Asebter amenzawi
La tessefray SpaceX ad tazen takabsunt ur yettwazedɣen ɣer Meɣres deg 2018
Wacintun – La tessefray teṛmist (carika) n SpaceX ad tazen takabsunt ur yettwazedɣen ɣer Meɣres deg 2018 ɣef wakken ay d-tenna ass n lexmis. Taṛmist-a yellan deg Kalifuṛnya, yessebded-itt-id umilyaṛdiṛ amarikani Elon Musk, yernu la tessaram ad d-tessebded tahrest (mustawṭana) deg wemtiweg n Meɣres.
« La nessefray ad nazen (takabsunt) n Dragon ɣer Meɣres deg 2018 », ɣef wakken ay d-yenna deg yiwen n yizen n Twitter. Takabsunt-a n « Red Dragon » d tasenfelt yettwasselhan n tkabsult n Dragon ay la tesseqdac yagi teṛmist-a i ussiweḍ n sselɛa ɣer Teɣsert Tallunant (maḥaṭṭa faḍa’iyya) Tagraɣlant.
« Dragon tis 2 tettwaxdem-d akken ad tezmer ad ters ɣef yal amkan deg unagraw afukan yernu azzun n Red Dragon ɣer Meɣres ad d-yili d affug amezwaru n warram », ɣef wakken ay d-yenna.
D acu kan, yenna-d daɣ unemhal n SpaceX dakken ur la yessefray ad yazen imsallunen (ruwwad faḍa’) deg tkabsunt-a iḥeṛsen.
ɣef leḥsab-nnes, ulayɣer ma ttwaznen yemsallunen akkin i temnaḍt yellan gar Wakal d Wayyur, acku takabsunt-a ur twata i ussikel (safar) ad iɛeḍḍlen. Ixebber-d daɣ dakken takabsunt n Dragon tis snat meɣɣret anect n tkeṛṛust takanrart.
Deg Ctembeṛ ad yernu ad d-yefk Elon Musk ugar n ttfaṣil ɣef waffug n « Red Dragon » ay d-yellan deg ukatar n usenfar-nnes n « Mars Colonial Transporter ». Ad d-yili waya deg Usarag Asnallunan Agraɣlan deg temdint n Guadalajara, deg Miksik.
La tessefray teṛmist n SpaceX daɣ ad tazen, i tikkelt tamezwarut, tasenfelt tamaẓayt n tmeẓdit-nnes n Falcon 9 deg tgara n useggas-a. D tin ay d timeẓdit ad yaznen takabsunt n Red Dragon.
NASA la tessefray ad tazen takabsunt yettwazedɣen ɣer Meɣres deg yiseggasen n 2030, yernu tenna-d, ass n laṛebɛa, dakken ad tɛawen taṛmist n SpaceX seg yidis atwilan (tiqni) i lmend n ussewjed n waffug n tkabsunt-a ad yawḍen ɣer wemtiweg n Meɣres.
Elon Musk yessebded-d daɣ Tesla Motors, d yiwet n teṛmist ay d-ixeddmen tikeṛṛusin n trisiti, am wakken ay yettwassen daɣ s wesnulfu n teṛmist n PayPal, yiɣalen d tamezwarut deg uxelleṣ n Internet, d teṛmisin n eBay. Deg 2002 ay d-yesnulfa SpaceX.
Taṛmist-a tessaweḍ ad teg snat n tɣawsiwin deg umezruy n waffug allunan. Tamezwarut, tessaweḍ ad d-tessers annag (ṭabaq) n tmeẓdit ɣef lqaɛa, ma d tis snat, d assersi n wannag n tmeẓdit ɣef uɣerrabu deg ugaraw Aṭlasi. S waya, la yessefray Elon Musk ad yessenqes s waṭas ayen ay d-yesqamay wazzun n tmeẓdiyin.
Taṛmist n SpaceX la tessawaḍ, ass-a, sselɛa ɣer Teṛmist Tallunant Tagraɣlant i lfayda n NASA wukud testenya agatu (ɛaqd) n sin n yimelyaṛen n yidulaṛen.
Taṛmist-a tga iguta daɣ d NASA d Boeing deg 2014 i ussiweḍ n yemsallunen ɣer Teɣsert Tallunant Tagraɣlant. Azal n leɛqudat-a yewweḍ ɣer 2,6 n yimelyaṛen n yidulaṛen.
Tasenfelt yettwazedɣen n Dragon ad tettwazen ɣer Teɣsert Tallunant Tagraɣlant deg tgara n 2017 akken ad tt-ɛerḍen ma tezmer ad tessiweḍ imdanen.
