Asebter amenzawi

Aɣlif n teɣdemt la ixeddem akken ad yekkes lḥeṛs ɣef yinezrafen (aneɣlaf)

LEZZAYER TAMANET, 28 Yebrir 2016 – Yenna-d uneɣlaf n teɣdemt, Tayeb Louh, ass n lexmis deg Lezzayer Tamaneɣt, dakken aɣlif-nnes la ixeddem akken « ad yekkes akk lḥeṛs » ay izemren ad d-yili ɣef yinezrafen (quḍat), am wakken ay d-yenna dakken yessefk ad d-yili ucegger (muraǧaɛa) n unagraw n ussileɣ n yinezrafen.

Deg yiwen n uneskin (ɛarḍ) ay d-iqeddem i tseqqamut n tedrimt d umarud n Wegraw Aɣerfan Aɣelnaw, deg ukatar n ussukku n tiṭ ɣef usenfar n lqanun n weslagan n umarud n 2013, yenna-d Mass Louh dakken « tukksa n lḥeṛs ɣef yinezrafen i lebda tettekka deg tsemmeskelt (iṣlaḥ) n teɣdemt ».

Iwekked-d daɣ uneɣlaf dakken acegger n unagraw n ussileɣ n yinezrafen d win aydeg tallit n ussileɣ tezmer ad tuɣal 4 n yiseggasen deg webdil n 3, yernu ad d-snulfun tizgelt n ufazi (quṭb imtiyaz) deg ukatar n wesmal n teɣbula talsanin (mawarid bacariyya).

Mi yettwatter ɣef usseɛjel n usekker (muɛalaǧa) n yikaramen n teɣdemt, yenna-d Mass Louh dakken afmiḍi (nisba) n usekker n temsal n ccṛeɛ n uɛaqeb yewweḍ ɣer 92,85%, timsal tiɣarimin ɣer 81,91%, timsal tideblanin ɣer 68,60%, ma d afmiḍi n usselkem n uɛaqeb yewweḍ ɣer 96,70%.

Yenna-d daɣ uneɣlaf dakken la yettxemmim weɣlif ad yessifses tisekkirin (iǧra’at) n truẓi n ccṛeɛ deg Ccṛeɛ Aɛlayan, yernu yenna-d dakken aḥezzib-a ad yili d « ul n tsemmeskelt n teɣdemt », am wakken ay yeḥwaj waya attekki n yidisan yemgerraden, gar-asen inezrafen, ibugaṭuten d yigensasen n tmetti taɣarimt (muǧtamaɛ madani).