Asebter amenzawi

Aciri urbiḥ n tmeẓdit tamezwarut n Soyouz seg uzadur amaynu n uciri n Vostotchny

VOSTOTCHNY (Rusya) – Teqleɛ tmeẓdit (ṣarux) n Soyouz 2.1 war uguren, ass n lexmis taṣebḥt, seg uzadur n uciri (qaɛidat iṭlaq) n Vostotchny. D wa ay d aciri urbiḥ amezwaru seg uzadur-a, yernu iswi n tmeẓdit-a n Soyouz d assersi n 3 n yigensaten ussnanen deg tallunt.

« Aciri n tmeẓdit-nni yella-d s rrbeḥ » deg wakud-nni ay yettwassefran, ɣef tis 11:01 n tṣebḥit (tis 2:01 s wakud n Greenwich), ɣef wakken ay d-tenna tnegga tallunant (wakala faḍa’iyya) tarusit n Roskosmos deg yiwen n welɣu.

Tiregwa tirusiyin n tliẓri sseknent-d timeẓdit-nni mi teqleɛ deg yigenni yeṣfan.

Naqal ssefran ad aciren timeẓdit-a ass n laṛebɛa taṣebḥit deg wakud-nni, maca yettwawexxer. Timeẓdit-a tettwacir s weḥdaṛ n uselway Vladimir Putin.

Aselway Putin yenna-d dakken ccil n wakk lexṣarat ay d-yellan, Rusya tettɣimi-d d nettat ay d tanezmart taneɣmart deg wayen yerzan amḍan (ɛadad) n tmeẓdiyin yettwaciren ɣer tallunt.

Azadur n uciri n Volotchny yettwebna akken ad d-yexlef azadur n Baikonour yellan deg Kazaxestan. Aneggaru-a tekra-t Rusya s 115 n yimelyunen n wuṛuten i useggas seg wasmi ay teɣli Tdukli Tasuvyatit akken ad teccir seg-s timeẓdit-nnes n Soyouz, yernu d timeẓdit-a ay yuɣalen d ttawil awḥid i ussiweḍ n yemdanen ɣer Teɣsert Tallunant Tagraɣlant.