yestenya Bensalah azmam n uɛezzi

LEZZAYER– Yestenya uselway n Useqqamu n Weɣlan, Abdelkader Bensalah, agensas (mumattil) n uselway n tegduda, Abdelaziz Bouteflika, ass n lexmis, deg tmahelt (safara) n Cili deg Ldzayer Tamaneɣt, azmam n uɛezzi ɣef tmettant n uselway acili aqbur, Patricio Aylwin.

« Deg tegnit-a tuqriḥt, usiɣ-d ad ken-ɛezziɣ s yisem n uselway n tegduda, Abdelaziz Bouteflika, d yisem n unabaḍ d weɣref adzayri d yisem-inu udmawan, yernu ad awen-d-ssiwḍeɣ seg wul iḥulfan-inu n leḥzen, aṣebber d webdad ɣer yidis-nwen », ɣef wakken ay d-yura Mass Bensalah.

« Tagduda n Cili tesṛuḥ, s tmettant n Patricio Aylwin, yiwen seg yemḥaddiyen imeqranen n wazalen n teɣdemt d tugdut, argaz n uwanak ur yesɛin tamtilt », ɣef wakken ay d-yenna.

Yebder-d uselway n Useqqamu n Weɣlan amecwaṛ n uselway aqbur n Cili, am wakken ay d-iwekked ɣef uttekki amellil (faɛɛal) n uselway-a deg « yimenɣi mgal tesnareft » d wamek ay yessaweḍ, s tmuɣli-nnes tasertant tuṣwibt, ad yeḥkem Cili deg tallit taweɛṛant n tukkit, d ayen ay yessawḍen ɣer ussebded n uwanak (dawla) amegday, atrar.

« Nettwekkid-d aɛezzi-nneɣ seg wul i weɣref acili agmat d twacult d yeqriben n umeṛḥum, yernu neḍmen-awen tamsetlelt-nneɣ (taḍamun) tummidt deg teswiɛt-a tuqriḥt », ɣef wakken ay d-yerna Mass Bensalah.

Patricio Aylwin yeḥkem Cili seg 1990 ɣer 1994 yernu yemmut ass n ttlata ɣer 97 n yiseggasen.