ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⵥⴰⵢⴻⵔ ⵏ ⵜⴻⵎⵏⴰⴹⵜ ⵏ ⴵⵓⵍⴰⵏ « ⵓⵔ ⵉⴱⴻⴷⴷⴻⵍ » ⵓⵍⴰ ⵎⴰ ⵉⵙⵕⴰⵢⵉⵍ ⵜⴻⵏⵏⴰ-ⴷ ⴷ ⴰⵢⵍⴰ-ⵏⵏⴻⵙ

ⵏⴻⵡ ⵢⵧⵔⴽ – ⵉⵄⴰⵡⴻⴷ ⵉⵡⴻⴽⴽⴻⴷ-ⴷ ⵓⵙⴻⵇⵇⴰⵎⵓ ⵏ ⵜⵖⴻⵍⵍⵉⵙⵜ ⵏ ⵢⴻⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ, ⴰⵙⵙ ⵏ ⵜⵜⵍⴰⵜⴰ, ⴷⴰⴽⴽⴻⵏ ⵓⵔ ⵢⴻⵙⵜⴻⵄⵕⴻⴼ ⵙ ⵜⵓⵇⵇⵏⴰ ⵏ ⵡⴻⴳⵏⵉ ⵏ ⴵⵓⵍⴰⵏ ⴰⵙⵓⵔⵉ ⵖⴻⵔ ⵉⵙⵕⴰⵢⵉⵍ, ⵢⴻⵔⵏⵓ ⵢⴻⵍⵍⴰ-ⴷ ⵡⴰⵢⴰ ⵖⴻⴼ ⵍⴵⴰⵍ ⵏ ⵢⵉⵡⴻⵜ ⵏ ⵜⴻⵎⵍⵉⵍⵉⵜ « ⵏ ⵡⴻⵙⵎⴻⵏⵜⴻⵙ » (ⵉⵜⵉⴼⵣⴰⵣ) ⵏ ⵓⵙⴻⵇⵇⴰⵎⵓ ⵉⵙⵕⴰⵢⵉⵍⵉ ⵏ ⵢⵉⵏⴻⵖⵍⴰⴼⴻⵏ ⵉ ⵍⵎⴻⵏⴷ ⵏ ⵡⴻⵙⵇⴻⵔⴷⴻⵛ ⵖⴻⴼ ⵡⴻⴳⵏⵉ ⵏ ⴵⵓⵍⴰⵏ. ⵜⵉⵎⵍⵉⵍⵉⵜ ⴰⵎ ⵜⴰ ⴷ ⵜⵉⴽⴽⴻⵍⵜ ⵜⴰⵎⴻⵣⵡⴰⵔⵓⵜ ⴰⵢⴷⴻⴳ ⴰⴷ ⴷ-ⵜⵉⵍⵉ ⵙⴻⴳ ⵡⴰⵙⵎⵉ ⴰⵢ ⵜⴻⴹⴹⴻⴼ ⵉⵙⵕⴰⵢⵉⵍ ⴰⴽⴰⵍ-ⴰ.

ⴷⴻⴳ ⵜⴻⵎⵍⵉⵍⵉⵜ-ⴰ ⴰⵢ ⴷ-ⵢⴻⵍⵍⴰⵏ ⴷⴻⴳ ⵜⵍⴻⵎⵎⴰⵙⵜ ⵏ ⵢⴻⴱⵔⵉⵔ, ⵉⵡⴻⴽⴽⴻⴷ-ⴷ ⵓⵙⴻⵇⵇⴰⵎⵓ ⵉⵙⵕⴰⵢⵉⵍⵉ ⵏ ⵢⵉⵏⴻⵖⵍⴰⴼⴻⵏ ⴷⴰⴽⴽⴻⵏ ⴰⵃⵔⵉⵛ ⵏ ⵡⴻⴳⵏⵉ ⵏ ⴵⵓⵍⴰⵏ ⴰⵢ ⴷ-ⵜⴻⵇⵇⴻⵏ ⵉⵙⵕⴰⵢⵉⵍ ⵖⴻⵔ ⵡⴰⴽⴰⵍ-ⵏⵏⴻⵙ « ⴰⴷ ⵢⴻⵇⵇⵉⵎ ⵉ ⵍⴻⴱⴷⴰ ⴷⴷⴰⵡ ⵜⵏⴰⵢⴰ (ⵙⵉⵢⴰⴷⴰ) ⵜⵉⵙⵕⴰⵢⵉⵍⵉⵜ ».

ⴰⵡⴰⵍ-ⴰ ⵡⵜⴻⵏⵜ-ⴷ ⴷⴻⴳ-ⵙ ⴰⵎⴰ ⴷ ⵜⴰⵎⵖⵓⵏⵜ ⵜⴰⵄⵕⴰⴱⵜ, ⴰⵎⴰ ⴷ ⵜⴰⴷⵓⴽⵍⵉ ⵜⵓⵕⵓⴼⵉⵜ.

ⵎⴰ ⴷ 15-ⵏⵏⵉ ⵏ ⵜⵎⵓⵔⴰ ⵏ ⵓⵙⴻⵇⵇⴰⵎⵓ ⵏ ⵜⵖⴻⵍⵍⵉⵙⵜ, ⵢⴻⵛⵖⴻⴱ-ⵉⵜⴻⵏⵜ ⵡⴰⵢⴻⵏ ⴰⵢ ⴷ-ⵜⴻⵏⵏⴰ ⵉⵙⵕⴰⵢⵉⵍ ⵖⴻⴼ ⵡⴻⴳⵏⵉ ⵏ ⴵⵓⵍⴰⵏ ⵢⴻⵔⵏⵓ ⵡⴻⴽⴽⴷⴻⵏⵜ-ⴷ ⴷⴰⴽⴽⴻⵏ ⴰⵥⴰⵢⴻⵔ (ⵡⴰⴹⵄ) ⵏ ⴵⵓⵍⴰⵏ ⵓⵔ ⵉⴱⴻⴷⴷⴻⵍ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵙⴻⵍⵡⴰⵢ ⵏ ⵓⵙⴻⵇⵇⴰⵎⵓ, ⴰⵏⵎⴰⵀⴰⵍ (ⵙⴰⴼⵉⵔ) ⴰⵛⵉⵏⵡⴰⵜ ⵍⵉⵓ ⵊⵉⴻⵢⵉ.

ⵢⴻⵙⵎⴻⴽⵜⵉ-ⴷ ⵡⴻⵏⵎⴰⵀⴰⵍ ⴰⵛⵉⵏⵡⴰⵜ ⴷⴰⴽⴽⴻⵏ ⵜⴰⵏⴻⵖⵜⵓⵙⵜ (ⵇⴰⵔⴰⵔ) ⵜⵉⵙ 497 ⵏ ⵢⴻⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⴰⵢ ⵉⵄⴻⴷⴷⴰⵏ ⴷⴻⴳ 1981, ⵜⴻⵏⵏⴰ-ⴷ ⴷⴰⴽⴽⴻⵏ « ⴰⵖⵜⴰⵙ ⵉⵙⵕⴰⵢⵉⵍⵉ ⵉ ⵓⵃⴻⵜⵜⴻⵎ ⵏ ⵍⴻⵇⵡⴰⵏⵉⵏ-ⵏⵏⴻⵙ » ⴷ ⵜⴻⴷⴱⴻⵍⵜ-ⵏⵏⴻⵙ ⵖⴻⴼ ⵜⴻⵎⵏⴰⴹⵜ ⵜⴰⵙⵓⵔⵉⵜ ⵏ ⴵⵓⵍⴰⵏ ⵢⴻⵜⵜⵡⴰⴹⴹⴼⴻⵏ ⵢⴻⴱⵟⴻⵍ ⵢⴻⵔⵏⵓ ⵓⵔ ⵢⴻⵙⵄⵉ ⴰⵣⴰⵍ ⴷⴻⴳ ⵍⵇⴰⵏⵓⵏ ⴰⴳⵔⴰⵖⵍⴰⵏ.

ⵙ ⵡⴰⵢⴰ, ⵢⴻⵏⵛⴻⴷ-ⴷ ⵉⴷⵉⵙⴰⵏ ⴰⵢ ⵜⴻⵔⵣⴰ ⵜⴻⵎⵙⴰⵍⵜ ⴰⴽⴽⴻⵏ ⴰⴷ ⵇⴰⴷⵔⴻⵏ ⵉⵃⴻⵣⵣⵉⴱⴻⵏ ⵏ ⵡⴻⵎⵜⴰⵡⴰ ⵏ 1974 ⴳⴰⵔ ⵢⵉⵖⴰⵍⵍⴻⵏ ⵉⵙⵕⴰⵢⵉⵍⵉⵢⴻⵏ ⴷ ⵢⵉⵙⵓⵔⵉⵢⴻⵏ ⵢⴻⵔⵣⴰⵏ ⵜⴰⵎⵏⴰⴹⵜ-ⴰ ⴰⵢ ⴷ-ⵢⴻⵍⵍⴰⵏ ⴷⴷⴰⵡ ⵍⴻⵄⵏⴰⵢⴰ ⵏ ⵜⵓⴷⴷⵙⴰ ⵏ ⵢⴻⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ.

ⵉⵙⵕⴰⵢⵉⵍ ⵜⴻⴹⴹⴻⴼ 1.200 ⵏ ⵢⵉⴽⵉⵍⵓⵎⵉⵜⵔⴻⵏ ⵉⵎⴽⵓⵥⴻⵏ ⵙⴻⴳ ⵡⴻⴳⵏⵉ ⵏ ⴵⵓⵍⴰⵏ ⴷⴻⴳ 1967, ⵙⴰⴽⴽⵉⵏ ⵜⴻⵇⵇⴻⵏ-ⵉⵜ-ⵉⴷ ⵖⴻⵔ ⵉⵙⵕⴰⵢⵉⵍ ⴷⴻⴳ 1981. ⵎⴰⵛⴰ ⴰⵢⴰ ⵡⴻⵔⴵⵉⵏ ⵜⴻⵙⵜⴻⵄⵕⴻⴼ ⵢⴻⵙ-ⵙ ⵓⵍⴰ ⴷ ⵢⵉⵡⴻⵜ ⵏ ⵜⵎⵓⵔⵜ. ⵙⵓⵔⵢⴰ ⵎⴰⵣⴰⵍ ⵜⴻⵃⴽⴻⵎ 510 ⵏ ⵢⵉⴽⵉⵍⵓⵎⵉⵜⵔⴻⵏ ⵉⵎⴽⵓⵥⴻⵏ ⵙⴻⴳ ⵡⴰⵢⴻⵏ ⴰⵢ ⴷ-ⵢⴻⵇⵇⵉⵎⴻⵏ ⵙⴻⴳ ⵡⴻⴳⵏⵉ-ⴰ.