Asebter amenzawi
Uraren Igrakalanen n 2021: aqeddem n usenfar n lebni n « Olympics Towers »
WEHṚAN– Yettwaqeddem-d, ass n laṛebɛa tameddit deg Wehṛan, usenfar aṣukan n lebni n « Olympics Towers » aydeg ad ilint tnariyin (makatib) n Useqqamu n Ussuddes n Wuraren Igrakalanen n 2021. Aqeddem-a yella-d i lmend n terzi n uselway n Useqqamu Ulimpi d Waddalan n Lezzayer, s weḥdaṛ n uwali d uselway n Wegraw Aɣerfan n Twilayt.
Wa d asenfar n lebni n yiwen n uzadaɣ (ɛimara) n 25 n wannagen, 454 n tmudrutin (cuqaq) d uneɣsar n tkeṛṛusin yesɛan 3 n yeswiren ddaw tmurt deg tlemmast n temdint n Wehṛan, yernu aya akk ad yili s wemtawa igerrazen d temdint-a s uqader n tegna n unnefli unzig, ɣef wakken ay aɣ-d-yenna Mustapha Berraf, aselway n Useqqamu Ulimpi.
« Ad ttwakksen akk yiɛewwiqen i weḍman n rrbeḥ n tedyant-a », ɣef wakken ay d-iwekked.
Deg wayen yerzan aseqqamu aslekman (tanfidi) n Useqqamu Ulimpi Adzayri aydeg ttekkan, imir-a, ula d iselwayen n tfidiṛaliyin taddalanin, ad yeg timlilit-nnes ass n lexmis deg Wehṛan yernu yenna-d Berraf dakken iswi n temlilit-a d aqeyyem n wayen ay d-yettwaswejden i Wuraren Ulimpiyen n Rio n 2016 d ussukku n tiṭ ɣef wakk ayen ay yessefken ad yettweg.
« Ad d-tili ta d tagnit i uqeyyem n wesɣiwes (taxṭiṭ) n wesleɣmu (tadrib) i ttiɛad-a, yernu ad ikemmel wesleɣmu arma d 4 Ɣuct, ladɣa deg wayen yerzan aqeyyem n yal anaddal », ɣef wakken ay d-iwekked Mass Berraf.
Taswiɛt-a, ɛeddan 62 n yinaddalen idzayriyen seg 13 n waddalen ɣer Wuraren Ulimpiyen n Rio (deg Brizil), gar-asen ula d taɣlamt tulimpit tadzayrit n tcirt n uḍar, ɣef wakken ay d-yenna uselway Berraf, am wakken ay d-yerna dakken « iswi-nneɣ d aḍman n uɛeddi n 70 n yinaddalen », yernu yessemɛen-d deg waya ɣef 8 n yinaddalen aydeg yella ussirem ad ɛeddin deg waddalen n werfad n werfad n tẓayanin, tatlitit, taleggimt d tiɣilt.
