Asebter amenzawi

Yessawel Mass Bouchouareb d uneɣlaf imaṛati n teẓwert ɣef usseǧhed n ticcurka

LEZZAYER TAMANEɣT – Yemmuger uneɣlaf n temguri (ṣinaɛa), Abdessalam Bouchouareb, ass n letniyen deg Lezzayer Tamaneɣt d uneɣlaf imaṛati n teẓwert (ṭaqa), Suhail Bin Mohamed al-Mazrouei, ɣef wakken ay d-yenna yiwen n welɣu n weɣlif.

Amyager-a yella-d dduṛt deffir Wenmager-nni Amezwaru n Tɣawsiwin Tidzayriyin-Timaṛatiyin ay d-yellan deg Abu Dhabi i ussukku n tiṭ ɣef ttawilat n ussalqey n ticcurka tadamsant gar snat-a n tmura, ladɣa deg weḥric n temguri, ɣef wakken ay d-yenna welɣu-a (bayan).

Asqerdec-a yella-d s weḥdaṛ n yikataren (iṭarat) n yeɣlifen n snat-a n tmura, yernu yella-d deg-s wawal ɣef wassaɣen isindisanen d ttawilat n usseǧhed-nsen s usseɛjel n yisenfaren ayɣef la d-yettili uxeddim imir-a.

I lmend n waya, iwekked-d Mass Bouchouareb ɣef « wassaɣen izaden yeqqnen Lezzayer ɣer Limaṛat Taɛṛabin Yeddukklen », am wakken ay d-yerna dakken tirzi-nnes taneggarut ɣef Abu Dhabi « tegla-d s yegmaḍ ikmamen (malmusa) s westenyi n waṭas n yemtawayen (ittifaqat) nnig wemciweṛ ɣef yisenfaren niḍen yerzan iḥricen yemgerraden ».

Iɛawed daɣ iwekked-d dakken « iɛewwel netta s timmad-nnes ad yebded ɣer yidis n lɛahed n sin-a n yidisan akken ad ddun yisenfaren-a », am wakken ay d-yenna dakken iweṣṣa « ad d-sbedden dduṛt ay d-yetteddun taseqqamut taɣlifant ad d-yelhun s tukksa n yiɛewwiqen iḥebsen isenfaren-a yernu ad d-theyyi aɣawas i yisseftiyen imaṛatiyen deg Lezzayer ».