Asebter amenzawi
Testenya Mobilis 4 n leɛqudat d yinaddalen idzayriyen
LEZZAYER TAMANEɣT – Testenya teṛmist (carika) tanagdudt n usawal n ufus, Mobilis, 4 n leɛqudat n ticcurka d kra n yinaddalen idzayriyen « ad d-yasen ad ttekkin deg ussebded n tsuddest (istratiǧiyya) taddalant ay tebɣa teṛmist-a taɣelnawt ».
Tafugla n westenyi n leɛqudat-a tella-d deg wexxam n ATM Mobilis deg Bab Zzewwaṛ (Ldzayer Tamaneɣt) s weḥdaṛ n uselway n Useqqamu Ulimpi d Waddalan Adzayri, Mustapha Berraf.
Inaddalen-a d Nouria-Benida Merrah, talɣuɣt tulimpit n 1500 n yimitren deg Wuraren n Sydney n 2000, Abderrahmane Hammad, bu tzalɣi n webṛunz deg uneggez s leɛlu deg Sydney, Mohamed Flissi, d bu tzalɣi n webṛunz deg telɣuɣa n umaḍal n tleggimt n Doha deg 2015 d Larbi Bouraada, d alɣuɣ n Tefriqt 3 n tikkal yernu d wis 5 deg umaḍal deg waddal n udikaṭlun.
« Tettɛawed Mobilis tettwekkid-d aɛewwel-nnes akken ad d-tefk akk ttawilat n warrum d tlujistit yessefken i uɛawen n yinaddalen am Bouraada d Flissi ad swejden iman-nsen i Wuraren Ulimpiyen n Rio n 2016 », ɣef wakken ay d-yenna uselway-anemhal amatu n Mobilis, Mohamed Habib.
ɣef leḥsab n uneggaru-a, « leɛqed-a n lemɛawna yella-d d aḥric seg ticcurka tamatut d Useqqamu Ulimpi d Waddalan Adzayri i wesmal (tarqiya) n tugna n teṛmist-a ay la yettkemmilen tettɛawan addal adzayri. »
